ဒိုင်နိုဆောတွေနဲ့အတူ ပူးတွဲနေထိုင်ခဲ့ဖူးတဲ့ ၉ မီတာရှည်တဲ့ ပုတ်သင်ပျံအမျိုးအစားအသစ် ပီတေရိုဆောတကောင်ရဲ့ ရုပ်ကြွင်းကို အာဂျင်တီးနားနိုင်ငံက သုတေသီတွေ ရှာတွေ့ခဲ့ကြပါတယ်။
လွန်ခဲ့တဲ့ နှစ်ပေါင်း ၈၆ သန်းက ရှိခဲ့တဲ့ အနည်ကျ ကျောက်လွှာတွေထဲမှာ သူ့ရုပ်ကြွင်းကို ရှေးဟောင်းသုတေသန အဖွဲ့ဝင်တွေက ရှာတွေ့ခဲ့တာပါ။
အင်ဒီးစ်တောင်တန်းဒေသနိုင်ငံဖြစ်တဲ့ အာဂျင်တီးနားနိုင်ငံရဲ့မြို့တော် ဗျူးနော့စ် အေးရီးစ်ကနေ ကီလိုမီတာ ၁,၀၀၀ အကွာ မန်ဒိုဇာပြည်နယ်ထဲမှာ တွေ့ခဲ့တာပါ။
"ကျနော်တို့ မြင်နိုင်သမျှ စရိုက်လက္ခဏာ အားလုံးထဲမှာ အများအပြားက အသစ်တွေချည်းပဲ။ ကမ္ဘာတဝန်း ဘယ် ပီတေရိုဆောအမျိုးအစားအတွက်ကိုမှ မှတ်တမ်းမတင်ရသေးဘူး၊ ဒါကြောင့် သူ့ကို မျိုးရင်းနာမည်အသစ်ရော မျိုးစိတ်နာမည်အသစ်ပါ ပေးမယ်" လို့ သုတေသန စီမံကိန်းခေါင်းဆောင် လီယိုနာဒို အော်တစ်ဇ် ဒေးဗစ်က ရိုက်တာသတင်းဌာနကို ပြောပါတယ်။
အခုတွေ့တဲ့ ရုပ်ကြွင်းဟာ တောင်အမေရိကဒေသမှာ အကြီးဆုံးနဲ့ ကမ္ဘာပေါ်မှာ အကြီးဆုံးတွေထဲက တခုလည်း ဖြစ်တယ်လို့ သုတေသီတွေက ပြောပါတယ်။
ဒီသတ္တဝါဟာ ငှက်တွေထက် အများကြီး ပိုစောပြီး တက်တက်ကြွကြွ တိုက်ခိုက်ဖို့ စွမ်းရည်ရှိတဲ့ ပထမဆုံး ကျောရိုးရှိသတ္တဝါလို့လည်း ဒေးဗစ်က ပြောပါတယ်။
မျိုးစိတ်သစ်နဲ့ပတ်သက်တဲ့ စာတမ်းကို ဂုဏ်သိက္ခာရှိတဲ့ သိပ္ပံဂျာနယ် Cretaceous Research မှာ ပုံနှိပ် ဖြန့်ချိခဲ့ပါတယ်။
