ရုရှားအရှေ့ဖျားမြို့ ဗလာဒီဗိုစတော့မြို့မှာ စက်တင်ဘာ ၇ ရက်က ကျင်းပတဲ့ အရှေ့ဖျား စီးပွားရေးဖိုရမ်မှာ ရုရှားသမ္မတ ဗလာဒီမာပူတင် အဖွင့်မိန့်ခွန်း ပြောကြားတဲ့အထဲ ဒေါ်လာ၊ ယူရိုနဲ့ ပေါင် စတဲ့ငွေကြေးတွေအပေါ် ယုံကြည်မှုတွေက မျက်စိရှေ့မှာပဲ ဆုံးရှုံးသွားပြီလို့ ထည့်သွင်း ပြောသွားပါတယ်။
အမေရိကန်ရဲ့ မဟာမိတ်တွေတောင် သူတို့ရဲ့ ဒေါ်လာပိုင်ဆိုင်မှု ပမာဏကို တဖြည်းဖြည်း လျှော့ချနေကြကြောင်း စာရင်းဇယားတွေမှာ တွေ့နေရပြီလို့လည်း ဆိုပါတယ်။
တရုတ်နိုင်ငံဟာ ရုရှားဆီက ဓာတ်ငွေ့အတွက် ဂက်ဇ်ပရွမ်းကို ပေးချေတဲ့အခါ ရူဘယ်နဲ့ ယွမ် ၅၀-၅၀ ခွဲပြီး ရူဘယ်နဲ့ တရုတ်ယွမ်ကို ပြောင်းရွှေ့ဖို့ ဆုံးဖြတ်ခဲ့ကြောင်းလည်း ပြောပါတယ်။
ယူကရိန်းမှာ အထူးစစ်ဆင်ရေးအဖြစ် ပူတင်ရဲ့ လုပ်ဆောင်ချက်တွေအတွက် ရုရှားကို ခေတ်သစ်သမိုင်းမှာ အပြင်းထန်ဆုံး ပိတ်ဆို့အရေးယူမှုတွေ အမေရိကန်နဲ့ မဟာမိတ်တွေ ချမှတ်ခဲ့တာကို ကရင်မလင် တုံ့ပြန်မှုဟာ စစ်ကြေညာတာနဲ့ တူနေတယ်လို့ ရိုက်တာသတင်းမှာ ရေးထားပါတယ်။
အနောက်နိုင်ငံတွေဟာ ကမ္ဘာပေါ်မှာ သူတို့ရဲ့ဆန္ဒတွေကို ပုံစံလိုက်ချနေတာမှာ တခြားနိုင်ငံတွေကို သူတို့ရဲ့ အချုပ်အခြာအာဏာကို စွန့်လွှတ်ပြီးတော့ လက်အောက်ငယ်သားတွေလို အုပ်ချုပ်ဖို့ ဖြစ်နေတယ်လို့လည်း ပူတင်က ပြောပါတယ်။
ဒါပေမဲ့လည်း ကမ္ဘာလုံးဆိုင်ရာ တိုးတက်မှုရဲ့ အထွတ်အထိပ်က ခုဆို အာရှမှာ ရှိနေတာကြောင့် သူတို့ရဲ့ဩဇာအာဏာတွေ ကျဆင်းသွားခဲ့ပြီလို့လည်း ဆိုပါတယ်။
ဒါ့အပြင် ပူတင်က ယူကရိန်းမှာ ရုရှားရဲ့ စစ်ရေးလှုပ်ရှားမှုကြောင့် ရုရှားအနေနဲ့ တစုံတရာ ဆုံးရှုံးခဲ့ခြင်း မရှိခဲ့ကြောင်းလည်း ပြောဆိုပါတယ်။
ရုရှားရဲ့လုပ်ဆောင်ချက် အားလုံးဟာ ရုရှားနိုင်ငံရဲ့ အချုပ်အခြာအာဏာကို ခိုင်မာစေဖို့ ဒီဇိုင်းထုတ်ထားပြီး ယူကရိန်းအရှေ့ပိုင်း ဒွန်ဘတ်စ်ဒေသမှာ နေထိုင်တဲ့ ပြည်သူတွေကို ကူညီဖို့ ရည်ရွယ်ထားကြောင်း သူက ပြောကြားခဲ့ပါတယ်။
