ရုရှားစွမ်းအင် ပြည်ပတင်ပို့ရေးဟာ အာဖရိကနဲ့ လက်တင်အမေရိကဘက်ကို လမ်းကြောင်း ပြောင်းသင့်တယ်လို့ ရုရှားသမ္မတ ဗလာဒီမာ ပူတင်က ဧပြီ ၁၄ ရက်မှာ ပြောလိုက်ပါတယ်။
အနောက်နဲ့အရှေ့ ဆိုက်ဘေးရီးယားက ရေနံမြေတွေဆီကနေ သွယ်ယူတဲ့ ရေနံနဲ့ဓာတ်ငွေ့ ပိုက်လိုင်းအသစ်တွေ တည်ဆောက်ရေး စဉ်းစားသင့်တယ်လို့လည်း ပူတင်က ပြောပါတယ်။
ကားပိုင်ရှင်တွေ၊ သယ်ယူပို့ဆောင်ရေး ကုမ္ပဏီတွေနဲ့ စိုက်ပျိုးရေးလုပ်ငန်းတွေ အပါအဝင် ပြည်တွင်း စားသုံးသူတွေရဲ့ လောင်စာဝယ်လိုအား ပြည့်မီစေဖို့ကိုလည်း ပူတင်က အဆိုပြု ပြောဆိုခဲ့ပါတယ်။
ရထားလမ်းတွေ၊ ပိုက်လိုင်းတွေ၊ ဆိပ်ကမ်းတွေစတဲ့ အခြေခံအဆောက်အဦဆိုင်ရာ စီမံကိန်း တွေကို အရှိန်မြှင့်လုပ်ဆောင်ဖို့ လိုပြီး ဒါမှ လာမယ့်နှစ်အနည်းငယ်အတွင်း အနောက်ဘက်ဆီ ရေနံနဲ့ သဘာဝဓာတ်ငွေ့ သွယ်ပို့နေရာကနေ တောင်နဲ့ အရှေ့ခြမ်းက အလားအလာရှိတဲ့ ဈေးကွက်တွေဆီ လမ်းကြောင်းလွှဲနိုင်မှာဖြစ်ပါတယ်။
ဒါ့အပြင် ရေနံနဲ့ သဘာဝဓာတ်ငွေ့ ကုမ္ပဏီတွေနဲ့အတူ အာဖရိက၊ လက်တင်အမေရိကနဲ့ အာရှ-ပစိဖိတ်နိုင်ငံတွေဆီ ပို့ကုန်အခြေပြု အခြေခံ အဆောက်အဦတွေ တိုးချဲ့ရေး အစီအစဉ်တွေကို အကြမ်းဖျင်း ဖော်ပြထားတဲ့ အလားအလာတွေနဲ့ ပတ်သက်ပြီး အမြော်အမြင်ရှိဖို့လည်း အရေးကြီးတယ်လို့ ပူတင်က ပြောပါတယ်။
