ဝါဒဖြန့်မှုအဖြစ် အစိုးရက ပယ်ချခဲ့တဲ့ ဝန်ကြီးချုပ် နရင်ဒြာမိုဒီအကြောင်း ဘီဘီစီ မှတ်တမ်းရုပ်ရှင်ကို မပြသခင် အိန္ဒိယမြို့တော်မှာ ရဲတပ်ဖွဲ့က ကျောင်းသားတဒါဇင်ကျော်ကို ဇန်နဝါရီ ၂၅ ရက်မှာ ဖမ်းဆီးလိုက်ပါတယ်။
အိန္ဒိယ ကျောင်းသားများအဖွဲ့ချုပ် (SFI) က အိန္ဒိယရဲ့ ပြည်နယ်တိုင်းမှာ “India: The Modi Question” မှတ်တမ်းရုပ်ရှင်ကို ပြဖို့စီစဉ်နေတယ်လို့ SFI ရဲ့ အထွေထွေအတွင်းရေးမှူးက ရိုက်တာသတင်းဌာနကို ပြောခဲ့ပါတယ်။
ဗုဒ္ဓဟူးနေ့ညနေပိုင်းမှာ ဘီဘီစီ မှတ်တမ်းရုပ်ရှင်မပြခင် ခွင့်ပြုချက် ပေးမထားတဲ့ SFI ရဲ့ ကျောင်းသားစုဝေးပွဲတွေအတွက် မြို့တော် နယူးဒေလီရှိ ဂျမီယာမီလီယာ အစ္စလာမီယာ တက္ကသိုလ်က ဇန်နဝါရီ ၂၄ ရက်မှာ သတိပေးချက်ထုတ်ပြန်ခဲ့တယ်လို့ NDTV သတင်းဌာနက ဖော်ပြခဲ့ပါတယ်။
အဲဒီနောက် ရဲတပ်ဖွဲ့က ကျောင်းသားတဒါဇင်ကျော်ကို အဲဒီနေရာကနေ ဖမ်းဆီးထိန်းသိမ်းခဲ့တယ်လို့ ရုပ်သံလွှင့်ဌာနက ကြေညာပါတယ်။
ဒေလီရဲတပ်ဖွဲ့က ကျောင်းသားတွေကို ဆက်ပြီး ဖမ်းထားမထား ချက်ချင်း အတည်မပြုနိုင်သေးပေမဲ့ တက္ကသိုလ်မှာ အဓိကရုဏ်းထိန်းချုပ်ရေး ကိရိယာတွေ၊ ရဲနဲ့ လုံခြုံရေးတပ်ဖွဲ့ဝင်တွေ အပြင်းအထန် ချထားတယ်လို့ ပြောပါတယ်။
မှတ်တမ်းရုပ်ရှင်ပြသမှုနဲ့ ဇန်နဝါရီ ၂၆ ရက် အိန္ဒိယသမ္မတနိုင်ငံနေ့တို့ကြောင့် တရားဥပဒေစိုးမိုးရေးနဲ့ တည်ငြိမ်အေးချမ်းရေးတို့အတွက် တပ်ဖြန့်ချထားတာလို့ ရဲတပ်ဖွဲ့က ပြောပါတယ်။
“ဒါဟာ ဒီနိုင်ငံမှာ နိုင်ငံသားတိုင်းရဲ့ အခြေခံအခွင့်အရေး အမျိုးမျိုးကို လုံးလုံးလျားလျား ချိုးဖောက်မှုပါပဲ” လို့ ကျောင်းသား ဆာနမ်ဟူစိန်က ပြောပါတယ်။
အိန္ဒိယနိုင်ငံရဲ့ အိမ်နီးချင်းနိုင်ငံတွေကနေလာတဲ့ မွတ်စလင်တွေကို နိုင်ငံသားဖြစ်ခွင့်မရအောင် တားမြစ်ထားတဲ့ ဥပဒေသစ်ကြောင့် ဒီတက္ကသိုလ်မှာ ၂၀၁၉ ခုနှစ် ဒီဇင်ဘာလက ကျောင်းသူတွေ ဆန္ဒပြသူတွေနဲ့ ရဲတပ်ဖွဲ့ဝင်တွေပါတဲ့ အကြမ်းဖက်ပဋိပက္ခတွေ ဖြစ်ခဲ့ပါတယ်။
ရုရှားကျူးကျော်စစ်ကြောင့် ယူကရိန်းနိုင်ငံမှာ ပိတ်မိနေတဲ့ အိန္ဒိယကျောင်းသား ၁၀၀ ကျော် သူတို့နိုင်ငံကို မတ် ၁၀ ရက်က ပြန်ရောက်လာပါတယ်။
ရုရှားရဲ့ အဓိကပစ်မှတ်ထား တိုက်ခိုက်ခံနေရတဲ့ ကိယက်ဗ်နဲ့ ခါရ်ကိဗ် မြို့ကြီးနှစ်မြို့က တက္ကသိုလ်တွေမှာ ပညာသင်နေတဲ့ ကျောင်းသားတွေဟာ မြောက်ပိုင်း ဂါဇီယာဘတ်မြို့မှာ စုစည်းပြီး မနေ့က အိန္ဒိယ Air Force လေယာဉ်နဲ့ ပြန်ရောက်ရှိလာတာပါ။
တချို့ကျောင်းသားတွေက မွေးထားတဲ့ အိမ်မွေးတိရစ္ဆာန်လေးတွေ အတူသယ်လာပါတယ်။
အိန္ဒိယကျောင်းသား ၁၅၀ လောက် ယူကရိန်းမှာ ပိတ်မိနေသေးတယ်လို့ ကျောင်းသားတဦးက ပြောပါတယ်။
ပြီးခဲ့တဲ့အပတ် ခါရ်ကိဗ်မြို့ ဗုံးကြဲခံရတဲ့အထဲ အိန္ဒိယကျောင်းသား ၁ ဦး သေဆုံးခဲ့ရပြီးနောက် အိန္ဒိယအစိုးရက ကျောင်းသားတွေကို ပြန်ခေါ်ဖို့ အပူတပြင်း လုပ်ဆောင်လာတာပါ။
ရုရှားကျူးကျော်မှု နှစ်ပတ်ကျော်လာပြီးနောက် ယူကရိန်းအရပ်သား ၅၁၆ ဦး သေဆုံးပြီး ၉၀၈ ဦး ဒဏ်ရာရရှိထားတယ်လို့ ကုလသမဂ္ဂက ကြေညာပါတယ်။
