စက်သုံးဆီစျေးနှုန်း မြင့်တက်မှုကြောင့် ပြည်နယ်နဲ့တိုင်းဒေသကြီးအသီးသီးမှာရှိတဲ့ အဝေးပြေးယာဥ်လိုင်းတွေရဲ့ ကားလက်မှတ်ဈေးနှုန်း မြင့်တက်လာတယ်လို့ လက်မှတ်အရောင်းဌာနတွေဆီက သိရပါတယ်။

ရန်ကုန်-နေပြည်တော် ကားလက်မှတ်တွေမှာ ယခင်က ၁၅၀၀၀ ရှိရာမှ အခု ၁၈၀၀၀ မှ ၂၀၀၀၀ အထိ ဈေးတက်သွားခဲ့တယ်လို့ ဒဂုံဧရာအဝေးပြေးဝင်းကားလက်မှတ် အရောင်းဌာနတခုက ဒီဗွီဘီကို ပြောပါတယ်။

“အရင်က တစ်သောင်းခွဲပါ။ အခုက ကျမတို့ကား တစ်သောင်းရှစ်ထောင် ရှိတယ်၊ နှစ်သောင်း ရှိတယ်၊ သုံးထောင်လောက်တော့ တက်သွားတာပေါ့” လို့ ပြောပါတယ်။

မိုးကုတ်ကနေ ရန်ကုန်ကို ယခင်က ကားလက်မှတ်ဈေးနှုန်းမှာ လေးသောင်းခွဲရှိရာမှ ဒီကနေ့ ကားလက်မှတ်ဝယ်ရာမှာ ငါးသောင်းဖြစ်သွားတယ်လို့ ခရီးသည်တဦးက ဒီဗွီဘီကို ပြောပါတယ်။

“အရင်ရက်က ရန်ကုန်ကနေ မိုးကုတ်ကိုသွားတာ လေးသောင်းခွဲပဲပေးရတာ။ အခုအိမ်က တစ်ယောက်က လာမယ်ဆိုတော့ ငါးသောင်းဖြစ်နေပြီ၊ မြတ်မန္တလာထွန်းမှာ ငါးထောင် တက်သွားတယ်။”

မန္တလေးမှ ရန်ကုန်ကို အဝေးပြေးကားလက်မှတ်စျေးနှုန်းမှာ ပြီးခဲ့တဲ့ရက်က နှစ်သောင်းခွဲရှိရာမှ ဒီကနေ့ နှစ်သောင်းရှစ်ထောင်အထိ စျေးတက်သွားတယ်လို့ ကားလက်မှတ်အရောင်းဌာနတခုက ဒီဗွီဘီ ကိုပြောပါတယ်။

“အခုက ဆီစျေးတက်တော့ သုံးထောင်လောက် တက်သွားတယ်။ သူများတွေက တက်နေပြီ၊ ညီမတို့က အခုလာမဲ့ ၂၉ ရက်ကစပြီး တက်မှာ။”

လက်တလောမှာ ဒီဇယ်စျေးနှုန်းမြင့်တက်မှုမှာ ပြည်နယ် နဲ့ တိုင်းဒေသကြီးအသီးသီးမှာ ကွာခြားမှုများ ရှိတာကြောင့် ကားလက်မှတ်တွေ စျေးတက်ရတာလို့ အဝေးပြေးကားလက်မှတ်အရောင်းဌာနမှ တာဝန်ရှိသူတဦးက ဒီဗွီဘီကို ပြောပါတယ်။

“အခုဆီစျေးတွေက အကျမရှိဘူး၊ နေ့စဥ်တက်နေတော့ ခရီးသည်ကလည်း မရှိဘူး၊ လူမဲ့တန်ဆာလည်း မတင်ရဘူး။ အာ့ကြောင့် လက်မှတ်စျေးတက်ရတာပါ” လို့ ရှင်းပြပါတယ်။

ရန်ကုန်၊ နေပြည်တော်အပါအဝင် ပြည်နယ်နဲ့တိုင်းဒေသကြီးအသီးသီးရှိ ခရီးသွားကားလက်မှတ်တွေဟာ သုံးထောင်မှ ခြောက်ထောင်အထိ စျေးနှုန်းမြှင့်တက်လာတယ်လို့ ခရီးသွားလာသူတွေက ပြောပါတယ်။

စက်သုံးဆီသိုလှောင်ဖြန့်ဖြူးခြင်းလုပ်ငန်းများကြီးကြပ်ရေးကော်မတီရဲ့ ဒီကနေ့ထုတ်ပြန်တဲ့ စျေးနှုန်းများအရ ရိုးရိုးဓာတ်ဆီစျေးနှုန်းမှာ ရန်ကုန်မှာ တစ်လီတာ ၃၂၂၅ ကျပ်နဲ့ ဟားခါးမြို့မှာ ၃၅၄၀ အထိရှိပြီး ပရီမီယံဒီဇယ်စျေးနှုန်းမှာ ရန်ကုန်မှာ ၃၃၀၅ ကျပ်အထိရှိပြီး ဟားခါးမှာတော့ ၃၆၁၀ ကျပ်အထိ ရှိနေပါတယ်။

မြန်မာပြည်တွင်း စက်သုံးဆီဈေးတွေ အနည်းငယ်ကျဆင်းလာပေမဲ့ အခုရက်သတ္တပတ်အတွင်း   နေပြည်တော်- ရန်ကုန် အဝေးပြေးကားလက်မှတ်ခ‌တွေ  ကျပ်ငွေ ၁၀၀၀ လောက်အထိ ထပ်မံမြင့်တက်လာပါတယ်။

နေပြည်တော်ဝန်ကြီးဌာနတခုမှာ အလုပ်လုပ်နေတဲ့ ဝန်ထမ်း တစ်ဦးက" အရင်က ရန်ကုန်ကို အပတ်တိုင်းနီးပါး ပြန်ဖြစ်တယ်။ အဲ့ဒီတုန်းက နေပြည်တော်-ရန်ကုန် လက်မှတ်တစောင်ကို ၇၀၀၀/၈၀၀၀ ပဲရှိတယ်။ အခုတော့ ၁၇၀၀၀ ၊ အဲ့တာတောင် ရိုးရိုးကားပဲရတယ်။ VIP ဆို  နှစ်သောင်းကျော်၊ အခုတစ်ထောင်က ထပ်တက်သွားသေးတယ်။ ဆီဈေးနဲ့ မကိုက်လို့တော့ ပြောကြတာပဲ" လို့  ပြောပါတယ်။

ပြီးခဲ့တဲ့ ဇွန်လကုန်၊ ဇူလိုင်လဆန်းလောက်မှာ စက်သုံးဆီဈေးဟာ 92 တစ်လီတာကို ကျပ် ၂၂၀၀ ဝန်းကျင်ရှိခဲ့ပြီး အခုရက်ပိုင်းမှာတော့ ၁၈၀၀ ဝန်းကျင်သာရှိတော့တာပါ။ ဒါဟာ ဧပြီလနောက်ပိုင်း ပထမဆုံးအကြိမ်အဖြစ်စက်သုံးဆီဈေး ကျဆင်းခဲ့တာလည်း ဖြစ်ပါတယ်။

လယ်ဝေးမြို့နယ်က စက်သုံးဆီဆိုင်ဝန်ထမ်းတဦးက "အခုရက်ပိုင်းတော့ နည်းနည်းကျလာတယ်။ 92 ဆို တနေ့ကို  ၁၀၀ လောက် ကျတယ်။ 95 နဲ့ ပရီမီယံလည်း ကျတာပဲ။ ဒါပေပမဲ့ လိုသလောက်တော့ ဝယ်လို့ မရသေးဘူး။" လို့ ပြောပါတယ်။

အဝေးပြေးကားလက်မှတ်ခတွေဟာ ကိုဗစ်-၁၉ ရောဂါပိုးစတင်တွေ့ရှိတဲ့ ၂၀၁၉ ခုနှစ် နှစ်ကုန်ပိုင်းမှာ စတက်လာတာဖြစ်ပြီး အဆိုပါအချိန်တုန်းက  ခရီးသည်တယောက်ကို  ခုံနှစ်လုံးနှုန်းနဲ့ စီးနင်းလိုက်ပါရတာ ဖြစ်ပါတယ်။

အာဏာသိမ်းပြီးနောက် ခရီးသည်တယောက်ကို  ခုံတလုံးစီ ပြန်လည်သတ်မှတ်ခဲ့ပေမဲ့ စက်သုံး‌ဆီဈေးမြင့်တက်မှုနဲ့အတူ ကားလက်မှတ်ခ‌တွေလည်း မြင့်တက်ခဲ့တာဖြစ်ပါတယ်