ပြီးခဲ့တဲ့နှစ် မတ်လ ၃ ရက်နေ့က မုံရွာမြို့၊ ဘုရားနီလမ်း (အာဇာနည်လမ်း)မှာ စစ်ကောင်စီရဲ့ ပစ်ခတ်မှုကြောင့် ကဗျာဆရာကေဇဝင်း အပါအဝင် ကျဆုံးခဲ့သူ ၉ ဦးရဲ့ ဂူဗိမာန် အုတ်ဂူတွေကို စစ်ကောင်စီက လာရောက်ဖြိုဖျက်သွားတယ်လို့ ဒေသခံတွေက ပြောပါတယ်။
ဆားကျင်းသုသာန်မှာရှိတဲ့ ဂူဗိမာန်တွေကို မတ်လ ၅ ရက်နေ့ နေ့လယ်ပိုင်းက လာရောက် ဖြိုဖျက်ခဲ့ကြတာဖြစ်ပြီး ပြန်လည်ထွက်ခွာတဲ့အချိန်မှာ သေနတ်တွေပါ ပစ်ဖောက်သွားတယ်လို့ ဆိုပါတယ်။
အခုလို ဆောင်ရွက်ခဲ့တာနဲ့ ပတ်သက်လို့ သမိုင်းဝင်အာဇာနည်တွေကို သမိုင်းကနေ ပျောက်ကွယ်အောင် လုပ်နေတဲ့လုပ်ရပ်သာဖြစ်ပြီး ပြည်သူတွေအနေနဲ့ သွေးမအေးဖို့နဲ့ စစ်ကောင်စီကို အမြစ်ဖြတ်ပြီး ဆက်လက်တော်လှန်ပေးဖို့ကို မုံရွာတက္ကသိုလ်ကျောင်းသားများ သမဂ္ဂက ထုတ်ပြန်ထားပါတယ်။
စစ်ကိုင်းတိုင်း မုံရွာမြို့ အာဇာနည်လမ်းမှာ ဇန်နဝါရီ ၅ ရက်နေ့က မိုင်းလာရှာတဲ့ စစ်ကောင်စီတပ်ဖွဲ့ဝင်တွေ မိုင်းဆွဲခံရပြီး ၅ ယောက် သေဆုံးသွားတယ်လို့ သိရပါတယ်။
စစ်ကောင်စီတပ်ဖွဲ့ဝင်တွေဟာ မိုင်းထောင်ထားကြောင်း သတင်းရရှိတာကြောင့် လာရှာရင်း အခုလို မိုင်းဆွဲခံရတာလို့ မျက်မြင် ဒေသခံတစ်ဦးက ပြောပါတယ်။
“သတင်းရလို့ လာရှာတာလို့ သိရတယ်။ ကျနော်လည်း လမ်းဖြတ်မလို့ အသွား မိုင်းထကွဲတာ။ စစ်သား ၅ ယောက် အဲ့နေရာတင် ပွဲချင်းပြီးသေတာ မြင်ခဲ့ရတယ်။ ဒဏ်ရာရသူတွေလည်း ရှိတယ်။”
မိုင်းပေါက်ကွဲပြီးနောက် စစ်ကောင်စီတပ်ဖွဲ့ဝင်တွေက ရမ်းသမ်းပစ်ခတ်တာတွေပြုလုပ်ခဲ့ပြီး လမ်းသွားလမ်းလာတွေကို စစ်ဆေးတာတွေပြုလုပ်ခဲ့သလို ပတ်ဝန်းကျင်က အပြစ်မဲ့ပြည်သူတချို့ကိုလည်း ဖမ်းဆီးခဲ့တယ်လို့ သိရပါတယ်။
အခုလို မိုင်းဆွဲတိုက်ခိုက်မှုကိုတော့ မြို့ပြပြောက်ကျားတပ်ဖွဲ့တစ်ခုဖြစ်တဲ့ DRPA အဖွဲ့က လုပ်ဆောင်ခဲ့တာလို့ အဖွဲ့ဝင်တွေက ပြောပါတယ်။
မုံရွာမြို့ အာဇာနည်လမ်းမှာ ပြီးခဲ့တဲ့ ဧပြီလက စစ်အာဏာသိမ်းမှုကို ဆန့်ကျင ဆန္ဒထုတ်ဖော်သူတွေကို စစ်ကောင်စီလုံခြုံရေးတပ်ဖွဲ့ဝင်တွေ ပစ်ခတ်ခဲ့တာကြောင့် ပြည်သူ ၉ ဦး ကျဆုံးခဲ့ဖူးပါတယ်။
