ပဲခူးတိုင်း၊ ပြည်ခရိုင်၊ ပေါင်းတည်မြို့နယ်မှာ စစ်ကောင်စီကျင်းပဖို့ စီစဉ်နေတဲ့ သင်္ကြန်ဗဟိုမဏ္ဍပ် မှာ ဧပြီ ၉ ရက် ဒီနေ့ မနက် ၅ နာရီလောက်က အသံဗုံး ပေါက်ကွဲမှုဖြစ်ပွားခဲ့တယ်လို့  မြို့ခံတွေက ပြောပါတယ်။

စစ်ကောင်စီက ဗဟိုမဏ္ဍပ်ကို ပေါင်းတည်မြို့၊ စျေး ၂ ရပ်ကွက် ဘုရားကြီးလမ်းပေါ်မှာ တည်ဆောက်ထားပြီး ပေါက်ကွဲကြောင့် လူတွေထိခိုက်တာမရှိပေမဲ့  စစ်ကောင်စီတပ်တွေက လမ်းပိတ်ပြီး စစ်ဆေးနေတယ်လို့လည်းသိရပါတယ်။

ပေါင်းတည်မြို့ဈေးကြီးအနီးနေသူတယောက်က ''မနက်အစောကြီးက အိပ်ရာထဲကနေကြားရတာ အသံကအကျယ်ကြီးပဲ။ ကြားကြားချင်း အသံကြားတဲ့ဘက်ကို သွားကြည့်ဖို့လုပ်တော့မှ အဲ့ဒီဘက်က ပြန်လာတဲ့ သူတယောက်က မသွားနဲ့  ဗဟိုမဏ္ဍပ်မှာဖြစ်တာ၊ အခုလမ်း ဟိုဘက်ထိပ် ဒီဘက်ထိပ် ပိတ်ထားလိုက်ပြီ။ သွားရင် အစစ်အဆေးခံနေရမယ်လို့ပြောတာနဲ့  သွားမကြည့်ရဲတော့တာ” လို့ ပြောပါတယ်။

ဒီပေါက်ကွဲမှုနဲ့ ပတ်သက်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ နွေဦးပကဖ အဖွဲ့ကတော့  အသံမိုင်းခွဲပြီး သတိပေးလိုက်တာဖြစ်တယ်လို့ သူတို့ရဲ့ လူမှုကွန်ရက်စာမျက်နှာမှာ ဖော်ပြထားပါတယ်။

ပြည်သူ့ကာကွယ်ရေး PPDF တပ်ရင်း (၃၆၀၁) ရဲ့ သတင်းပြန်ကြားရေးတာဝန်ခံ “မနှစ်ကလည်းဗုံးခွဲပြီး သတိပေးခဲ့သေးတယ်။ အခုလည်း အသံဗုံးနဲ့ ပထမအကြိမ် သတိပေးတဲ့အနေနဲ့ ခွဲလိုက်တာပါ။ ဒီဗုံးမျိုးက လူမထိခိုက်ပါဘူး။ ဒါပေမဲ့ သူတို့ အဲ့ဒိအလုပ်တွေကို မရပ်တံ့ဘူးဆိုရင်တော့ နောင်ဖြစ်လာမယ့် အရေးယူမှုတွေအတွက် တာဝန်မယူဘူး၊ ပြည်သူတွေ ပျော်ချင်ရင် ကိုယ့်အိမ်မှာပဲကိုပျော်ကြဖို့၊ သူတို့နဲ့သွားပြီး မပူးပေါင်းကြဖို့ ထပ်မံမေတ္တာရပ်ခံ တိုက်တွန်းပါတယ်”လို့ ပြောပါတယ်။

သင်္ကြန်ပွဲတော်စည်စည်ကားကားဖြစ်မြောက်ဖို့ စစ်ကောင်စီက နည်းလမ်းပေါင်းစုံနဲ့ စီစဉ်နေရာမှာ  ကံစမ်းမဲလက်မှတ်တွေရောင်းပြီး အတင်းအကျပ် အလှူငွေကောက်ခံနေတယ်လို့ လည်းဆိုပါတယ်။

"စစ်ကောင်စီက သင်္ကြန်ပွဲတော်ဖြစ်မြောက်ရေးအတွက် ကံစမ်းမဲလက်မှတ်တွေ အတင်းရောင်းတယ်။ အဲ့ဒါတွေကို စစ်ကောင်စီလက်အောက်ခံထွေအုပ်စာရေးတွေ၊ ရပ်/ ကျေးအုပ်ချုပ်ရေးမှူးတွေကနေ လောင်းကစားဒိုင်တွေ၊ သစ်မှောင်ခိုသမားတွေ၊ စီးပွားရေး လုပ်ငန်းရှင်တွေကို အတင်းရောင်းတယ်။ အလှူငွေကြေးတွေ အတင်းကောက်ပြီး သူတို့  သင်္ကြန်ကို စည်အောင်လုပ်နေကြတာ”လို့ ပြည်သူ့ကာကွယ်ရေး PPDF တပ်ရင်း (၃၆၀၁) ရဲ့ သတင်းပြန်ကြားရေးတာဝန်ခံက ပြောပါတယ်။ 

ပြီးခဲ့တဲ့နှစ်ကလည်း ပေါင်းတည်မြို့က ဗဟိုမဏ္ဍပ်အနီးမှာ ဒေသခံ ပြည်သူ့ကာကွယ်ရေးတပ်ဖွဲ့က ဗုံးခွဲသတိပေးခဲ့သလို၊ မဏ္ဍပ်ပေါ်မှာ အရက်ထိုင်သောက်နေတဲ့ လုံခြုံရေးစစ်သားတွေကိုလည်း လူငယ်တွေက  အရက်ပုလင်းခွံနဲ့ပစ်ပေါက်ခဲ့ကြပါတယ်။

သင်္ကြန်နောက်ဆုံးနေ့မှာလည်း  ဗဟိုမဏ္ဍပ်အနီး ဘုရားကြီးလမ်းနဲ့ ရန်ကုန်လမ်းထောင့်အလွန်မှာ ဗုံးပေါက်ကွဲခဲ့တဲ့အတွက် ရေလာပက်တဲ့   အမျိုးသမီးတဦး သေဆုံးခဲ့ပါတယ်။

ကရင်ပြည်နယ်၊ ဘားအံမြို့မှာ လုံခြုံရေးတင်းကျပ်ထားတဲ့ကြားက အမှတ် ၃ ရပ်ကွက် အုပ်ချုပ်ရေးမှူးရုံးမှာ ဖေဖော်ဝါရီ ၁၀ ရက် မနက် ၆ နာရီလောက်က အသံဗုံး ၂ လုံးဆက်တိုက်ပေါက်ကွဲခဲ့တယ်လို့ မြို့ခံပြည်သူတွေက ပြောပါတယ်။

ဇန်နဝါရီလနောက်ဆုံးပတ်ကစတင်ပြီး ဘားအံမြို့အထိ မြို့တွင်းတိုက်ပွဲတွေဆင်နွှဲလာမယ်ဆိုတဲ့ သတင်းတွေ ထွက်ပေါ်လာပြီးနောက် စစ်ကောင်စီက  မြို့ဝင်မြို့ထွက်လုံခြုံရေးတင်းကျပ်ထားသလို လူစည်းကားရာနေရာနဲ့ လမ်းဆုံလမ်းဂွတွေကို CCTV ကနေ စောင့်ကြည့်နေတဲ့ကြားက ဗုံးပေါက်ကွဲမှု ဖြစ်ပွားခဲ့တာပါ။

ဗုံးပေါက်ကွဲခဲ့တဲ့ အမှတ် ၃ အုပ်ချုပ်ရေးမှူးနဲ့အဖွဲ့ဟာ စစ်ကောင်စီနဲ့ပူးပေါင်းပြီး ဧည့်စာရင်းစစ်ဆေးတာ၊ စစ်ကောင်စီကပြုလုပ်မယ့် ရွေးကောက်ပွဲအတွက် ပူးပေါင်းကူညီနေတာတွေနဲ့ ရပ်ကွက်ပြည်သူတွေ ဧည့်စာရင်းတိုင်ကြားရာမှာ ခြိမ်းခြောက် အနိုင်ကျင့်ပြီး အတင်းအဓမ္မငွေတောင်းယူတာတွေလည်း ရှိတယ်လို့ ရပ်ကွက်ပြည်သူတွေက ပြောပါတယ်။

ရပ်ကွက်ပြည်သူတစ်ဦးက"‌ဗုံးပေါက်ကွဲတာ အသံအကျယ်ကြီးပဲ။ အိမ်တောင်တုန်တယ်။ မနက်အစောကြီးပဲ လူတွေသွားသွားလာလာမရှိချိန် ပေါက်ကွဲတာ။ လူတွေ ထိခိုက်တာမရှိဘူး။ ဗုံးခွဲပြီး အုပ်ကြီးကို သတိပေးတာဖြစ်မယ်။ ရပ်ကွက်ရုံးက နာမည်ဆိုးတွေထွက်နေတာ ကြာပြီ"လို့ ဆိုပါတယ်။

ဘားအံမြို့မှာ လုံခြုံရေးအကြောင်းပြချက်နဲ့ ကား၊ ဆိုင်ကယ်နဲ့ လူတွေကို တားဆီးစစ်ဆေးရာမှာ လူငယ်တွေကို ပစ်မှတ်ထားပြီး အဓိကစစ်ဆေးနေတာဖြစ်ပြီး မတရားဖမ်းဆီးခံရာတာတွေလည်း ရှိနေပါတယ်။

ပြီးခဲ့တဲ့ ဇန်နဝါရီ ၂၇ ရက် ည ၇ နာရီလောက်က ဘားအံမြို့နယ်၊ သာမည(ဘေးမဲ့သာသနာ့နယ်မြေ)ကျေးရွာမှာ  စစ်ကောင်စီခန့် အုပ်ချုပ်ရေးမှူး ဦးအောင်မြင့်မြတ်ကို အမည်မသိလက်နက်ကိုင် ၃ ဦးက နေအိမ်ရှေ့မှာ သေနတ်နဲ့ပစ်သတ်ခဲ့ပါတယ်။