မကွေးတိုင်း ပေါက်မြို့နယ်မှာ စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးတပ်တွေ နေ့စဉ်လိုလို တိုက်ပွဲတွေ ပြင်းထန်နေပြီး စစ်တပ်က ကျေးရွာတွေကို မီးရှို့ဖျက်ဆီးနေတာကြောင့် နေအိမ် ၈၀၀ လောက်ဆုံးရှုံးခဲ့ကာ ဒေသခံပြည်သူ ၁ သောင်းကျော် ထွက်ပြေးတိမ်းရှောင်နေရပြီး စားဝတ်နေရေးအကူအညီ အရေးပေါ်လိုအပ်နေတယ်လို့ သိရပါတယ်။
ပေါက်မြို့နယ်တောင်ပိုင်း ကျောက်အိုးရွာနားမှာ မနေ့က ဧပြီ ၁၄ ရက်နေ့ မနက်ပိုင်းနဲ့ ညနေပိုင်းတွေမှာ SPGF နဲ့ စစ်ကောင်စီတပ်တွေ တိုက်ပွဲဖြစ်ပွားပြီး စစ်ကောင်စီဘက်က ၇ ယောက်သေဆုံးခဲ့တယ်လို့ SPGF ရဲ့ ပြန်ကြားရေးတာဝန်ခံက ဒီဗွီဘီကိုပြောပါတယ်။
“မနက်ပိုင်းတိုက်ပွဲမှာပြင်းအားကောင်းတဲ့ မိုင်း တစ်လုံးခွဲပြီး SPGF က ရဲဘော်တွေ သေနတ်နဲ့ ပစ်ခတ်လို့ စစ်ကောင်စီတပ်သား ၇ ယောက်သေဆုံးခဲ့တာဗျ။ အဲဒီစစ်ကောင်စီတပ်သားတွေ သေပြီးတဲ့နောက် စစ်ကောင်စီဘက်က ပေါက်မြို့နယ်နဲ့ ဆောမြို့နယ်အစပ်မှာ လေကြောင်းကနေ ၁၅ မိနစ်လောက် ဗုံးကြဲတိုက်ခိုက်ခဲ့လို့ ဆောမြို့နယ် အုတ်ဖိုရွာက အပြစ်မဲ့ပြည်သူ ၂ ယောက်ဒဏ်ရာရရှိခဲ့တယ်။”
ပေါက်မြို့နယ် သက္ကယ်ကျင်းရွာ၊ လက်ပံလှရွာနဲ့ ကိုင်းမကျေးရွာတွေကိုလည်း ဧပြီ ၁၃ ရက် မနက်ပိုင်းမှာ စစ်ကောင်စီတပ်တွေ ဝင်ရောက်ပြီး မီးရှို့ခဲ့တာကြောင့် ပြည်သူတွေရဲ့ နေအိမ်အများအပြား မီးလောင်ဆုံးရှုံးခဲ့တယ်လို့ လက်ပံလှကျေးရွာ ဒေသခံတယောက်က ဒီဗွီဘီကို ပြောပါတယ်။
"အဲဒီရွာတွေက နဂိုကတည်းက မီးရှို့ခံထားရပြီးသားဗျ။ အခုမနက်ပိုင်းမှာ စစ်ကောင်စီတပ်တွေနဲ့ ပျူစောထီးတွေ ဝင်လာပြီး ထပ်ရှို့ကြတာ။ နေအိမ်တွေမှာ ကျန်ခဲ့တဲ့ အဖိုးတန်ပစ္စည်းတွေနဲ့ ငွေကြေးတွေကိုလည်း စစ်ကောင်စီတပ်သားတွေ ခိုးယူသွားကြတယ်။"
ပေါက်မြို့နယ် တံစူးရွာနားက တဲတွေကိုလည်း မနေ့ညနေပိုင်းမှာ စစ်ကောင်စီတပ်တွေ မီးရှို့ဖျက်ဆီးခဲ့သလို လက်နက်ကြီးနဲ့ ပစ်ခတ်လို့ ဒေသခံ အမျိုးသမီး ၈ ယောက် သေဆုံးခဲ့ပြီး အမျိုးသား ၃ ယောက်နဲ့ အမျိုးသမီးတယောက် ဒဏ်ရာရရှိခဲ့တယ်လို့ သိရပါတယ်။
တံစူးရွာဘက်က တဲတိုက်တွေကို မီးရှို့ပြီး ထိုးစစ်ဆင်လာတဲ့ စစ်ကောင်စီတပ်သားတွေကို ဧပြီလ ၁၂ ရက်နေ့ ညနေ ၄ နာရီခွဲလောက်မှာလည်း SPGF နဲ့ YDF တပ်ဖွဲ့တို့ ပူးပေါင်းတိုက်ခိုက်ရာ စစ်ကောင်စီဘက်က ၁၀ ယောက်ထက်မနည်း သေဆုံးပြီး အများအပြားဒဏ်ရာရရှိသွားတယ်လို့ သိရပါတယ်။
စစ်ကောင်းစီတပ်တွေဟာ ပေါက်မြို့နယ်တောင်ပိုင်းကို ဧပြီ ၆ ရက်နေ့ကစလို့ စစ်ကြောင်း ၃ ကြောင်းနဲ့ထိုးစစ်ဆင်ပြီး ကျေးရွာ ၁၃ ရွာလောက်ကို မီးရှို့ဖျက်ဆီးတာကြောင့် နေအိမ် ၈၀၀ လောက် မီးလောင်ဆုံးရှုံးခဲ့ရသလို ပြည်သူ ၁၀၀၀၀ ကျော်ဘေးလွတ်ရာကို ထွက်ပြေးနေကြရတယ်လို့ အရေးပေါ် အကူအညီတွေ လိုအပ်နေတယ်လို့ ဒေသခံတွေက ပြောပါတယ်။
ပေါက်မြို့နယ် ရေကျော်၊ ကျောင်းကုန်း၊ သက္ကယ်ကျင်းရွာ၊ ကိုင်းမကျေးရွာ၊ လက်ပံလှ၊ လယ်ယာ၊ အင်းငယ်ထောင့်၊ ကျောက်အိုး၊ တောင်ချို၊ ဒိန်းကွင်း၊ တောင်ဘက်ရွာ၊ ဇီးတော၊ ဘို့မယ်ကျေးရွာ စတာတွေနဲ့ ဆိပ်ဖြူမြို့နယ်ထဲက လယ်သာဝ၊ ရှားလှ၊ ပခုက္ကူမြို့နယ်က မြစ်ဖျားကျေးရွာတွေကို စစ်ကောင်စီတပ်က မီးရှို့ဖျက်ဆီးခဲ့တာလို့ ကျောက်အိုးရွာဒေသခံတယောက် ပြောပါတယ်။
“လတ်တလော အခက်ခဲကတော့ အခြေခံစားသောက်ကုန်၊ ရေနဲ့ ဆေးဝါးတွေ အရေးပေါ် အကူအညီ လိုအပ်နေတယ်ဗျ။ နဂိုကတော့ တရွာ မီးရှို့ဖျက်ဆီးခံရရင် ကျန်တဲ့ရွာတွေက ဝိုင်းဝန်းထောက်ပံ့ကြလို့ အဆင်ပြေခဲ့ပေမဲ့ လက်ရှိအနေထားမှာ စစ်ကောင်စီတပ်တွေက ကျေးရွာတိုင်းကို ဝင်ရောက်မီးရှို့ ဖျက်ဆီးတာကြောင့် ရွာအချင်းချင်း အကူအညီပေးဖို့ မလွယ်ကူတော့ဘူး။”
ဒေသကာကွယ်ရေးတပ်ဖွဲ့တွေအနေနဲ့လည်း လက်နက်ခဲယမ်း အကူအညီ လိုအပ်နေပြီး ပေါက်မြို့နယ် တောင်ပိုင်းကို ညီနောင်မဟာမိတ်တပ်ဖွဲ့တွေ ဝိုင်းဝန်းကူညီပေးကြဖို့ အကူအညီ တောင်းချင်တယ်လို့ ပေါက်တောင်ပိုင်း ပြောက်ပျားတပ်ဖွဲ့ရဲ့ တာဝန်ရှိသူတယောက်က ပြောပါတယ်။
"ကျနော်တို့မှာ စစ်ကောင်စီတပ်တွေနဲ့ ရင်ဆိုင်တိုက်ပွဲဆင်နွှဲဖို့ လက်နက်အင်အား ကွာခြားတာကြောင့် လက်ပိုက်ကြည့်နေရတဲ့ အခြေနေ ဖြစ်နေတယ်။ ပေါက်မြို့နယ် တောင်ပိုင်းက ကျေးရွာတွေကို စစ်ကောင်စီတပ်တွေက တရွာပြီးတရွာ ဆက်တိုက် မီးရှို့ဖျက်ဆီးနေတယ်။ အတတ်နိုင်ဆုံးတော့ ပြည်သူလူထု ထိခိုက်မှုမရှိအောင် ကူညီစောင့်ရှောက်ပေးပြီး ပြောက်ကျားနည်းစနစ်နဲ့ ဆက်လက်တိုက်ပွဲဝင်နေတယ်။"
ပေါက်မြို့နယ် ပ.က.ဖကတော့ စစ်ဘေးရှောင်ပြည်သူတွေနဲ့ မီးဘေးသင့် ပြည်သူတွေအတွက် ကျပ်သိန်း ၅၀ မတည်လှူဒါန်းမှာ ဖြစ်သလို ပြည်တွင်းပြည်ပက အလှူရှင်တွေအနေနဲ့လည်း Page messenger ကနေတဆင့် မိမိတို့တတ်နိုင်သရွေ့ ဆက်သွယ်လှူဒါန်းပေးကြဖို့ မေတ္တာရပ်ခံထားပါတယ်။
စစ်ကောင်စီတပ်တွေ စစ်ကြောင်းထိုးတာကြောင့် ပေါက်မြို့နယ်တောင်ပိုင်း၊ ပခုက္ကူမြို့နယ်၊ ဆိပ်ဖြူမြို့နယ်အစပ်က ကျေးရွာပေါင်း ၇၀ ကျော်က ဒေသခံပြည်သူတွေဟာ ဘေးလွတ်ရာကို ထွက်ပြေးနေကြရပြီး အပြစ်မဲ့ပြည်သူ ၁၃ ယောက်ကို စစ်ကောင်စီတပ်တွေနဲ့ ပျူစောထီးတွေ သတ်ဖြတ်သွားတယ်လို့ သိရပါတယ်။
