ရခိုင်ပြည်နယ်၊ သံတွဲမြို့က ပန်းချီဆရာမ ဒေးဒေးကို ဒီဇင်ဘာ ၃၀ ရက်မှာ စစ်ကောင်စီဩဇာခံ သံတွဲခရိုင်တရားရုံးက အလုပ်ကြမ်းနဲ့ ထောင်ဒဏ် ၁၀ နှစ်ချမှတ်လိုက်ပါတယ်။
ပန်းချီဆရာမ ဒေးဒေးကို အမျိုးသားညီညွတ်ရေးအစိုးရ (NUG) နဲ့ ပြည်သူ့ကာကွယ်ရေးတပ်ဖွဲ့ PDF တွေကို ထောက်ပံ့ကူညီတယ်ဆိုပြီး သံတွဲမြို့မရဲစခန်းက ပြီးခဲ့တဲ့ ဇူလိုင် ၂၇ ရက်မှာ ဖမ်းဆီးသွားတာဖြစ်ပြီး အကြမ်းဖက် ဥပဒေပုဒ်မ ၅၀ (ည) နဲ့ တရားစွဲဆိုထားခဲ့တာပါ။
အဲဒီလို ဖမ်းဆီးခံရပြီး သံတွဲခရိုင်တရားရုံးမှာ လေးလကြာ အမူရင်ဆိုင်ပြီးတဲ့နောက် အခုလို အပြီးသတ်အမိန့်ချခဲ့တာပါ။
"ဂွတံတားဖွင့်ပွဲလုပ်လို့ သံတွဲမှာ စစ်ကောင်စီက လူကြီးတွေရောက်နေတယ်ဆိုပြီး သူ့ကို ရုံးချိန်းမထုတ်ဖြစ်ဘူး။ ဒီနေ့မှာလည်း ရုံးချိန်းရှိတာ မိသားစုတောင် မသိဘူး။ မွန်းလွဲပိုင်းလောက်မှ ရုံးထုတ်ရှိတယ်ဆိုပြီး ချက်ချင်း အမိန့်ချပစ်လိုက်တာ။ သူတို့က နှစ်မကူးအောင် ဒီနေ့သောကြာနေ့မှာ အပြီးလုပ်လိုက်တဲ့သဘောပေါ့" လို့ သံတွဲမြို့ခံတယောက်က ပြောပါတယ်။
ပန်းချီဆရာမဒေးဒေးကို သံတွဲမြို့မရဲစခန်းမှူးက တရားစွဲဆိုခဲ့တာဖြစ်ပြီး တရားရုံးတင် စစ်ဆေးတဲ့အခါမှာ ပန်းချီဆရာမရဲ့ လက်သုံးချောင်းထောင်တဲ့ ဓာတ်ပုံနဲ့ CDM သမားတွေကို ထောက်ပံ့ဖို့ ကံစမ်းမဲနှိုက်လို့ရတယ်ဆိုတဲ့ ဖေ့စ်ဘွတ်ခ်ပေါ်က ပို့စ်တခုကို ပြန်လည်မျှဝေတဲ့ စကရင်ရှော့ ဓာတ်ပုံနှစ်ခုပဲ စခန်းမှူးဘက်က သက်သေပြနိုင်ပြီး အကြမ်းဖက်မှုမြောက်တဲ့ တခြား သက်သေတွေမပြနိုင်ဘဲ အခုလို နှစ်ရှည်ထောင်ဒဏ်ချမှတ်တာဟာ တရားမမျှတမူကို ထင်ရှားစေတယ်လို့ ရုံးချိန်းတွေကို သွားရောက်နားထောင်ခဲ့သူတယောက်က ပြောပါတယ်။
"စခန်းမှူးက နင့်ဘာသာနင် ဘယ်လိုပဲ လုပ်လုပ် နင် ထောင်မကျ ကျအောင် ငါလုပ်မယ်ဆိုပြီး ရုံးထုတ်တဲ့အချိန် တရားရုံးအချုပ်မှာ လာပြောသွားတယ်လို့ သိရတယ်။ ဒီလူက ပိုက်ဆံမရလို့ အခုလို လုပ်တာလည်း ဖြစ်နိုင်တယ်။ သံတွဲမြို့ပေါ်မှာ ဆေးမှုနဲ့ အဖမ်းခံရတဲ့ သူတွေ သိန်း ၁၀၀၊ ၂၀၀ ပေးလိုက်ရင် ချက်ချင်းပြန်လွှတ်ပေးတယ်။ သာမန် လက်လုပ်လက်စားသမားကျတော့ ဒီလောက်ငွေကို ဘယ်ပေးနိုင်ဖို့လဲ၊ အဲတော့ထောင်အကျခံရတာပေါ့။"
ပုံတူပန်းချီကားတွေ၊ ကျောက်တုံးပေါ်မှာ ပန်းချီရေးဆွဲတဲ့ Stone Art ပန်းချီတွေကို အဓိက ရေးဆွဲတဲ့ ပန်းချီဆရာမ ဒေးဒေးဟာ ဆူရှီဆိုင်လည်းဖွင့်ထားပြီး မုဆိုးမ အမေနဲ့ မောင်ဖြစ်သူကို ရှာဖွေကျွေးမွေးစောင့်ရှောက်နေသူ တယောက်လည်း ဖြစ်ပါတယ်။
သူအပါအဝင် သံတွဲမြို့မှာ အကြမ်းဖက်ဥပဒေပုဒ်မ ၅၀ (ည) နဲ့ တရားစွဲဆိုခံရပြီး နှစ်ရှည်ထောင်ဒဏ် ၁၀ နှစ်အထိ ချမှတ်ခံထားရသူ အမျိုးသမီး ၄ ယောက် ရှိလာပြီဖြစ်ပါတယ်။
ရန်ကုန်တိုင်း၊ ခရမ်းမြို့နယ်၊ အထက (ခွဲ) ကံကောင်းဟောင်းက CDM မူလတန်းပြဆရာ ဦးထက်မြတ်အောင်ကို ဒီဇင်ဘာ ၂ ရက်မှာ စစ်ကောင်စီက အလုပ်ကြမ်းနဲ့ ထောင်ဒဏ် ၁၀ နှစ်ချမှတ်ခဲ့တာနဲ့ပတ်သက်လို့ ခရမ်းမြို့နယ် အခြေခံပညာရေးလုပ်သားများသမဂ္ဂက ကန့်ကွက် ကြောင်း ကြေညာပါတယ်။
ဦးထက်မြတ်အောင်ကို သူ့နေအိမ်မှာပဲ စစ်ကောင်စီတပ်က ဝင်ရောက် ဖမ်းဆီးခဲ့ပြီး သက်သေမခိုင်လုံဘဲ ပုဒ်မ ၅၀ (ည) နဲ့ တရားစွဲခဲ့က အလုပ်ကြမ်းနဲ့ ထောင်ဒဏ် ၁၀ နှစ် ချမှတ်ခဲ့တာလို့ ခရမ်းပညာရေးဝန်ထမ်းတစ်ဦးက ပြောပါတယ်။
စစ်တပ်အာဏာသိမ်းပြီးနောက် သာမန် CDM ကျောင်းဆရာတယောက်အဖြစ် နေထိုင်ခဲ့တဲ့ ပညာရေးဝန်ထမ်း မူလတန်းပြ CDM ကျောင်းဆရာ ဦးထက်မြတ်အောင်ကို ၂၀၂၂ ဖေဖော်ဝါရီ ၂၃ ရက်မှာ ရပ်ကွက်လူကြီးတချိုနဲ့ စစ်ကောင်စီတပ်ဖွဲဝင်တွေက အင်အားသုံးပြီး သူ့အိမ်မှာဝင်ရောက် ဖမ်းဆီးခဲ့တာပါ။
ခရမ်း အခြေခံပညာရေးလုပ်သားများသမဂ္ဂက တာဝန်ရှိသူက “ကျနော်တို့ CDM ဝန်ထမ်းတွေက အခုချိန်အထိ လုံခြုံရေး၊ စီးပွားရေးအခက်အခဲ အမျိုးမျိုးကြားက နေထိုင်ရပ်တည်နေရတဲ့အပြင် တစ်ခုခုဖြစ်တာနဲ့ CDM တွေကို မတရားစွပ်စွဲ ဖမ်းဆီးပြီး အကြမ်းဖက်ပုဒ်မတွေနဲ့ မတရားအမိန့်ချနေတဲ့ အပေါ်မှာတော့ ကျနော်တို့ အနေနဲ့ လုံးဝ ရှုတ်ချပါတယ်။ အကြမ်းမဖက် အာဏာဖီဆန်မှု CDM လှုပ်ရှားမှု အမျိုးမျိုးပြိုလဲအောင် လူ့အခွင့်အရေးချိုးဖောက်မှုတွေကို ဆက်တိုက်ပြုလုပ်နေတယ်လို မြင်ပါတယ် ၊ CDM ဝင်ထားသူတွေအတွက် လူမှုရေးကူညီစောင့်ရှောက်မှုတွေ ဖေးမကူညီမှုတွေ အများကြီး လိုအပ်နေပါတယ်" လို့ ပြောပါတယ်။
CDM ဝန်ထမ်းတွေဟာ လက်ရှိကာလ လူမှုစီးပွားရေးအခက်အခဲတွေနဲ့ ရင်ဆိုင်နေရကာ လုံခြုံရေးအရလည်း အမြဲခြိမ်းခြောက်ခံနေရပြီး စစ်ကောင်စီဘက်ကလည်း မတရားဖမ်းဆီးထိန်းသိမ်းပြီး နှစ်ရှည်ထောင်ဒဏ်တွေ ချမှတ်နေတာပါ။
CDM ဝန်ထမ်းတွေဟာ ကူညီစောင့်ရှောက်မှုတွေ ဘာမှ ထိထိရောက်ရောက် မရရှိတာကြောင့် အချိန်ကြာလာတာနဲ့အမျှ စားဝတ်နေရေးအတွက် ခက်ခက်ခဲခဲ ရုန်းကန်နေရတဲ့ကြားက ကြံ့ကြံ့ခံပြီး စစ်အာဏာရှင်ကို အာဏာဖီဆန်ပြီး ဆက်လက်ဆန့်ကျင်တော်လှန်နေကြပါတယ်။
