ရန်ကုန်၊ မင်္ဂလာတောင်ညွန့်မြို့နယ်၊ ကျီတော်ရပ်ကွက်၊ ပုဇွန်တောင်ဘူတာ၊ လက်မှတ်ရောင်းဌာန လူကူးခုံးတံတားအောက် ပလက်ဖောင်းပေါ်မှာ ဧပြီ ၂၄ ရက် မနက်ပိုင်းက အိမ်ခြေမဲ့တဦး ထိုင်လျက်ပုံစံနဲ့ နှာခေါင်းသွေးထွက် သေဆုံးနေတယ်လို့ မြို့ခံကယ်ဆယ်ရေးအသင်းက ပြောပါတယ်။
မနက်ပိုင်းမှာ ရထားစီးခရီးသည်တွေက တွေ့ရှိခဲ့ပြီး ရထားရုံပိုင်ကတဆင့် ကယ်ဆယ်ရေးအသင်းတွေကို ဆက်သွယ်အကြောင်းကြားခဲ့တာကြောင့် မနက် ၈ နာရီလောက်မှာ ကယ်ဆယ်စစ်ဆေးခဲ့ပေမဲ့ သေဆုံးလျက် တွေ့ရှိခဲ့တာပါ။
“ပုဇွန်တောင်ဘူတာ တံတားအောက်မှာ အမျိုးသားတဦး ငုတ်တုပ်ထိုင်လျက်သေနေတာ၊ နှာခေါင်းသွေးတွေတော့ ကျနေတာ၊ ပြင်ပဒဏ်ရာတော့ မရှိပါဘူး။ DB ကောက်တဲ့အချိန်မှာ သူ့ကိုသိတဲ့လူ မရှိဘူး၊ နာမည်လည်း မသိရဘူး” လို့ ကယ်ဆယ်ရေးအသင်းက ပြောပါတယ်။
သေဆုံးသူဟာ အသက် ၃၀ အရွယ် အမျိုးသားတဦး ဖြစ်တယ်လို့ သိရပြီး ရုပ်အလောင်းကို PR 060 နဲ့ ရန်ကုန်ဆေးရုံကြီး ပို့ဆောင်ထားတယ်လို့ သိရပါတယ်။
ပြီးခဲ့တဲ့ ဧပြီ ၄ ရက်က မင်္ဂလာတောင်ညွန့်မြို့နယ်၊ ပုသိမ်ညွန့်ရပ်ကွက်၊ ၉ လမ်း တံတားအရှေ့ဘက် ချောင်းဘေးမှာ အိမ်ခြေမဲ့အမျိုးသားတဦး သေဆုံးခဲ့ပါသေးတယ်။
ရန်ကုန်၊ မင်္ဂလာတောင်ညွန့်မြို့နယ်နဲ့ ပုဇွန်တောင်မြို့နယ်တို့မှာ ၂၀၂၃ မတ်လနဲ့ ဧပြီ ၂၄ ရက်အတွင်း အသင်းကယ်ဆယ်မှု မှတ်တမ်းအရ အိမ်ခြေမဲ့သေဆုံးမှု ၈ ဦးထက်မနည်း ရှိနေပြီလို့ သိရပါတယ်။
ရန်ကုန်တိုင်း၊ မင်္ဂလာတောင်ညွန့်မြို့နယ်ထဲမှာ ဖေဖော်ဝါရီ ၂၂ ရက် တရက်တည်း အိမ်ခြေမဲ့ အမျိုးသားနှစ်ယောက် သေဆုံးခဲ့တယ်လို့ မင်္ဂလာတောင်ညွန့် လူငယ်လူမှုကူညီရေးအသင်းတွေက ပြောပါတယ်။
မင်္ဂလာတောင်ညွန့်မြို့နယ်၊ ကျီတော်ရပ်ကွက်၊ အထက်ပုစွန်တောင်လမ်း၊ စာတိုက်မှတ်တိုင်မှာ ဖေဖော်ဝါရီ ၂၂ ရက် မနက် ၁၁ နာရီလောက်က အသက် ၄၀ အရွယ် အမျိုးသားတဦး သေဆုံးနေတယ်လို့ ကြားသိရတဲ့အတွက် သွားယူခဲ့ပြီး သေဆုံးသူကို လုပ်ထုံးလုပ်နည်းအတိုင်း ဆက်လက်လုပ်ဆောင်ခဲ့ပြီး ဘာကြောင့်သေဆုံးလဲ ဆိုတာကိုတော့ စစ်ဆေးမှုတွေ ပြုလုပ်နေတယ်လို့ သိရပါတယ်။
အလားတူ ဖေဖော်ဝါရီ ၂၂ ရက် တရက်တည်းမှာပဲ မွန်းလွဲ ၁ နာရီ ၂၅ မိနစ်လောက်မှာ မင်္ဂလာတောင်ညွန့်မြို့နယ်၊ ကန်တော်လေးရပ်ကွက်၊ ၉၃ လမ်း၊ မြန်မာ့ဂုဏ်ရည်လမ်းထိပ် တံတားပေါ်မှာ အသက် ၅၀ ခန့်ရှိ အိမ်ခြေမဲ့အမျိုးသားတဦး သေဆုံးကြောင်း ကြားသိရတဲ့အတွက် သွားရောက်ခဲ့တယ်လို့ မင်္ဂလာတောင်ညွန့်လူငယ် လူမှုကူညီရေးအသင်း တာဝန်ရှိသူတဦးက ပြောပါတယ်။
“အိမ်ခြေမဲ့တွေပါ နှစ်ယောက်လုံးက၊ နေရပ်လိပ်စာတွေ အချက်အလက်တွေတော့ မသိရဘူးပေါ့။ အသက်ကတော့ ခန့်မှန်းခြေပါပဲ။ စာတိုက်မှတ်တိုင်နားမှာသေတဲ့ အမျိုးသားက လမ်းဘေးမှာ နေစားရင်း အအေးလွန်ပြီး သေတဲ့ပုံစံလို့ ယူဆရတယ်။ တံတားထိပ်က အမျိုးသားကတော့ အစာရေစာချို့တဲ့လို့ သေဆုံးတာ ဖြစ်နိုင်တယ်။”
အဆိုပါ သေဆုံးခဲ့တဲ့ အိမ်ခြေမဲ့အမျိုးသားနှစ်ဦးလုံးရဲ့ ရုပ်အလောင်းတွေကို မင်္ဂလာတောင်ညွန့် လူငယ်လူမှုကူညီရေးအသင်းကပဲ ရန်ကုန်ဆေးရုံကြီးကို ပို့ဆောင်ပေးခဲ့ပြီး လုပ်ထုံးလုပ်နည်းအတိုင်း ပြုလုပ်သွားမယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၂၁ ရက်ကလည်း ရန်ကုန်တိုင်း၊ လှိုင်သာယာမြို့နယ်၊ အမှတ် ၆ ရပ်ကွက်၊ အောင်မြေသာယာဘုရား၊ မြောက်ဘက်မုခ်အနီး၊ လမ်းဘေးတနေရာမှာ အသက် ၆၀ ခန့်အရွယ်ရှိ တောင်းရမ်းစားသောက်သူ အမျိုးသားတဦး သေဆုံးခဲ့ပြီး ဖေဖော်ဝါရီ ၂၃ ရက်အထိ အိမ်ခြေမဲ့သေဆုံးသူ ၁၀ ဦးအထက် ရှိလာပြီလို့ ဒေသခံ လူမှုကူညီရေးအသင်းတွေက ပြောပါတယ်။
