ရှမ်းပြည်နယ်မြောက်ပိုင်း ‘ဝ’အထူးဒေသ ၂ မှာ စစ်ကောင်စီက လာမယ့်ရွေးအကောက်ပွဲအတွက် ရည်ရွယ်ပြီး ပန်းခင်းစီမံချက်စနစ်နဲ့ အိမ်ထောင်စုလူဦးရေစာရင်းနဲ့ နိုင်ငံသား စိစစ်ရေးကတ်ပြား ပေးအပ်ပွဲကို ဇန်နဝါရီ ၁၅ ရက်က ‘ဝ’အထူးဒေသ ၂၊ မိုင်းမောမြို့နဲ့ နမ့်တမြို့မှာ ပြုလုပ်ခဲ့ပါတယ်။

‘ဝ’ အထူးဒေသ ၂ အတွက် မြို့နယ်အလိုက် ကွင်းဆင်းလုပ်ဆောင်ပေးရာမှာ မိုင်းမောမြို့နယ်နဲ့ နမ့်တစ်မြို့နယ်အတွက် အိမ်ထောင်စုလူဦးရေစာရင်း ၃,၉၀၀ ကျော်နဲ့ နိုင်ငံသားစိစစ်ရေး ကတ်ပြား ၉,၃၀၀ ကျော်ကို ဒေသခံ တိုင်းရင်းသားကိုယ်စားလှယ်တွေကို ပေးအပ်ခဲ့တယ်လို့ သိရပါတယ်။

ပန်းခင်းစီမံချက်ဟာ ၂၀၂၃ ခုနှစ်မှာ ကျင်းပမယ့် ရွေးကောက်ပွဲမှာ မဲပေးပိုင်ခွင့်ရှိသူ နိုင်ငံသားတိုင်း နိုင်ငံသားကတ်ပြား အမျိုးမျိုးကိုင်ဆောင်ပြီး မဲပေးဖို့အတွက် ရည်ရွယ်ဆောင်ရွက်တာဖြစ်ပြီး နိုင်ငံတဝန်း ရာနှုန်းပြည့်နီးပါး ထုတ်ပြီးဖြစ်ကာ ဆောင်ရွက်ဖို့ ကျန်နေသေးတဲ့ ‘ဝ’အထူးဒေသနဲ့ အခုနှစ်မှာ အသက် ၁၆ နှစ်ပြည့်လာမယ့် နိုင်ငံသားတွေအတွက် ပန်းခင်းစီမံချက်အဆင့် ၂ နဲ့ ကွင်းဆင်းဆောင်ရွက်ပေးတာလို့ စစ်ကောင်စီလက်အောက်ခံ ပြည်ထောင်စုဝန်ကြီး ဦးမြင့်ကြိုင်က ပြောပါတယ်။

ဒေသခံတွေကတော့ အခုလို အိမ်ထောင်စုစာရင်းနဲ့ မှတ်ပုံတင်ပြုလုပ်ရတာဟာ ရွေးကောက်ပွဲမှာ မဲထည့်ဖို့မဟုတ်ဘဲ ခရီးသွားလာရေး အဆင်ပြေစေဖို့ ရည်ရွယ်ချက်နဲ့ လုပ်ဆောင်ခဲ့တာသာ ဖြစ်တယ်လို့ မိုင်းမောဒေသခံတယောက်က ဆိုပါတယ်။

အခုစီမံချက်ကို ‘ဝ’ဒေသဘက်က တောင်းဆိုလို့ ပန်းခင်းစီမံချက်ကို သွားရောက်လုပ်ကိုင်ပေးတာ ဖြစ်တယ်လို့ စစ်ကောင်စီလက်အောက်ခံ ဌာနတွေက ပြောပေမဲ့ ‘ဝ’ဒေသက တာဝန်ရှိသူတွေကတော့ စစ်ကောင်စီဘက်က လုပ်ဆောင်ပေးမယ်‌ ပြောတာ‌ကြောင့် ဒေသခံတွေရဲ့ ခရီးသွားလာရေး အဆင်ပြေလွယ်ကူစေဖို့ လက်ခံ ဆောင်ရွက်‌ပေးတာလို့ ပြောကြားထားပါတယ်။

ရွေးကောက်ပွဲအတွက် ပြင်ဆင်တဲ့အနေနဲ့  မန္တလေးမြို့နဲ့ ပခုက္ကူမြို့က ရပ်ကွက်တချို့မှာ စစ်ကောင်စီခန့် အုပ်ချုပ်ရေးမှူးတွေ ဦးဆောင်ပြီး ဇန်နဝါရီ ၉ ရက်နေ့မှာ တအိမ်တက်ဆင်း  လူဦးရေစာရင်း လိုက်ကောက်နေတယ်လို့ ဒေသခံတွေထံက သိရပါတယ်။

မန္တလေးမြို့ မြို့နယ် ၆ ခုက ရပ်ကွက်တွေမှာ ရပ်ကျေးအုပ်ချုပ်ရေးမှူး၊ ဆယ်အိမ်မှူးနဲ့ လူ ၁၀ ယောက်ဝန်းကျင်က အိမ်ထောင်စု စာရင်းလိုက်ကောက်နေတာဖြစ်တယ်လို့ ချမ်းအေးသာစံမြို့နယ် ဒေသခံတဦးက ပြောပါတယ်။

“လာကောက်တာတော့ ၁၀ ယောက်ကျော်တယ်။ အိမ်ထောင်စုဇယား လာတောင်းတာ။ ဘာမှတော့မပြောဘူး။ အမျိုးသမီးတွေလည်းပါတယ်။”

မန္တလေးမြို့ စိတ္တရမဟီရပ်ကွက်၊ မြို့သစ် က/၂ရပ်ကွက်၊ ရုံးသာရပ်ကွက်၊ မြောက်ပြင်၊ မဟာမြိုင်ရပ်ကွက်၊ ပြည်ကြီးပျော်ဘွယ် အနောက်ရပ်ကွက်၊ စိန်ပန်းစာတိုက်တန်း ရပ်ကွက်တွေမှာ ဇန်နဝါရီ ၉ ရက်​က တအိမ်တက်ဆင်း အိမ်ထောင်စုဇယား ကောက်ခံခဲ့တယ်လို့ သိရပါတယ်။

မန္တလေးမြို့မှာ ဇန်နဝါရီလ အစပိုင်းကစပြီး တခြားမြို့နယ်ရပ်ကွက်တချို့မှာလည်း စစ်ကောင်စီခန့် အုပ်ချုပ်ရေးမှူးတွေ ဦးဆောင်ပြီး အိမ်ထောင်စုဇယား ကောက်ခံခဲ့တယ်လို့ သိရပါတယ်။

ပခုက္ကူမြို့ အမှတ် ၆ ရပ်ကွက်မှာလည်း စစ်ကောင်စီတပ်နဲ့ ရဲတွေ လုံခြုံရေးယူပေးပြီး စစ်သား၊ ရဲ၊ ပျူစောထီး၊ ထွေအုပ်ဝန်ထမ်း၊ မီးသတ်ဝန်ထမ်းတွေ ပူးပေါင်းပြီး ဇန်နဝါရီ ၉ ရက်​က အိမ်ထောင်စုစာရင်း ကောက်ခံခဲ့တယ်လို့ မြို့ခံတွေဆီက သိရပါတယ်။

ပခုက္ကူမြို့ခံတဦးက “လမ်းဆုံတွေမှာ ရဲက လုံခြုံရေးပေးပြီး လဝကနဲ့ ထွေအုပ်က အမျိုးသမီးတွေရော အမျိုးသားတွေရော တလမ်းဝင်တလမ်းထွက် တအိမ်တက်ဆင်း ကောက်သွားတာ။ သူတို့ပြောတာကတော့ မှတ်ပုံတင်လုပ်ချင်ရင် ရုံးကို စာရင်းကောက်သွားတဲ့သူတွေက မှတ်ပုံတင် အလွယ်လုပ်လို့ရတယ်တဲ့” လို့ ပြောပါတယ်။

သူတို့ဆီမှာရှိနေတဲ့ အိမ်ထောင်စုစာရင်းနဲ့ လူစာရင်းတွေကို တိုက်စစ်သွားတာဖြစ်ပြီး နေအိမ်ရှိ လူစာရင်းနဲ့ အလုပ်အကိုင်တွေကို စာရင်းယူသွားတာဖြစ်တယ်လို့ ပြောပါတယ်။

“ရွေးကောက်ပွဲ သူတို့ကျင်းပမှာဆိုတော့ အဲ့မဲကိစ္စနဲ့ပဲ ပတ်သက်လောက်မယ်။ အလကားနေရင်းတော့ အိမ်ထောင်စုဇယား လိုက်ကောက်မှာမဟုတ်ဘူး။ လုံခြုံရေးတွေကော ပါတော့ မဲနဲ့ပတ်သက်ရင်ကျ ပြည်သူတွေက မပါဝင်မှာစိုးလို့ မလိမ့်တပတ်လုပ်တာဖြစ်မယ်” လို့ ပခုက္ကူမြို့ ဒေသခံတဦးက ပြောပါတယ်။

အိမ်ထောင်စုဇယားလာကောက်တဲ့ စစ်သားနဲ့ ရဲတွေမှာ လက်နက်အပြည့်အစုံပါပြီး စစ်သားတွေမှာ လက်ပစ်ဗုံးတောင် အသင့်ထည့်ထားတယ်လို့ သိရပါတယ်။

စစ်ကောင်စီဟာ ရွေးကောက်ပွဲအတွက် ပြင်ဆင်တဲ့အနေနဲ့ ရန်ကုန်၊ မန္တလေးနဲ့ နေပြည်တော်အပါအဝင် ပြည်နယ်နဲ့တိုင်းတွေမှာ အခုသီတင်းပတ်ကစပြီး လူဦးရေစာရင်းတွေ လိုက်ကောက်နေတာဖြစ်ပါတယ်။

မွန်ပြည်နယ်၊ ကျိုက်ထိုမြို့နယ်မှာ စစ်ကောင်စီက ရွေးကောက်ပွဲအတွက် ကြိုတင်ပြင်ဆင်တဲ့အနေနဲ့ ကျိုက်ထိုမြို့ပေါ်ရပ်ကွက်နဲ့ ကေအန်ယူ တပ်မဟာ-၁ နဲ့ အလှမ်းဝေးတဲ့ ကျေးရွာတချို့မှာ စစ်တပ်လုံခြုံရေးနဲ့  တအိမ်တက်ဆင်း  လူဦးရေစာရင်းတွေ လိုက်ကောက်နေတယ်လို့  မြို့ခံတွေက ပြောပါတယ်။

“ရွေးကောက်ပွဲကျင်းပဖို့ ပြောနေတယ်၊ ပြည်သူတွေက အခု စစ်ကောင်စီကလုပ်မယ့် ရွေးကောက်ပွဲကို အယုံအကြည်မရှိပါဘူး။ အခု သန်းခေါင်စာရင်းယူတာတောင် လုံခြုံရေးတွေနဲ့ မသင်္ကာရင် ဖုန်းတွေပါ စစ်ဆေးလိုက်သေးတယ်” လို့ ဒေသခံတယောက်က ပြောပါတယ်။

ကျေးရွာအုပ်ချုပ်ရေးမှူးနဲ့ နီးစပ်သူတွေက “အခု ကျိုက်ထိုမြို့ပေါ်က ရပ်ကွက် ၆ ခုနဲ့ ကျေးရွာ ၃၆ ရွာမှာ ရပ်ကျေးအုပ်ချုပ်ရေးမှူးတွေကို ပြည်ခိုင်ဖြိုးပါတီကလူတွေ အများဆုံးထားရှိပြီး သန်းခေါင်စာရင်းတွေကောက်တာ။ တချို့ ကျေးရွာအုပ်ချုပ်ရေးမှူးတွေကတော့ စစ်တပ်က ဖိအားပေးပြီး လုပ်ခိုင်းတာ မလွန်ဆန်ရဲကြပေမဲ့ လုပ်ပေးနေရတာ” လို့ ပြောပါတယ်။

ကေအန်ယူ တပ်မဟာ-၁ ဘက် ကျေးရွာတွေဆို သန်းခေါင်စာရင်းနဲ့ ပတ်သက်တာတွေကို မကောက်ရဲကြဘူးလို့ ဒေသခံတွေက ပြောပါတယ်။

ပြီးခဲ့တဲ့ ၂၀၂၀ ရွေးကောက်ပွဲတုန်းက အနိုင်ရတဲ့ မွန်ပြည်နယ်ဝန်ကြီးချုပ် ဒေါက်တာအေးဇံ အပါအဝင် အန်အယ်လ်ဒီအမာခံတချို့နဲ့ ထောက်ခံသူတချို့ စစ်ကောင်စီက ဖမ်းဆီးခံထားပြီး အခု ရွေးကောက်ပွဲ အသစ်ထပ်လုပ်ဖို့ စီစဉ်နေတာဖြစ်ပါတယ်။

အခု စစ်ကောင်စီကလုပ်မယ့် ရွေးကောက်ပွဲမှာ တစညပါတီ၊ ကြံ့ခိုင်ရေးပါတီ၊ PPP ပါတီတွေ ဝင်ရောက်ယှဥ်ပြိုင်ကြမယ်လို့ သတင်းတွေ ထွက်ပေါ်နေကြောင်း နိုင်ငံရေးပါတီဝင်တွေနဲ့ နီးစပ်နေသူတယောက်က ပြောပါတယ်။

နိုင်ငံရေးလေ့လာသုံးသပ်သူတွေကတော့ စစ်ကောင်စီက ကျင်းပမယ့် ရွေးကောက်ပွဲဟာ အတုအယောင်သာဖြစ်ပြီး နိုင်ငံတကာကလည်း လက်မခံတဲ့ကြားက စစ်အုပ်စုက နိုင်ငံရေး နောက်ဆုံးထွက်ပေါက်အဖြစ် ရွေးကောက်ပွဲကို အသည်းအသန် ကျင်းပဖို့ ပြင်ဆင်နေတာလို့ သုံးသပ်ပြောပါတယ်။