အာဂျင်တီးနား ဒုသမ္မတ ခရစ္စတီးနား ဖာနန်ဒက်ဇ် ဒီခါရ်ချနာကို စက်တင်ဘာ ၁ ရက် နှောင်းပိုင်းမှာ အမျိုးသား တဦးက သေနတ်နဲ့ ခြိမ်းခြောက်ခဲ့ပြီး ဒါဟာ လုပ်ကြံသတ်ဖြတ်ဖို့ ကြိုးပမ်းမှု လို့ အစိုးရတာဝန်ရှိသူ တယောက်က ပြောပါတယ်။
ဒုသမ္မတကို ထိခိုက်မှု မရှိခဲ့ကြောင်းနဲ့ ပစ်ခတ်မှု မဖြစ်ပွားခဲ့ကြောင်း တာဝန်ရှိသူတွေက ပြောကြားခဲ့ပါတယ်။
အခုဖြစ်ရပ်ဟာ ဒုသမ္မတရဲ့ ဗြူနိုအေရီးစ်က နေအိမ်အဝင်ဝမှာ ဖြစ်ပွားခဲ့တာဖြစ်ပြီး အဲဒီနေရာမှာ မကြာသေးမီရက်ပိုင်းကပဲ အကျင့်ပျက်ခြစားမှုဆိုင်ရာ တရားစီရင်မှုကို ရင်ဆိုင်နေရတဲ့ သမ္မတဟောင်းကိုထောက်ခံသူ ရာနဲ့ချီပြီး စုဝေးဆန္ဒပြခဲ့ကြပါသေးတယ်။
လက်နက်ကိုင် အမျိုးသား တဦးကို နေအိမ်အနီးမှာ ဖမ်းဆီးထားကြောင်း ရဲပြောရေးဆိုခွင့် ရှိသူ တဦးက ရိုက်တာသတင်းဌာနကို ပြောကြားခဲ့ပြီး အဲဒီ သံသယရှိသူမှာ ဘရာဇီးနိုင်ငံသား ဖြစ်ကြောင်း သိရပါတယ်။
လူအုပ်အလယ်မှာ ဒုသမ္မတ ဖာနန်ဒက်ဇ်ကို သေနတ်နဲ့ ချိန်ရွယ်ခဲ့ပြီးနောက် သေနတ်နဲ့ ပစ်ခတ်ခြင်းတော့ မရှိကြောင်း ရုပ်မြင်သံကြားမှာ ပြသပါတယ်။
အဲဒီသူဟာ လူလတ်ပိုင်းအရွယ်လောက်ဖြစ်ပုံရကြောင်း မီဒီယာတွေက ပြောပါတယ်။
သေနတ်ဟာ ကျည်ဖြည့်ထားတယ်လို့ တရားဝင်သတင်းရင်းမြစ်တွေကို ကိုးကားပြီး Clarin သတင်းစာက ဖော်ပြပါတယ်။
ဒါကို Reuters က သီးခြား အတည်မပြုနိုင်ပါဘူး။
အစိုးရနဲ့ အတိုက်အခံခေါင်းဆောင်တွေအပြင် တခြားသော လက်တင်အမေရိကနိုင်ငံတွေက နိုင်ငံရေးသမားတွေကတော့ ဖာနန်ဒက်ဇ် ဒီခါရ်ချနာ နဲ့ တစည်းတလုံးတည်း ရှိနေကြောင်း ဖော်ပြခဲ့ကြပါတယ်။
