ရှမ်းပြည်နယ်မြောက်ပိုင်း၊ တရုတ် - မြန်မာနယ်စပ်၊ ကြူကုတ် (ပန်ဆိုင်း) - ဝမ်တိန် ဂိတ်ကနေ ကုန်ကား အဝင်၊ အထွက်ကို မတ် ၂၀ ရက်နေ့မနက် ၆ နာရီကစ ပြန်လည်ဖွင့်လှစ် လိုက်ပြီလို့ နယ်စပ် ဒေသခံတွေက ပြောပါတယ်။
"ဟုတ်တယ်။ ဒီနေ့ ဖွင့်တယ်။ ဘာတွေ ဘယ်လို ဝင်ထွက်လို့ရလဲတော့ ကျနော် အတိအကျ မသိသေးဘူး" လို့ ဌာနဆိုင်ရာ ဝန်ထမ်းတဦးက ပြောပါတယ်။
ပို့ကုန်ပစ္စည်းတွေအနေနဲ့ သစ်သီးနဲ့ ကြံကို ခြောက်ဘီး၊ ဆယ့်နှစ်ဘီး၊ တွဲကားတို့နဲ့ တင်ပို့ခွင့်ပြုပြီး တရုတ်ဘက်ထဲက မြန်မာဘက် အပြန်ကို ခါလီသာ ဝင်ခွင့်ပြုကြောင်း၊ တရုတ်ဘက်ထဲကနေ ကုန်ပစ္စည်း တင်လာလိုပါက ကျင်းစန်းကျော့ ဂိတ်ကနေသာ ထွက်ရမှာဖြစ်ကြောင်း နယ်စပ် ကုန်သည်လုပ်ငန်းရှင်တွေက ပြောပါတယ်။
"ဒီမနက်ဖွင့်ပြီ။ လူတော့ ခွင့်မပြုဘူးတဲ့။ ကုန်ကားတွေက ရတယ်။ ကားတစီး လူတဦးပေါ့" လို့ ပန်ဆိုင်းမြို့မှာ အလုပ်လုပ်နေသူ အမျိုးသားတဦးက ပြောပါတယ်။
တရုတ်ဘက်က သွင်းကုန်အနေနဲ့ လူသုံးကုန်၊ ဆေးဝါး၊ လျှပ်စစ်ပစ္စည်း နဲ့ စားသောက်ကုန်တွေကို ခြောက်ဘီးနဲ့သာ တင်သွင်းခွင့်ပြုကြောင်း နယ်စပ် လုပ်ငန်းရှင်တွေဆီက သိရပါတယ်။
ကိုဗစ်ကပ်ရောဂါကြောင့် ကြူကုတ် (ပန်ဆိုင်း) - ဝမ်တိန် ဂိတ်ကို ပြီးခဲ့တဲ့ ၂၀၂၁ ဇူလိုင် ၈ ရက်နေ့ကစ တရုတ်ဘက်က အကန့်အသတ်မရှိ ပိတ်ထားခဲ့တာဖြစ်ပြီး ၂၀၂၂ ခုနှစ် နှစ်ကုန်ပိုင်း တရုတ်နိုင်ငံထဲ ကိုဗစ် Zero စနစ် ဖြေလျှော့လိုက်ချိန်ကစ တရုတ်ဘက်ကနေ မြန်မာနိုင်ငံနဲ့ ထိစပ်နေတဲ့ နယ်စပ်ဂိတ်တွေကို တခုပြီးတခု ဖွင့်လှစ်လိုက်တာဖြစ်ပြီး မြန်မာဘက်ကလည်း တဖြည်းဖြည်းချင်းစီ ပြန်လည်ဖွင့်လှစ်ခဲ့တာပါ။
လက်ရှိမှာတော့ မူဆယ်နယ်စပ်ဂိတ်တွေ ဖြစ်တဲ့ မန့်ဝိန်း - ကျယ်ဂေါင် ဂိတ်ကနေ ခြောက်ဘီး ကုန်တင်ယာဉ်တွေ၊ နန်းတော် - ကျယ်ဂေါင် ဂိတ်ကနေ လူ၊ ဆင်ဖြူ - ကျယ်ဂေါင် ဂိတ်ကနေ လူနဲ့ ခြောက်ဘီးအောက် ယာဉ်ငယ်တွေ၊ ကျင်းစန်းစကျော့ - ဝမ်တိန် ဂိတ်ကနေ ရှစ်ဘီးနဲ့ အထက် ကုန်တင်ယာဉ်တွေ၊ ချင်းရွှေဟော် - မုန်းတိန်ဂိတ်ကနေ ဆယ့်နှစ်ဘီး ကုန်တင်ယာဉ်တွေ စသဖြင့် ဝင်ထွက် ခွင့်ပြုနေတာဖြစ်ပြီး လူဝင် လူထွက် နယ်စပ်ဖြတ်ကျော်ခွင့် စာအုပ်ကိုတော့ တရုတ်နိုင်ငံ နဲ့ ထိစပ်နေတဲ့ မြို့တွေထဲက အိမ်ထောင်စု စာရင်းရှိသူတွေကိုသာ ထုတ်ပေးနေတာဖြစ်ပါတယ်။
Pra Jaw
ရှမ်းပြည်နယ်မြောက်ပိုင်း၊ မြန်မာ - တရုတ် နယ်စပ် ကြူကုတ် (ပန်ဆိုင်း) - ဝမ်တိန် နယ်စပ်ဂိတ်ကို ၂ နှစ်ကျော်ကြာ ပိတ်ထားရာက မတ် ၁ ရက်ကစ ပြန်လည်ဖွင့်လှစ်လိုက်ပေမဲ့ အဝင်အထွက် မရှိသေးဘူးလို့ နယ်စပ် ဒေသခံတွေက ပြောပါတယ်။
ဌာနဆိုင်ရာနဲ့ နီးစပ်သူဒေသခံအမျိုးသား တဦးက "မတ် ၁ ရက်ကတည်းက မြန်မာဘက်က ဖွင့်ထားပြီ။ တရုတ်ဘက်ခြမ်းလည်း ဖွင့်ထားပြီ။ ဒါပေမဲ့ အဝင်၊ အထွက်တော့ မရှိသေးဘူး။ တံဆိပ်တုံးထုပေးဖို့ ဘာညာမြန်မာဘက်ခြမ်းက အဆင်သင့် မဖြစ်သေးဘူးတဲ့။ တရုတ်ဘက်ခြမ်းကတော့ အဆင်သင့် ဖြစ်နေပြီ"လို့ ပြောပါတယ်။
တရုတ်က ပြီးခဲ့တဲ့ နှစ်ဆန်းပိုင်းကတည်းက ဖွင့်ထားပြီး မြန်မာနိုင်ငံကလည်း ဖွင့်ထားပြီ ဖြစ်ပေမဲ့ လဝကအနေနဲ့ ဒီရက်ပိုင်းထဲ အဆင်သင့်ဖြစ်ပါက ပထမဆုံး လူ အဝင်/အထွက်ပဲ အရင် ခွင့်ပြု သွားဖို့ ရှိတယ်လို့လည်း ပြောပါတယ်။
လူဝင်၊ လူထွက်ခွင့်ပြုပြီးနောက် တဖြည်းဖြည်း ဒေသစိုက်ပျိုးထွက်ကုန်တွေလည်း အရောင်း အဝယ် ပြန်လုပ်နိုင်ဖို့နဲ့ ကုန်တင်ကားတွေစသဖြင့် ပြန်ဝင်/ထွက်နိုင်အောင် ဆောင်ရွက်သွားဖို့ ရှိတယ်လို့ သိရပါတယ်။
ပန်ဆိုင်းမြို့ခံ အမျိုးသမီး တဦးက"ဖွင့်ပြီ၊ ဆိုင်ကယ်တွေ ဘာတွေ ဝင်လို့ မရဘူး။ သူတို့ ကန့်သတ်ထားပြီးတော့ တရက် ဘယ်နှယောက် ဆိုတာမျိုးပဲ လုပ်ပေးထားသေးတယ်။ အခု ဝင်လို့ရတဲ့လူတွေလည်း ပန်ဆိုင်းမြို့နဲ့ တရုတ်နဲ့ နီးကပ်နေတဲ့ နယ်ခံ၊ ဒေသခံတွေပဲ ရသေးတယ်။" လို့ ဆိုပါတယ်။
နယ်စပ်ကုန်သည် လုပ်ငန်းရှင်တွေကလည်း ဂိတ်က ကြူကုတ် (ပန်ဆိုင်း) အပါအဝင် တရုတ် ဘက်က အားလုံးဖွင့်ထားပြီ ဖြစ်ပေမယ့် အခုက မြန်မာဘက်က အဆင်သင့်အဖြစ်သေးလို့ လို့ ဆိုပါတယ်။
ကိုဗစ်ကပ် ရောဂါကြောင့် ပိတ်ခဲ့တဲ့ မူဆယ်နယ်စပ် ဂိတ်ပေါက်တွေဖြစ်တဲ့ မန့်ဝိန်း - ကျယ်ဂေါင် ကုန်သွယ်ရာဂိတ်၊ နန်းတော် (အလယ်ပေါက်) - ကျယ်ဂေါင် နှစ်နိုင်ငံ လူဝင်လူထွက် ဂိတ်၊ ဆင်ဖြူ - ကျယ်ဂေါင်ဂိတ်တွေကို ပြီးခဲ့တဲ့ ဇန်နဝါရီလက နှစ်နိုင်ငံ အဝင်အထွက်ပြန်လည်ဖွင့်လှစ်ခဲ့တာ ဖြစ်ပါတယ်။
လက်ရှိမှာတော့ မူဆယ်မြို့နယ် အိမ်ထောင်စုစာရင်း ရှိသူတွေကိုသာ နယ်စပ်ဖြတ်ကျော်ခွင့် (Border Pass – BP) စာအုပ်အနီ ထုတ်ပေးတာဖြစ်ပြီး မူဆယ် မန့်ဝိန်း - ကျယ်ဂေါင် နှစ်နိုင်ငံ ကုန်သွယ်ရာဂိတ်ကနေ ၆ ဘီး ကုန်တင်ယာဉ် သီးသန့်၊ နန်းတော် - ကျယ်ဂေါင် နှစ်နိုင်ငံ အဝင်၊ အထွက်ဂိတ်ကနေ လူဝင်၊ လူထွက် သီးသန့်၊ ဆင်ဖြူ - ကျယ်ဂေါင် ဂိတ်ကနေ လူ၊ ဆိုင်ကယ်၊ သုံးဘီး၊ အိမ်စီးကားနဲ့ ယာဉ်ငယ်တွေ ဝင်ထွက်လို့ပါတယ်။
ကျင်းစန်းကျော့ - ဝမ်တိန် နှစ်နိုင်ငံ ကုန်သွယ်ရာဂိတ်ကနေတော့ ၈ ဘီး ကနေ တွဲကား ၂၂ ဘီး အထိ ဝင်ထွက်လို့ရပါတယ်။
