close

အာဖဂန်နစ္စတန်နိုင်ငံ

close

May 2, 2022

အာဖဂန်နစ္စတန်နိုင်ငံအတွက် အမေရိကန် ကတိမတည်ခဲ့ဟု နိုင်ငံရေးသုံးသပ်သူ ပြော

အမေရိကန်စစ်တပ်ဟာ အာဖဂန်နစ္စတန်နိုင်ငံမှာ ငြိမ်းချမ်းရေးကို မဖြစ်စေဘဲ ဒုက္ခပင်လယ်ဝေစေ တယ်လို့ နိုင်ငံရေးလေ့လာသုံးသပ်သူတယောက်က ပြောပါတယ်။ 

ငြိမ်းချမ်းရေး ရအောင် လုပ်ပေးမယ်၊ အစိုးရကောင်းကောင်းရအောင် လုပ်ပေးမယ်၊ ဒီမိုကရေစီရအောင် လုပ်ပေးမယ်လို့ ကတိပေးခဲ့ပေမယ့် ဒါတွေ တခုမှ ဖြစ်မလာဘူးလို့ နိုင်ငံရေးလေ့လာသုံးသပ်သူ ဆာအိ ဂျဝက် ဟိုစနီက ဝေဖန်လိုက်တာပါ။ 

မွတ်စလင်တွေရဲ့ အိဒ်ကာလ အားလပ်ရက် မတိုင်ခင်မှာ နိုင်ငံအနှံ့ ဗုံးကွဲမှုတွေ ဆက်တိုက်ဖြစ်နေတဲ့အပေါ် အခုလို သုံးသပ်ပြောဆိုလိုက်တာပါ။ 

ကဘူးလ်မြို့မှာ ဧပြီ ၂၉ နဲ့ ၃၀ ရက်နေ့တွေက ဗုံးကွဲမှု နှစ်ကြိမ်ဖြစ်ခဲ့ပြီး အနည်းဆုံး ၁၀ ယောက်သေဆုံး၊ ၂၀ ဒဏ်ရာရခဲ့ပါတယ်။ 

ဘယ်အဖွဲ့ကမှ သူတို့ လက်ချက်လို့ မကြေညာခဲ့ပေမယ့် အရပ်သားတွေကို ပစ်မှတ်ထား တိုက်ခိုက်ပုံရတဲ့အတွက် ပြည်သူတွေဟာ ပျော်ရမယ့် အချိန်မှာတောင် ကျီးလန့်စာစား ဖြစ်နေကြတာပါ။

ဒါကြောင့် အမေရိကန်စစ်တပ်ဟာ အာဖဂန်ပြည်သူတွေအတွက် ဒုက္ခသည်တွေကို ယူဆောင်လာခဲ့တယ်လို့ ဆာအိ ဂျဝက် ဟိုစနီက ပြောပါတယ်။

ဧပြေ ၁၉ ရက်နေ့တုန်းကလည်း မြို့တော် ကဘူးလ်မှာ ရှိတဲ့အထက်တန်းကျောင်းမှာ ဗုံးပေါက်ကွဲပြီး အနည်းဆုံး လူ ၆ ယောက်သေဆုံးပြီး ဒဏ်ရာရသူတွေလည်း ရှိခဲ့ပါတယ်။

16 mins Ago

February 17, 2020

အမေရိကန်-တာလီဘန် ဆွေးနွေးပွဲ အာဖဂန်နိုင်ငံတွင်း အကြမ်းဖက်မှုများ လျှော့ချနိုင်မည်ဟု ကုလမျှော်လင့်

အမေရိကန်နဲ့ တာလီဘန်တွေကြား ဆွေးနွေးပွဲတွေဟာ အာဖဂန်နစ္စတန်နိုင်ငံအတွင်း အကြမ်းဖက်မှုတွေ လျှော့ချရေး ဦးတည်နိုင်ပြီး ဒုက္ခသည်တွေ နေအိမ်ကို ငြိမ်းငြိမ်းချမ်းချမ်း ပြန်သွားနိုင်ဖို့ မျှော်လင့်တယ်လို့ ကုလသမဂ္ဂအတွင်းရေးမှူးချုပ် အန်တိုနီယို ဂုတားရဲ့စ်က ဖေဖော်ဝါရီ ၁၆ ရက်မှာ ပြောလိုက်ပါတယ်။ ရေရှည်တည်မြဲတဲ့ နိုင်ငံရေးအခြေကျမှုနဲ့၊ အမြဲတမ်း အပစ်အခတ်ရပ်စဲရေးကို ဦးတည်စေမယ့် ငြိမ်းချမ်းရေးလုပ်ငန်းစဉ်အတွက် ယုံကြည်မှုတည်ဆောက်ရာမှာ အကြမ်းဖက်မှု လျှော့ချရေးက အရေးကြီးတယ်လို့ ပါကစ္စတန် နိုင်ငံခြားရေးဝန်ကြီး ရှားမာမွတ် ကူရေးရှီးက ပါကစ္စတန် မြို့တော် အစ္စလာမ်မာဘတ်မှာ ကျင်းပတဲ့ ပူးတွဲသတင်းစာရှင်းလင်းပွဲအတွင်း ပြောပါတယ်။ အကြမ်းဖက်မှု လျှော့ချရေး သီတင်းတပတ်ကြာ အစည်းအဝေးအပြီး ဖေဖော်ဝါရီ ၁၄ ရက်မှာ အမေရိကန်အစိုးရဟာ တာလီဘန်တွေနဲ့ သဘောတူညီချက် ရခဲ့ပါတယ်။ ဒါဟာ အာဖဂန်နစ္စတန်ကနေ အမေရိကန်တပ်တွေ ပြန်ရုပ်သိမ်းရေးအတွက် ဒီလကုန်မှာ သဘောတူစာချုပ်ချုပ်နိုင်ဖို့ လမ်းကြောင်းဖော်တာလဲ ဖြစ်ပါတယ်။ ဒါဟာ အမေရိကန်သမ္မတ ဒေါ်နယ်ထရမ့်အတွက် ကာလကြာရှည် ကြိုးစားခဲ့တဲ့ ရည်မှန်းချက်တွေထဲက တရပ်လည်း ဖြစ်ပါတယ်။  
2 years Ago
Up