စစ်အုပ်ချုပ်ရေး ကြေညာထားတဲ့ မွန်ပြည်နယ်၊ ရေးမြို့နယ်ကနေ ရေး-မော်လမြိုင်-ရန်ကုန်ကို ပြေးဆွဲနေတဲ့ မော်တော်ယာဥ်လိုင်းတွေ အရှုံးပေါ်ပြီး ဆက်လက်ရပ်တည်ဖို့ ခက်ခဲလာနေတယ်လို့ ယာဥ်လိုင်းဆွဲနေသူတွေက ပြောပါတယ်။

ကားသမားတဦးက “စစ်တပ်အာဏာသိမ်းပြီးတဲ့ ကာလအတွင်းမှာ စက်သုံးဆီစျေးတွေ တက်သွားတယ်။ ကားခပါ လိုက်တက်ပေမဲ့ အရင်ကလို ခရီးသည်တွေ အသွားအလာ သိပ်မရှိကြတော့ ကားစရိတ်တွေက မရကြတဲ့အခါ ဒေသထွက်ကုန်တွေ၊ ကုန်ပစ္စည်းနဲ့သာ နည်းနည်းပါးပါး ဆီဖိုးပြန်ရတာ။ ဘာမှမရတဲ့ကားဆို ကျပ်သိန်းချီ ရှုံးကြတယ်” လို့  ပြောပါတယ်။

ရေး-မော်လမြိုင် ခရီးစဥ်ကို ပြေးဆွဲနေတဲ့ ယာဥ်လိုင်းငယ်တွေမှာ ကားတွေ ဒါဇင်နဲ့ချီ ပြေးဆွဲနေပေမဲ့ ခရီးသည်မရတဲ့အတွက် ယာဥ်လိုင်းငယ်တွေ ဆက်လက်မပြေးဆွဲနိုင်တော့ဘဲ နေ့တိုင်းအရှုံးပေါ်နေကာ အလုပ်ပါရပ်နားထားရပြီး မိသားစုစားဝတ်နေရေးပါ ခက်ခဲလာကြတယ်လို့ ယာဥ်လိုင်းကို မှီခိုနေတဲ့သူတွေက ဆိုပါတယ်။

အရင်က ရေး-မော်လမြိုင်-ရန်ကုန် တိုက်ရိုက်ကားခရီးစဥ်တွေ နေ့ည အဝင်အထွက် ရှိနေပေမဲ့ စစ်အုပ်ချုပ်ရေး ထုတ်ပြန်ပြီးနောက်မှာ ခရီးသွားယာဥ်လိုင်းတွေ ပိုပြီး အကျပ်ရိုက်သွားစေခဲ့တယ်လို့ ခရီးသွားလုပ်ကိုင်နေသူတယောက်က ပြောပါတယ်။

ခရီးသွားတယောက်က “အခုချိန်က ကားလမ်းတွေမှာ ညဘက်တွေဆို သွားလာလို့ အရင်ကလို မလုံခြုံဘူး။ လမ်းခရီးတွေမှာလည်း စစ်တာဆေးတာ များတယ်။ ပစ်တာခတ်တာနဲ့ ဆုံရတဲ့အခါဆို လမ်းပိတ်ဆို့တာနဲ့ ကြုံရရင် အချိန်တွေက ကြန့်ကြာနေသလို အန္တရာယ်လည်းရှိကြတော့ အခုချိန်က အရေးကြီးကိစ္စကလွဲပြီး မသွားတာကောင်းပါတယ်” လို့ ပြောပါတယ်။

ရေး-မော်လမြိုင်-ရန်ကုန် ကားလမ်းမှာ စစ်ကောင်စီတပ်နဲ့ ဒေသကာကွယ်ရေးတပ်တွေ အကြား မကြာခဏ တိုက်ပွဲဖြစ်နေသလို စစ်ကောင်စီကားတွေလည်း မိုင်းဆွဲတိုက်ခိုက်တာ၊ ချုံခိုတိုက်ခိုက်တာတွေ အမြဲခံနေရတယ်လို့ ပြောပါတယ်။

မွန်ပြည်နယ်အတွင်းက အဝေးပြေးယာဉ်လိုင်းတွေဟာ စက်သုံးဈေးနှုန်း အဆမတန် မြင့်တက်လာတာ၊ ဆီဝယ်ယူဖို့ အခက်အခဲ ရှိနေတာကြောင့် ယာဉ်လိုင်း ပြေးဆွဲမှု အပြီးရပ်နားရမယ့် အခြေအနေနဲ့ ထပ်မံကြုံတွေ့လာရပါတယ်။ 

မွန်ပြည်နယ်မှာတော့ မော်လမြိုင်ကနေ တခြားတိုင်းနဲ့ပြည်နယ်တွေကို ပြေးဆွဲနေတဲ့ အဝေးပြေးယာဉ်လိုင်းပေါင်း ၇၃ လိုင်း ရှိနေတာပါ။ ဒါပေမဲ့ အဝေးပြေးယာဉ်လိုင်းတွေဟာ စက်သုံးဆီဈေးနှုန်း အဆမတန် မြင့်တက်လာ၊ ဆီဝယ်ယူဖို့ အခက်အခဲ ရှိနေတာကြောင့် ရပ်နားရမယ့် အခြေအနေနဲ့ ကြုံနေရတာပါ။

အဝေးပြေးယာဉ်လိုင်းတွေဟာ စစ်တပ် အာဏာသိမ်းပြီးနောက် ခရီးသည် ရရှိမှုနည်းပါးလာတာ၊ ကုန်ပစ္စည်း ရရှိမှု သိသိသာသာ ကျဆင်းလာတာ၊ စစ်ကောင်စီ စစ်ဆေးရေးဂိတ်တွေမှာ ငွေကြေး အဆမတန် တောင်းယူခံနေရတဲ့အတွက် အရှုံးနဲ့ ရင်ဆိုင်နေရတာ ဖြစ်ပါတယ်။

ဒါကြောင့် အဝေးပြေးယာဉ်လိုင်းတွေ ရင်ဆိုင်နေရတဲ့ အခက်အခဲကို စစ်ကောင်စီအနေနဲ့ လာမယ့် တလအတွင်း ဖြေရှင်းဆောင်ရွက်ပေးနိုင်တာ မရှိရင် ယာဉ်လိုင်းအများစု အပြီးပိုင် ရပ်နားလာနိုင်တယ်လို့ ယာဉ်လိုင်းလုပ်ငန်းရှင်တဦးက ပြောပါတယ်။

အဝေးပြေးယာဉ်လိုင်းတွေမှာ အဓိက အသုံးပြုနေတဲ့ ဒီဇယ်ဆီဈေးနှုန်းဟာ အခုဇွန်လ ပထမအပတ်အတွင်း တလီတာကို ကျပ် ၂၆၀၀ နီးပါးထိ ဈေးနှုန်း မြင့်တက်လာတာ ဖြစ်ပါတယ်။

လတ်တလောမှာတော့ စက်သုံးဆီဆိုင်တချို့မှာ ဆီအမျိုးအစား ပေါ်မူတည်ပြီး ပြတ်တောက်မှု ဖြစ်ပေါ်နေသလို တချို့ စက်သုံးဆီဆိုင်တွေမှာ ရောင်းချဖို့ ဆီလက်ကျန် မရှိတော့တဲ့အတွက် အရောင်းပိတ်ထားကြတာပါ။

အဝေးပြေးယာဉ်လိုင်း တာဝန်ခံ တဦးကတော့ စက်သုံးဆီဈေးနှုန်း အဆမတန် မြင့်တက်လာတာ၊ စစ်ကောင်စီရဲ့ ကန့်သတ်ချက်တွေကြောင့် ဆက်လက်တောင့်ခံနိုင်ခြင်း မရှိရင် ယာဉ်လိုင်း ပြေးဆွဲမှု ရပ်နားတော့မယ်လို့ ပြောပါတယ်။

အခက်အခဲမျိုးစုံ ရင်ဆိုင်နေရတဲ့ အဝေးပြေးယာဉ်လိုင်းဟာ အခုအခါမှာတော့ ကားအစီးအရေ အကန့်အသတ်နဲ့ ပြေးဆွဲလာကြတာသလို တချို့ယာဉ်လိုင်းတွေကတော့ ပိတ်သိမ်းဖို့ထိ စဉ်းစားလာကြတာပါ။

အဝေးပြေးယာဉ်လိုင်းတွေ ကားအစီးရေ အကန့်အသတ်နဲ့ ပြေးဆွဲလာတာကြောင့် ယာဉ်လိုင်းလုပ်ငန်းအပေါ် မှီခိုလုပ်ကိုင်နေတဲ့ အလုပ်သမား ထောင်နဲ့ချီပြီး မိသားစု စားဝတ်နေရေး အခက်အခဲကို အကြီးအကျယ် ရင်ဆိုင်လာရပါတယ်။