စစ်အာဏာသိမ်းပြီးနောက်ပိုင်း ပြန်လည်ဖွင့်လှစ်လာတဲ့ အဝေးသင်တက္ကသိုလ်တွေကို တက်ရောက်မယ့် ကျောင်းသားကျောင်းသူတွေဟာ ကျောင်းအပ်ရာမှာ ကိုယ်တိုင်ကိုယ်ကျ အပ်နှံတာထက် ပွဲစားနဲ့ အပ်နှံတာတွေပိုမိုပြုလုပ်လာပြီး  ကျောင်းအပ်ပေးနေတဲ့ ပွဲစားတွေထံက သိရပါတယ်။

စစ်အာဏာမသိမ်းခင်က ဖွင့်လှစ်တဲ့ အဝေးသင်တက္ကသိုလ်သင်တန်းတွေကို တက်ရောက်တဲ့ ကျောင်းသားကျောင်းသူတွေက ကျောင်းအပ်ချိန်မှာ ကိုယ်တိုင်ကိုယ်ကျ အပ်နှံတာများခဲ့ပေမဲ့ အာဏာသိမ်းပြီးနောက်ပိုင်း ဖွင့်လှစ်တဲ့ အဝေးသင်တက္ကသိုလ်သင်တန်းတွေကိုတော့ ပွဲစားတွေကနေတဆင့် ကျောင်းအပ်တာတွေ ပိုမိုပြုလုပ်လာပြီး ကျောင်းအပ်တဲ့ ဈေးကွက်ကလည်း ပိုမိုကျယ်ပြန့်လာတယ်လို့ ပွဲစားတွေကပြောပါတယ်။

အာဏာမသိမ်းခင်က အဝေးသင်တက္ကသိုလ် ကျောင်းအပ်ခတွေဟာ ကျပ် ၂၀၀၀၀ ဝန်းကျင်သာရှိခဲ့ပေမဲ့ အာဏာသိမ်းပြီးနောက်ပိုင်းပြန်လည်ဖွင့်လှစ်တဲ့ အဝေးသင်တက္ကသိုလ်ကျောင်းအပ်ခတွေကတော့ ကျပ် ၅၀၀၀၀ လောက်အထိမြင့်တက်ခဲ့ပြီး ကျောင်းအပ်ပေးတဲ့ ပွဲစားတွေကိုလည်း ကျပ် ၅၀၀၀၀ လောက်ထပ်မံပေးနေရတဲ့အတွက် အဝေးသင်တက္ကသိုလ် ကျောင်းအပ်ခဟာ ကျပ် ၁ သိန်းလောက်အထိ ကုန်ကျနေတယ်လို့လည်း သိရပါတယ်။

ဒါ့အပြင် စာစဉ်ဖြေဆိုတာတွေကိုလည်း ကိုယ်တိုင်မဖြေဆိုပဲ ကိုယ်စားဖြေဆိုခိုင်းစေတာတွေ လုပ်မယ်ဆိုပါက စာစဉ်ဖြေဆိုခအဖြစ် ကျပ် ၄၀၀၀၀ လောက် ပေါက်ဈေးရှိနေတယ်လို့လည်း သိရပါတယ်။

အခုနှစ်မှာ အဝေးသင်တက္ကသိုလ်တက်မယ်ဆိုရင် ဝိဇ္ဇာဘာသာတွဲအတွက် ကျောင်းအပ်ခ ကျပ် ၄၆၅၀၀ ကုန်ပြီး၊ သိပ္ပံဘာသာတွဲအတွက် ကျပ် ၄၇၀၀၀ လောက်ကုန်ကျမှာဖြစ်ပြီး ဇန်နဝါရီလ ၃၁ ရက်နေ့ နောက်ဆုံးထားကျောင်းအပ်ရမယ်လို့ အဝေးသင်တက္ကသိုလ်တွေက ကြေညာထား ပါတယ်။ 

အကြမ်းဖက်စစ်ကောင်စီလက်ထက်မှာ အဝေးသင်တက္ကသိုလ်တက်သူတွေဟာ ကျောင်းအပ်ခကို ကျပ် ၅၀၀၀၀ လောက်အထိကုန်ကျလာတယ်လို့  ကျောင်းသားကျောင်းသူတွေက ပြောပါတယ်။

အရင်တုန်းက အဝေးသင်တက္ကသိုလ်တက်ရောက်မယ့် ကျောင်းသားတွေဟာ ပို့ချချက်စာအုပ်ဖိုး အတွက် ကျပ် ၁၅၀၀၀၊ စာစဉ်မေးခွန်းဖိုးအတွက် ကျပ် ၂၅၀၊ မဂ္ဂဇင်းဖိုး ကျပ် ၂၀၀၀ နဲ့ ကျောင်းအပ်ခ၊ မှတ်ပုံတင်ကြေးတွေအတွက် စုစုပေါင်း ကျပ် ၂၀၀၀၀ ဝန်းကျင်သာကုန်ကျခဲ့ပါတယ်။

၂၀၂၃ ပညာသင်နှစ်ကို စစ်ကောင်စီလက်ထက်မှာ ဖွင့်လှစ်ချိန်မှာတော့ အဝေးသင် စာအုပ်စာတမ်းဖိုးနဲ့ သွင်းငွေတွေ အပြောင်းအလဲရှိလာသလို ကျောင်းအပ်ခတွေလည်း မြင့်တက်လာတယ်လို့   ကျောင်းသားကျောင်းသူတွေထံက သိရပါတယ်။

အခုအခါ အဝေးသင်ကျောင်းအပ်ပြီးတဲ့ ကျောင်းသားကျောင်းသူတွေအနေနဲ့ ပို့ချချက်စာအုပ်ဖိုးအတွက်  ကျပ် ၃၈၀၀၀၊ စာစဉ်မေးခွန်းဖိုး ကျပ် ၂၅၀၀၊ မဂ္ဂဇင်းဖိုး ကျပ် ၄၀၀၀ အထိ ရှိလာခဲ့ပြီး ကျောင်းအပ်ခနဲ့ မှတ်ပုံတင်ကြေးတွေကိုပါထည့်သွင်းတွက်ချက်မယ်ဆိုရင် ကျပ် ၅၀၀၀၀ လောက်အထိကုန်ကျခဲ့ရတယ်လို့ ကျောင်းသားကျောင်းသူတွေက ပြောပါတယ်။

ဒီအတွက် ပို့ချချက်စာအုပ်ဖိုးတွေဟာ ကျပ် ၂၃၀၀၀ အထိဈေးတက်ခဲ့သလို စာစဉ်ဖိုးကလည်း ကျပ် ၂၀၀၀ အထိဈေးတက်လာခဲ့ကာ  မဂ္ဂဇင်းဖိုးကတော့ ကျပ် ၂၀၀၀ လောက်ဈေးတက်သွားတာပါ။

အခုနှစ်မှာတော့  ၂၀၂၂ ခုနှစ် တက္ကသိုလ်ဝင်တန်းအောင်မြင်သူတွေအတွက် ပထမနှစ်အဝေးသင် သင်တန်း အပ်နှံရမယ့်ရက်ကို ဒီဇင်ဘာ ၂၆ ရက်ကနေ ၂၀၂၃ ခုနှစ် ဇန်နဝါရီ ၃၁ ရက်အထိ သတ်မှတ်ထားပြီး ၂၀၂၂ ခုနှစ်မတိုင်ခင် အောင်မြင်ခဲ့ သူတွေအတွက်ကတော့ ဒီဇင်ဘာ ၂၆ ရက်ကနေ ၂၀၂၃ ခုနှစ် ဖေဖော်ဝါရီ ၂၈ ရက်အထိ သတ်မှတ်ထားတယ်လို့ စစ်ကောင်စီပညာရေးဌာနက ကြေညာထားပြီး တက္ကသိုလ် ၄၂ ခုမှာ ကျောင်းအပ်လက်ခံမှာ ဖြစ်ပါတယ်။

စစ်အာဏာရှင်ပုံဖော်နေတဲ့ စစ်ကျွန်ပညာရေးကို သပိတ်မှောက်ပြီး တက္ကသိုလ် ဆက်မတက်ကြတဲ့ ကျောင်းသူ ကျောင်းသားတွေလည်း သိန်းနဲ့ချီရှိနေပါတယ်။