အမေရိကန်သမ္မတဟောင်း ဘားရက်ခ် အိုဘားမား ၂၀၁၇ သမ္မတရာထူးပြီးဆုံးပြီးနောက် ပထမဆုံးအကြိမ် အိမ်ဖြူတော်ကို ဧပြီ ၅ ရက်နေ့က ပြန်ရောက်ရှိလာပါတယ်။

သူလက်မှတ်ရေးထိုးခဲ့တဲ့ ကျန်းမာရေးစောင့်ရှောက်မှု ဥပဒေအကြောင်း ဆွေးနွေးဖို့နဲ့ သူ့ရဲ့လုပ်ဖော်ကိုင်ဘက်ဟောင်း သမ္မတဂျိုးဘိုင်ဒင်ကို ဂုဏ်ပြုဖို့ ရောက်ရှိလာတာပါ။

အိုဘားမားကို အုပ်ချုပ်ရေးအဖွဲ့ဝန်ထမ်းတွေနဲ့ ကွန်ဂရက်အဖွဲ့ဝင်တွေက လက်ခုပ်တီး ကြိုဆိုကြပါတယ်။ အိုဘားမားက ဂျိုးဘိုင်ဒင်ကို ‘ကျနော့်ရဲ့ဒုတိယသမ္မတ’ လို့ အရွှန်းဖောက်ခေါ်ခဲ့ပြီး နောက်မှ သမ္မတကြီးလို့ ပြောပြီး အလေးပြုခဲ့ပါတယ်။

ဒုသမ္မတ ကာမလာဟဲရစ်က သမ္မတအိုဘားမားလက်ထက် ပြဋ္ဌာန်းခဲ့တဲ့ ကျန်းမာရေးစောင့်ရှောက်မှုဥပဒေ ‘Affordable Care Act’ ဟာ အမေရိကန်နိုင်ငံ မျိုးဆက်များစွာကာလအတွင်း အကျိုးအများဆုံး ကျန်းမာရေးဥပဒေပါလို့ ချီးကျူးခဲ့ပါတယ်။ အိုဘားမားကလည်း သူ့သမ္မတ သက်တမ်းအတွင်း အမှတ်ရဆုံး လုပ်ရပ်ပါလို့ ပြောပါတယ်။

ဒီဥပဒေက ကျန်းမာရေးအာမခံကုမ္ပဏီတွေရဲ့ အမြတ်ထုတ်မှုကနေ လူသန်းများစွာရဲ့ ကျန်းမာရေးနဲ့ အသက်ကို ကာကွယ်ပေးနိုင်ခဲ့တယ်လို့ ဆိုပါတယ်။

လက်ရှိအချိန်ထိ အိုဘားမားက လူအများကြား ပေါ်ပြူလာဖြစ်နေပေမဲ့ သမ္မတဂျိုးဘိုင်ဒင်က ပြီးခဲ့တဲ့လ လူထုစစ်တမ်းတွေအရ ငွေကြေးဖောင်းပွမှုမြင့်တက်မှုကြောင့် လူကြိုက်နည်းလာနေပါတယ်။

အမေရိကန်သမ္မတဟောင်း အိုဘားမားက ဒီဇင်ဘာ ၂၆ ရက်နေ့မှာ ကွယ်လွန်သွားတဲ့ တောင်အာဖရိက ခရစ်ယာန်ဘုန်းတော်ကြီး ငြိမ်းချမ်းရေးနိုဘယ်လ်ဆုရှင် ဒတ်စမွန်တူးတူးဟာ “သူ့ရဲ့ လမ်းညွှန်ဆရာနဲ့ မိတ်ဆွေဖြစ်ပြီး ကျင့်ဝတ်ဆိုင်ရာ အားကျအတုယူရသူ” ပါလို့ ဂုဏ်ပြုစကား ပြောလိုက်ပါတယ်။

ဘုန်းတော်ကြီးတူးတူးဟာ လူဖြူ လူနည်းစု ကြီးစိုးမှုကို ဆန့်ကျင်လှုပ်ရှားခဲ့သူဖြစ်ပြီး ကွန်လွန်ချိန်မှာ အသက် ၉၀ ရှိပါပြီ။

အိုဘားမားက “ငြိမ်းချမ်းရေးနိုဘယ်လ်ဆုရှင် တူးတူးဟာ ကမ္ဘာလုံးဆိုင်ရာ စိတ်ဓာတ်ရှိသူပါ။ သူ့တိုင်းပြည် လွတ်မြောက်ရေးနဲ့ တရားမျှတရေး ကြိုးပမ်းမှုမှာ အခြေပြုထားပြီး၊ ကမ္ဘာ့ပေါ်ရှိ မတရားမှုတိုင်းကို ဆန့်ကျင်ဝေဖန်ခဲ့သူပါ” လို့ ပြောပါတယ်။

၂၀၁၃ မှာ သမ္မတအိုဘားမားက တောင်အာဖရိက ကိပ်တောင်းမြို့ရှိ ဘုန်းတော်ကြီး ထူထောင်ထားတဲ့ HIV Foundation Center ကို သွားရောက်ခဲ့ပါတယ်။ အဲဒီနှစ် ကိပ်တောင်းကိုရောက်လာတဲ့ သမ္မတကတော် မီရှဲအိုဘားမားနဲ့လည်း အားကစားရုံက ကလေးတွေကို  အတူသွားပြီး အားပေးခဲ့ပါတယ်။

၁၉၈၄ မှာ တူးတူးဟာ အသားအရောင်ခွဲခြားမှုအပေါ် အကြမ်းမဖက်ဆန့်ကျင်ရေး ကြိုးပမ်းခဲ့မှုအတွက် ငြိမ်းချမ်းရေး နိုဘယ်လ်ဆု ချီးမြှင့်ခံရပါတယ်။ နောက်ဆယ်နှစ်အကြာမှာ လူဖြူအာဏာရှင်အစိုးရ ကျူးလွန်ခဲ့တဲ့ ရက်စက်ယုတ်မာမှုတွေကို ဖော်ထုတ်ဖို့ အမှန်တရားနဲ့ အမျိုးသားပြန်လည်သင့်မြတ်ရေးကော်မရှင် ဥက္ကဋ္ဌ တာဝန်ယူခဲ့ပါတယ်။

ပွင့်ပွင့်ရှင်းရှင်းပြောတတ်တဲ့ ဘုန်းတော်ကြီးဟာ လူဖြူ-လူမည်း ကွဲပြဲနေတဲ့ တောင်အာဖရိကနိုင်ငံမှာ အမျိုးသားပြန်လည်သင့်မြတ်ရေးစိတ်ဓာတ် မြှင့်တင်ပေးခဲ့သူပါ။ လူဖြူလူနည်းစုအာဏာရှင်စနစ် ဆန့်ကျင်ရေးတရားတွေ ဟောခဲ့ပြီး တရားမျှတသောာတောင်အာဖရိက ပေါ်ထွန်းရေးအတွက် မရပ်မနား လှုပ်ရှားခဲ့သူ ဖြစ်ပါတယ်။