မန္တလေးပညာရေး ဒီဂရီကောလိပ် ကျောင်းသားများသမဂ္ဂ (ဗကသများအဖွဲ့ချုပ်) အဖွဲ့ဝင် ကိုအောင်နိုင်သူကို စက်တင်ဘာ ၁ ရက်က အိုးဘိုထောင်တွင်းတရားရုံးက ထောင်ဒဏ် ၃ နှစ် အမိန့်ချမှတ်ခဲ့ပါတယ်။
ကိုအောင်နိုင်သူဟာ ၂၀၂၁ ခုနှစ် မေလ ၁၂ ရက်က မန္တလေး ဆန္ဒပြသပိတ်စစ်ကြောင်း ဖြိုခွင်းခံရချိန်မှာ အဖမ်းဆီးခံလိုက်ရပြီး ပုဒ်မ ၅၀၅ ( က) နဲ့ တရားစွဲဆို အမိန့်ချခံခဲ့ရတာပါ။
ကိုအောင်နိုင်သူဟာ ကျောင်းသားထုအခွင့်ရေးနဲ့ စစ်အာဏာရှင်ဆန့်ကျင်ရေးလှုပ်ရှားမှုတွေမှာ အစဥ်အမြဲ ဦးဆောင်ပါဝင်ခဲ့တဲ့အပြင် ဖမ်းဆီးထိန်းသိမ်းခံခဲ့ရပြီးနောက်မှာလည်း အိုးဘိုအကျဉ်းထောင်တွင်း ဆန္ဒပြပွဲဦးဆောင်ပါဝင်ခဲ့တယ်လို့ ဗကသများအဖွဲ့ချုပ်က ထုတ်ပြန်ထားပါတယ်။
ဒီလို အိုးဘိုအကျဉ်းထောင်တွင်းဆန္ဒပြပွဲဦိးဆောင်ပါဝင်ခဲ့တာကြောင့် ဩဂုတ်လက စတင်ပြီး စက်တင်ဘာ ၂ ရက်အထိ တိုက်ပိတ်ခံထားရဆဲဖြစ်တယ်လို့ သိရပါတယ်။
ထောင်တွင်းဆန္ဒပြပွဲတွင် ထောင်အာဏာပိုင်တို့ရဲ့ရိုက်နှက်မှုကြောင့် စက်တင်ဘာ ၁ ရက်နေ့ ထောင်တွင်းတရားရုံး ရုံးထုတ်မှာ Wheel Chair နဲ့ ရုံးထုတ်ခဲ့ရတယ်လို့ ဗကသများအဖွဲ့ချုပ်ရဲ့ ထုတ်ပြန်ချက်မှာ ဖော်ပြထားပါတယ်။
