မန္တလေးတိုင်း၊ မိုးကုတ်မြို့မှာ ဖေဖော်ဝါရီ ၁ ရက် အသံတိတ်သပိတ်မှာ မြို့သူမြို့သား ပြည်သူအများစု ပူးပေါင်းပါဝင်ခဲ့ကြပြီး အောင်ချမ်းသာစျေးမှာ ပိတ်ထားတဲ့ စျေးဆိုင်တွေကို တရားစွဲမယ်လို့ စစ်ကောင်စီတပ်ဖွဲ့တွေက သေနတ်ထောက် ခြိမ်းခြောက်ကာ ဆိုင်တွေ ပြန်ဖွင့်ခိုင်းတယ်လို့ မြို့ခံတွေဆီက သိရပါတယ်။

အောင်ချမ်းသာစျေးက မိုးကုတ်မြို့မှာ အစည်ကားဆုံးစျေးတခုဖြစ်ပြီး ဒီနေ့ အသံတိတ်သပိတ်နေ့မှာ ဈေးသူဈေးသားတွေက ဆိုင်တွေပိတ်ထားပြီး ပူးပေါင်းပါဝင်ခဲ့ကြတယ်လို့ ရပ်ကွက်နေ ဒေသခံတဦးက ပြောပါတယ်။

“စျေးဆိုင်တွေက အကုန်ပိတ်တာ မနက်ကတည်းက။ ပိတ်ထားတဲ့ဆိုင်တွေကို ရဲတွေက သေနတ်ထောက်ပြီး ဆိုင်ဖွင့်ဆိုပြီး လာပြောတာ။”

မိုးကုတ်မြို့အရှေ့ပိုင်းနဲ့ အနောက်ပိုင်းမှာနေတဲ့ မိုးကုတ်မြို့ပြည်သူတွေလည်း ဒီနေ့ အပြင်မထွက်ဘဲ ပြည်လုံးကျွတ် အသံတိတ်သပိတ်မှာ ပူးပေါင်းပါဝင်ခဲ့ကြတယ်လို့ သိရပါတယ်။

မိုးကုတ်မြို့အနောက်ပိုင်း ရဲစခန်းမှာလည်း ဇန်နဝါရီ ၃၀ ရက်နဲ့ ၃၁ ရက် နှစ်ရက် ဖမ်းဆီးထားတဲ့ ဆိုင်ကယ်တွေကို မနက် ၁၀ နာရီက စတင်ထုတ်ပေးခဲ့တယ်လို့ သိရပါတယ်။

စစ်တပ်အာဏာသိမ်း ၂ နှစ်ပြည့် "တသံတည်းညီ၊ တချီတည်းရုန်း” ကြွေးကြော်သံနဲ့ ဒီကနေ့ ဖေဖော်ဝါရီ ၁ ရက်နေ့မှာ ပြုလုပ်တဲ့ တိတ်ဆိတ်ငြိမ်သက်ခြင်းသပိတ်ကို ရန်ကုန်မြို့က ပြည်သူအများစု ပူးပေါင်းပါဝင်ခဲ့ကြပြီး စစ်ကောင်စီတပ်တွေက ရန်ကုန်မြို့အနှံ့လုံခြုံရေးအင်အား အများအပြားနဲ့ တင်းကျပ်စစ်ဆေးနေတယ်လို့ ရန်ကုန်မြို့ခံတွေထံက သိရပါတယ်။

ရန်ကုန်လူထုက အသံတိတ်သပိတ်မှာ ပူးပေါင်းပါဝင်ခဲ့ကြပြီး ဒီနက်မိုးလင်းစအချိန်ကတည်းက ပုံမှန်သွားလာမှုထက် ပိုမိုလျော့နည်းခဲ့ကာ မနက် ၁၀ နာရီထိုးချိန်မှာတော့ လူသွားလူလာနဲ့ ယာဉ်အသွားအလာတွေဟာ တဖြည်းဖြည်းလျော့နည်းလာခဲ့ကာ တစထက်တစ လမ်းမတွေထက်မှာ တိတ်ဆိတ်သွားတာကို တွေ့ရှိရပါတယ်။

အသံတိတ်သပိတ်ပြုလုပ်မယ်ဆိုတာကြောင့် စစ်ကောင်စီဟာ ရန်ကုန်မြို့တော်ခမ်းမရှေ့မှာ တပ်ထောက်ခံပွဲကျင်းပဖို့စီစဉ်ထားရာမှာ ဒီကနေ့မနက် ရန်ကုန်မြို့တော်ခမ်းမရှေ့လမ်းကို ပိတ်ချကာ လုံခြုံရေးအင်အားအများအပြားနဲ့ တပ်ထောက်ခံပွဲကို နေ့စားခတိုးမြှင့်ပေးပြီး ပြုလုပ်ခဲ့ ပေမဲ့ လူအင်အားအနည်းငယ်သာ လာရောက်ကြပါတယ်။

ဒါ့အပြင် ရန်ကုန်မြို့အနှံ့ စစ်ကောင်စီတပ်တွေက DC ကားတွေနဲ့ မြို့အနှံ့ လှည့်ပတ်မောင်းနှင်နေသလို လမ်းဆုံလမ်းခွလိုနေရာတွေမှာလည်း တပ်အင်အားတွေချထားပြီး လုံခြုံရေးကို တင်းကျပ်ခဲ့ပါတယ်။

ဖေဖော်ဝါရီ ၁ ရက်နေ့ဟာ စစ်တပ်အာဏာသိမ်း ၂ နှစ်ပြည့်အနေနဲ့ ပြည်လုံးကျွတ် အသံတိတ်သပိတ်မှာပါဝင်ဖို့ တော်လှန်ရေးအင်အားစုတွေက လှုံ့ဆော်နေသလို ရန်ကုန်တိုင်း ဒလမြို့နယ်ထဲက အထက်တန်းကျောင်းတွေမှာ အဲဒီနေ့မှာ ကျောင်းမတက်ရင် ကျောင်းသားတွေကို အရေးယူမယ်လို့ စစ်ကောင်စီလက်အောက်ခံ ပညာရေးဝန်ထမ်းတွေက ကျောင်းသားတွေကို ဖိအားပေးနေတယ်လို့ ကျောင်းသားမိဘတွေက ပြောပါတယ်။

ဒလမြို့နယ်ထဲမှာရှိတဲ့ အခြေခံပညာကျောင်းနဲ့ အထက်တန်းကျောင်းတွေမှာ ပညာသင်ကြားနေတဲ့ ကျောင်းသားတွေကို ကျောင်းဆင်းခါနီးအချိန်မှာ သက်ဆိုင်ရာ ပညာရေးဝန်ထမ်းတွေကနေ ဖေဖော်ဝါရီ ၁ ရက်နေ့မှာ ကျောင်းကို မဖြစ်မနေလာကြဖို့နဲ့ မလာတဲ့ကျောင်းသားတွေကို ရုံးခန်းခေါ်ပြီး အရေးယူမယ်ဆိုပြီး ခြိမ်းခြောက် ပြောဆိုခဲ့တယ်လို့ ကျောင်းသားမိဘတွေက ဆိုပါတယ်။

ဒါ့အပြင် ဒလမြို့နယ်ထဲမှာရှိတဲ့ ဈေးဆိုင်ခန်းတွေကိုလည်း မပိတ်ဖို့ သက်ဆိုင်ရာ တာဝန်ရှိသူတွေက ဈေးဆိုင်ခန်းတွေကို ဖိအားပေးတာတွေရှိတယ်လို့ ပြောပါတယ်။

ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်က မဲမသမာမှုကို အကြောင်းပြပြီး စစ်တပ်က နိုင်ငံတော်အုပ်ချုပ်ရေးအာဏာ သိမ်းယူခဲ့တာ ၂၀၂၃ ခုနှစ် ဖေဖော်ဝါရီ ၁ ရက်နေ့မှာတော့ ၂ နှစ်ပြည့်ပြီ ဖြစ်ပါတယ်။

အာဏာသိမ်း ၂ နှစ်ပြည့်အနေနဲ့ အကြမ်းမဖက် လူထုလှုပ်ရှားမှုဖြစ်တဲ့ Silent Strike (အပြင်မထွက် ငြိမ်သက်တိတ်ဆိတ်ခြင်း သပိတ်) ကို မနက် ၁၀ နာရီကနေ ညနေ ၃ နာရီအတွင်း ပူးပေါင်းပါဝင်ကြဖို့ တော်လှန်ရေး သပိတ်အင်အားစုတွေက တိုက်တွန်းထားသလို အသံတိတ်သပိတ်ကို ဉာဏ်နဲ့ယှဉ်ပြီး လုံခြုံစွာ ဘေးအန္တရာယ်ကင်းကင်းနဲ့ ပါဝင်ပေးကြဖို့ ပြည်ထောင်စုဝန်ကြီး ဒေါက်တာဝင်းမြတ်အေးကလည်း ပြောကြားထားပါတယ်။

နိုင်ငံတကာ သတင်းစာမျက်နှာများ၌ မြန်မာပြည်တွင် ပေါ်ထွန်းစ ဒီမိုကရေစီစနစ်အား ရိုက်ချိုးဖျက်ဆီးခံလိုက်ရပြီး တနိုင်ငံလုံး ကြိမ်မီးအုန်းသလို ဒုက္ခပင်လယ်ဝေခဲ့ရသည့် ၂ နှစ်မြောက် အထိမ်းအမှတ်အဖြစ် ရှိလာနေချိန်တွင် ဒီမိုကရေစီ တိုက်ပွဲဝင်နေကြသော အင်အားစုများကလည်း အသံတိတ်သပိတ် ဆင်နွှဲရန် နံနက် ၁၀ နာရီမှ ညနေ ၃ နာရီအထိ အိမ်ပြင်မထွက်ကြရန် အထွေထွေသပိတ်ညှိနှိုင်းရေးကော်မတီမှ လှုံ့ဆော်လိုက်ပြီ ဖြစ်သည်။

၂၀၂၃ ခုနှစ်တွင် တော်လှန်ရေးကြီး အပြီးသတ်ဆင်နွှဲရန် စိုင်းပြင်းနေကြပြီဖြစ်၍ ယခုလို အသံတိတ်သပိတ်ကြီး ဆင်နွှဲခြင်းသည် လွန်စွာအရေးပါသော နောက်ထပ် ခြေလှမ်းကြီး ဖြစ်သည်။ မြန်မာ့အရေးအပေါ် စိတ်ဝင်စားမှု လျော့နည်းလာနေပြီဖြစ်သော နိုင်ငံတကာကလည်း မိမိတို့ မြန်မာပြည်သူများသည် စစ်အာဏာရှင်စနစ်ကို မဆုတ်မနစ် ဆက်လက်တိုက်ပွဲဝင်သွားမည်သာ ဖြစ်သည်ဟု ထုတ်ဖော်ပြသရာလည်း ရောက်ပေသည်။

၎င်းတို့လုပ်မည်ဟု ရည်ရွယ်ထားသော ရွေးကောက်ပွဲဆိုသည်ကိုလည်း ပြည်သူများက လက်မခံကြောင်း ထုံးတွေအဖွေးသားကြားမှ ထပ်မံပြသလိုက်ခြင်းလည်း ဖြစ်သည်။

နိုင်ငံတကာသည်လည်း စစ်အာဏာရှင်များသည် လက်နက်အားကိုးဖြင့်သာ သက်ဆိုးရှည်နေသူများဖြစ်ပြီး ယခုထိ တိုင်းပြည်ကို မည်သို့မျှ အုပ်ချုပ်နိုင်စွမ်းရှိသူများ မဟုတ်ဟု ထပ်၍ အတည်ပြုနိုင်ပြန်သဖြင့် အရှက်တကွဲ အကျိုးနည်းသွားစေမည့် ထိုးနှက်ချက်ကြီးလည်း ဖြစ်၍ ယခင် အသံတိတ်သပိတ်များထက် ပို၍ လေးနက်ပြီး အနှစ်သာရ ရှိနေသည်။ အထူးသဖြင့် တရုတ်သည်လက်ရှိအနေအထားတွင် စစ်အာဏာရှင်များဘက်မှ လိုလိုလားလား ထောက်ခံပြောဆိုမှု မရှိတော့၍ ထိုအနေအထားကို ပို၍ခိုင်မာအောင် အင်္ဂတေလောင်းပေးမည့် ပွဲလည်း ဖြစ်သည်။ အာဆီယံ၏ ဥက္ကဋ္ဌအသစ် ဖြစ်လာမည့် အင်ဒိုနီးရှားအားလည်း ပြတ်ပြတ်သားသား ဆန့်ကျင်သွားရန် မြန်မာပြည်သူများက mandate အခွင့်အာဏာ ပေးအပ်လိုက်သည့်ပွဲလည်း ဖြစ်သွားပေလိမ့်မည်။

စစ်အာဏာသိမ်းအဖွဲ့သည် ဇန်နဝါရီ ၃၁ ရက်နေ့တွင် ကာလုံ ဆိုသည်ကို တရားမဝင် ခေါ်ယူ ဆွေးနွေးကြမည်ဟု ဆုံးဖြတ်ထားသည်ဟု သတင်းများ ထွက်ပေါ်နေသည်။ မည်သို့ပင် ဆုံးဖြတ်ကြစေကာမူ ထွက်ပေါ်လာမည့်ရလဒ်သည် နိုင်ငံတကာနှင့် လူထုကို လှည့်ဖျားရန်သာ ဖြစ်၍ မည်သို့မျှ ထူးခြားမည် မဟုတ်သည့်အပြင် အခြေအနေများက အချိန်မရွေး ရုတ်ခြည်းဆိုသလို ပြောင်းလဲသွားနိုင်ပြန်၍ မိမိတို့ အိမ်တွင်းနေကြသည်သာ အကောင်းဆုံးဟု ယူဆ၍လည်း ရနေသည်။ ၎င်းတို့အား ထောက်ခံပါသည်ဆိုသော စီတန်းလှည့်လည်ပွဲများလည်း ရှိနေပြန်၍ ပြည်သူများကလည်း မိမိတို့လုပ်နိုင်သည့် ဘောင်အတွင်းမှ တန်ပြန် ဆန္ဒပြကြဖို့သာ ရှိပေတော့သည်။

ဒေါက်တာတေဇာဆန်းကလည်း အကြမ်းဖက် စစ်အုပ်စုမှ အာဏာသိမ်းကာ အရေးပေါ် အခြေအနေ ကြေညာထားခြင်းသည် ထိုနေ့တွင်ပင် မည်သို့မျှ ရှေ့ဆက်၍မရတော့ဘဲ ကုန်ဆုံးတော့မည်ဖြစ်၍ မည်သို့ပင် ထပ်မံလှည့်စားစေကာမူ ပြည်သူများက ဆက်လက်ဆန့်ကျင်သွားမည်သာ ဖြစ်သည်ဟု ထုတ်ဖော်ပြသရာရောက်သဖြင့် တနိုင်ငံလုံး တစိတ်တဝမ်းတည်း စည်းလုံးညီညွတ်စွာ ပါဝင်သွားကြဖို့ တိုက်တွန်း နှိုးဆော်ထားခဲ့သည်။

လက်ရှိအချိန်အထိ စစ်အာဏာရှင်စနစ်ကို ရိုက်ချိုးရန် တွန်းလှန်ရင်း ကျဆုံးသွားခဲ့သည့် ပြည်သူ ၂,၈၉၀ နှင့် ဖမ်းဆီးခံထားရသူ ၁၇,၄၀၀ ဦး ရှိနေပြီဖြစ်၍ ၎င်းတို့၏သွေးများ မြေခခဲ့ရသည်မှာ အလဟဿမဟုတ်၊ မိမိတို့ အမြဲတစေ အောက်မေ့ အမှတ်တရရှိနေကြောင်း ငါးနာရီခန့် အိမ်ထဲကအိမ်ပြင် မထွက်ကြဘဲ ပြသနိုင်ခွင့် ရရှိကြဦးမည်ဖြစ်သည် မဟုတ်ပါလား။

ပြည်သူတို့၏ ခုခံတွန်းလှန်စစ် မုချအောင်ရမည်!!!

လှစိုးဝေ