ယီမင်နိုင်ငံမြောက်ပိုင်းကို ထိန်းချုပ်ထားပြီး အီရန်နဲ့ မဟာမိတ်ပြုထားတဲ့ ဟူသီလှုပ်ရှားမှုအဖွဲ့က အာရပ်စော်ဘွားများပြည်ထောင်စု (ယူအေအီး) နိုင်ငံအလံ လွှင့်ထားတဲ့ ကုန်သင်္ဘောကို အပိုင်စီးထားတယ်လို့ ရိုက်တာသတင်းဌာနက ဇန်နဝါရီ ၃ ရက်မှာ သတင်းထုတ်ပါတယ်။
ဒီသင်္ဘောဟာ ရန်လိုတဲ့လုပ်ရပ်တွေ စတင်လုပ်ဆောင်ခဲ့တယ်လို့ ဟူသီတွေက ပြောပေမဲ့ ဆော်ဒီအာရေဗျ အစိုးရကတော့ ဒီသင်္ဘောပေါ်မှာ ဆေးရုံသုံးပစ္စည်းတွေသာ တင်ထားတာလို့ ဆိုပါတယ်။
ဒီသင်္ဘောဟာ ပင်လယ်နီထဲက ဆိုကိုထရာကျွန်းကနေ ယီမင်မြောက်ပိုင်းမှာ ရှိတဲ့ ဆော်ဒီဆိပ်ကမ်း ဂျိဇန်ဆီကို ဦးတည် ခုတ်မောင်းနေချိန် တနင်္ဂနွေ သန်းခေါင်ယံမတိုင်ခင်မှာ တိုက်ခိုက်ခံရတာလို့ ဆော်ဒီ ဦးဆောင်တဲ့ ညွန့်ပေါင်းတပ် ပြောခွင့်ရ ဗိုလ်မှူးချုပ် တာကီအယ်လ် မယ်ခီကို ကိုးကားပြီး ဆော်ဒီအစိုးရ သတင်းဌာန SPA က ရေးပါတယ်။
ဆော်ဒီအာရေဗျဟာ ဟူသီတွေနဲ့ ခြောက်နှစ်ကြာ တိုက်နေတဲ့ မဟာမိတ်စစ်တပ်ကို ဦးဆောင်သူ နိုင်ငံပါ။ ဟူသီတွေက ပင်လယ်နီထဲက သင်္ဘောတွေကို တိုက်ခိုက်နေတယ်လို့ ညွန့်ပေါင်းတပ်က စွပ်စွဲထားပါတယ်။
ပင်လယ်နီဟာ ဆူးအက်တူးမြောင်းကို ဦးတည်တဲ့ ကမ္ဘာ့အစည်ကားဆုံး ပင်လယ်ရေကြောင်း လမ်းတွေ ရှိရာနေရာတွေထဲက တခုလည်း ဖြစ်ပါတယ်။
သင်္ဘောဟာ ယီမင်နိုင်ငံ ရတ်စ်အစ်ဆာဆိပ်ကမ်းနားမှာ တိုက်ခိုက်ခံရတယ် ဆိုတဲ့ သတင်းကို တနင်္ဂနွေနှောင်းပိုင်းမှာ ရထားတယ်လို့ ဗြိတိန်ပင်လယ်ရေကြောင်း ကုန်သွယ်မှု စစ်ဆင်ရေးအဖွဲ့ UKMTO က ပြောပါတယ်။ ဒီဆိပ်ကမ်းဟာ ဟိုဒေးဒါမြို့ မြောက်ဘက်အနားမှာ ရှိတာပါ။
အဲဒီဧရိယာထဲမှာ အလွန်သတိထားကြဖို့ ဗြိတိန်တော်ဝင်ရေတပ်ရဲ့ အစိတ်အပိုင်းဖြစ်တဲ့ UKMTO က ရေတပ်သားတွေကို အကြံပြုထားပြီး စုံစမ်းစစ်ဆေးတာတွေကိုလည်း ဆက်လုပ်နေပါတယ်။
