အရှေ့နဲ့ အရှေ့တောင်အာရှဒေသတွေမှာ ပြီးခဲ့တဲ့ ၂၀၂၁ ခုနှစ်အတွင်း စိတ်ကြွမူးယစ်ဆေးဝါး ၁ ဘီလီယံကျော် စံချိန်တင် ဖမ်းဆီးရမိခဲ့ပြီး ရာဇ၀တ်ဂိုဏ်းတွေက ကိုဗစ်-၁၉ ကပ်ရောဂါနဲ့ စစ်အာဏာသိမ်းခံ မြန်မာနိုင်ငံရဲ့ မတည်မငြိမ်ဖြစ်မှုတွေကို အသုံးချခဲ့တာဖြစ်တယ်လို့ ကုလသမဂ္ဂ မူးယစ်ဆေးဝါးနဲ့ ရာဇဝတ်မှုဆိုင်ရာရုံး (UNODC) က ထုတ်ပြန်ချက်ကို ကိုးကားပြီး အေအက်ဖ်ပီ သတင်းမှာရေးပါတယ်။
မြန်မာ၊ ထိုင်းနဲ့ လာအို ၃ နိုင်ငံနယ်စပ် ရွှေတြိဂံလို့သိကြတဲ့ နေရာကတော့ ဒေသတွင်း ရဲတွေရဲ့ တာဝန်လစ်ဟင်းမှုတွေနဲ့အတူ တရားမဝင် နယ်စပ်ဖြတ်ကျော် မူးယစ်ဆေးဝါး ရောင်းဝယ်ဖောက်ကားရာ အဓိကဗဟိုချက်မ နေရာတခုအဖြစ် ဟိုးအရင်ကတည်းက ကာလရှည်ကြာရှိနေခဲ့တယ်လို့ ဆိုပါတယ်။
စံချိန်တင် ဖမ်းဆီးရမိမှုအဖြစ် မက်သဖက်တမင်း မူးယစ်ဆေးဝါး အသားတင် ၁၇၂ တန်နီးပါးကို သက်ဆိုင်ရာ တာဝန်ရှိသူတွေက ဖမ်းဆီးရမိခဲ့ပြီး စုစုပေါင်း ၁ ဘီလီယံကျော်ဟာ လွန်ခဲ့တဲ့ ၁၀ နှစ်အတွင်း ဖမ်းဆီးရမိမှုတွေထက် ၇ ဆနီးပါး မြင့်တက်လာခဲ့တာဖြစ်တယ်လို့ ကုလသမဂ္ဂ မူးယစ်ဆေး ဝါးနဲ့ ရာဇဝတ်မှုဆိုင်ရာရုံး (UNODC) က ပြောပါတယ်။
UNODC က ဒေသတွင်း ပြောရေးဆိုခွင့်ရကိုယ်စားလှယ်တယောက်ဖြစ်တဲ့ ဂျယ်ရမီ ဒေါက်ဂလပ်စ်ကတော့ “အရှေ့နဲ့ အရှေ့တောင်အာရှဒေသတွင်း မက်သဖက်တမင်း စိတ်ကြွဆေးပြားနဲ့ မူးယစ်ဆေးဝါးရောင်း ဝယ်ဖောက်ကားမှု ပမာဏဟာ တုန်လှုပ်စရာပါပဲ”လို့ ပြောပါတယ်။
ကိုဗစ်-၁၉ ကပ်ဘေးနဲ့ ဒေသတွင်း နိုင်ငံရေးမတည်ငြိမ်မှုတွေကို အခွင့်ကောင်းယူပြီး ရာဇ၀တ်ဂိုဏ်းတွေနဲ့ လက်နက်ကိုင်အဖွဲ့တွေက အကျိုးအမြတ်ရရှိဖို့ လုပ်ဆောင်ခဲ့ကြတယ်လို့လည်း သူက ဆိုပါတယ်။
မက်သဖက်တမင်း စိတ်ကြွဆေးပြားတွေ ရောင်းဝယ်ဖောက်ကားမှု မြင့်တက်လာချိန်မှာ ခရစ္စတယ်မက်သဖက်တမင်းကတော့ ၇၉ တန် ဖမ်းမိခဲ့တာမို့ လွန်ခဲ့တဲ့ ၂၀၂၀ ပြည့်နှစ်က ၈၂ တန်ဖမ်းမိခဲ့တာထက်စာရင် အနည်းငယ်ကျဆင်းလာခဲ့တယ်လို့ ဆိုပါတယ်။
ဒါပေမဲ့ လွန်ခဲ့တဲ့ ၁၀ နှစ်တာကာလနဲ့ နှိုင်းယှဉ်မယ်ဆိုရင်တော့ ၁၀ တန်အောက်သာရှိခဲ့ရာကနေ တဖြည်းဖြည်းနဲ့ ပိုမိုပြီးတော့ မြင့်တက်လာခဲ့တာလို့ ထုတ်ပြန်ချက်ထဲမှာ ဖော်ပြပါတယ်။
မြန်မာနိုင်ငံရဲ့ မြောက်ပိုင်းရှမ်းပြည်ကတော့ ဒေသတွင်း မက်သဖက်တမင်း မူးယစ်ဆေးဝါးရရှိနိုင်တဲ့ မူလဇစ်မြစ်အဖြစ် ရှိနေဆဲဖြစ်ကာ လာအိုနိုင်ငံဆီ ရေကြောင်းကတဆင့် တင်ပို့မှုတွေ တိုးမြင့်လာသလို အဲဒီက တဆင့် မလေးရှားနိုင်ငံကို မပို့ခင် ထိုင်းနိုင်ငံဆီ ရောက်ရှိသွားပြီး အာရှ-ပစိဖိတ်ဒေသတွင်း နိုင်ငံတွေအားလုံးဆီ ရောက်ရှိနေတာဖြစ်တယ်လို့ AFP သတင်းက ဆိုပါတယ်။
Ref-AFP
Photo-UNODC
