နိုင်ငံတကာရေပိုင်နက်ထဲက အိုမန်ပင်လယ်ကွေ့မှာ ဧပြီ ၂၇ ရက်က မာရှယ်ကျွန်းစု အလံတပ်ထားတဲ့ ရေနံတင်သင်္ဘောတစီးကို အီရန်က ဖမ်းဆီးလိုက်ကြောင်း အမေရိကန်ရေတပ်က ပြောပါတယ်။

Refinitiv သင်္ဘောခြေရာခံ ဒေတာအရ အမေရိကန်ရေတပ်က Advantage Sweet ရေယာဉ်အဖြစ် သတ်မှတ်ထားတဲ့ အဲဒီသင်္ဘောဟာ ရှက်ဗရွန် ရေနံကုမ္ပဏီကြီးဆီကနေ စင်းလုံးငှားပြီး ကူဝိတ်မှာ နောက်ဆုံးဆိုက်ကပ်ခဲ့တဲ့ စူးအက်-မက်ခ်စ် ရေနံစိမ်းတင်သင်္ဘော ဖြစ်နေတာပါ။

သူ့ရဲ့မန်နေဂျာအဖြစ် စာရင်းသွင်းထားတဲ့ တူရကီအခြေစိုက် ဂျီနလ် ဒဲနစ်ဇ်စီလစ်ခ် နက်ခ်လီယာတီ AS ကုမ္ပဏီကတော့ မှတ်ချက်ပေးဖို့ တောင်းဆိုချက်ကို ချက်ချင်းတုံ့ပြန်ခြင်း မရှိပါဘူး။

ဘာရိန်းပင်လယ်ကွေ့မှာ အမှတ် ၅ ရေတပ်ကို အခြေစိုက်ထားတဲ့ အမေရိကန်ရေတပ်က ရေနံတင်သင်္ဘောကို ချက်ချင်းလွှတ်ပေးဖို့ အီရန်ရဲ့ အစ္စလာမ္မစ် တော်လှန်ရေး အစောင့်တပ်ဖွဲ့ရေတပ် (IRGCN) ကို တောင်းဆိုခဲ့ပါတယ်။

အဲဒီသင်္ဘောဟာ ဖမ်းဆီးခံရချိန်မှာ ဘေးဒုက္ခရောက်နေကြောင်း အကူအညီ တောင်းခံခေါ်ဆိုမှုတခု ထုတ်ပြန်ခဲ့ကြောင်း အမေရိကန်ရေတပ်က ဖော်ပြထားပါတယ်။

“ရေယာဉ်တွေကို အီရန်ရဲ့ ဆက်နှောင့်ယှက်နေမှုတွေနဲ့ ဒေသတွင်း ရေကြောင်းသွားလာရေး ဆိုင်ရာ အခွင့်အရေးတွေကို စွက်ဖက်ခြင်းဟာ ပင်လယ်ရေကြောင်း လုံခြုံရေးနဲ့ ကမ္ဘာ့စီးပွားရေးကို ခြိမ်းခြောက်မှုတခု ဖြစ်ကြောင်း” အမေရိကန်ရေတပ်က ပြောပါတယ်။

အီရန်ဟာ ပြီးခဲ့တဲ့ ၂ နှစ်အတွင်း အရှေ့အလယ်ပိုင်းမှာ စီးပွားဖြစ် ကုန်သွယ်သင်္ဘောတွေ ၅ စင်းထက်မနည်းကို တရားမဝင် ဖမ်းဆီးခဲ့ကြောင်းလည်း ထပ်လောင်းပြောပါတယ်။

ရိုက်တာသတင်းဌာနရဲ့ မှတ်ချက်ပေးဖို့ တောင်းဆိုချက်ကို အီရန်အာဏာပိုင်တွေက ချက်ချင်းတုံ့ပြန်ခြင်း မရှိပါဘူး။

အီရန်နိုင်ငံပိုင် ရုပ်မြင်သံကြား IRIB သတင်းဌာနက သူ့ရဲ့တယ်လီဂရမ်ချန်နယ်ကနေ အီရန်ရေတပ်ဟာ မာရှယ်ကျွန်းစုအလံတပ် သင်္ဘောတစင်းကို သိမ်းဆည်းရမိခဲ့ကြောင်း ဖော်ပြခဲ့ပေမဲ့ အသေးစိတ် အချက်အလက်တွေကိုတော့ ပြောကြားခြင်း မရှိပါဘူး။

၂၀၁၉ ခုနှစ်ကတည်းက အမေရိကန်နဲ့ အီရန်တို့ကြား တင်းမာနေချိန်မှာ မဟာဗျူဟာကျတဲ့ ပင်လယ်ကွေ့ရေပြင်မှာ စီးပွားဖြစ်သင်္ဘောတွေကို ဆက်တိုက်ဖမ်းဆီးမှုတွေနဲ့ သင်္ဘောတွေကို တိုက်ခိုက်မှုတွေ ဆက်တိုက်ဖြစ်ပွားခဲ့ပြီး အခုဖြစ်ရပ်က နောက်ဆုံးကြုံရတာ ဖြစ်ပါတယ်။

အီရန်နဲ့ အမေရိကန်တို့ကြား တင်းမာမှု မြင့်တက်နေချိန်မှာပဲ အီရန်စစ်တပ်ဟာ နှစ်စဉ် လုပ်တဲ့  စစ်ရေးလေ့ကျင့်မှုကို  ဟောဇ်မုခ်ရေလက်ကြားအနီး  အိုမန်ပင်လယ်ကွေ့မှာ စက်တင်ဘာ  ၁၀  ရက်က စတင်ခဲ့ပါတယ်။   ၃ ရက်ကြာလုပ်မယ့်ဒီ စစ်ရေးလေ့ကျင့်မှုဟာ နိုင်ငံခြားခြိမ်းခြောက်မှုတွေနဲ့ ဖြစ်နိုင်ဖွယ်  ကျူးကျော်မှုကို ရင်ဆိုင်မယ့် အီရန်ရဲ့စစ်ရေးစွမ်းရည်ကို ပိုမိုကောင်းမွန်ဖို့ ရည်ရွယ်တယ်လို့ ဗိုလ်ချုပ်ကြီး ဟတ်ဘီဘိုလာဆာဒါရီက နိုင်ငံပိုင်ရုပ်သံကို ပြောကြားခဲ့ပါတယ်။   ဇိုဖာဂါ ၉၉ ဆိုတဲ့  စစ်ရေးလေ့ကျင့်မှုဟာ ရေငုပ်သင်္ဘောနဲ့ ဒရုန်းယာဉ်တွေပါ ပါဝင်တဲ့  ကြည်း၊ ရေ၊ လေ  ပူးပေါင်းစစ်ဆင်ရေး ဖြစ်ပါတယ်။    မကြာသေးခင်နှစ်တွေအတွင်း ပင်လယ်ကွေ့ဒေသမှာ  အီရန်တော်လှန်ရေး အစောင့်တပ်နဲ့ အမေရိကန်စစ်တပ်ကြား မကြာခဏ ထိပ်တိုက်တွေ့တာတွေ ဖြစ်ခဲ့ပါတယ်။   ပင်လယ်ကွေ့ဒေသမှာ အမေရိကန် နဲ့ အနောက်နိုင်ငံ ရေတပ်တွေရှိနေတာကို ဆန့်ကျင်တဲ့ အီရန်က ရေနံစိမ်းအားလုံးရဲ့ ၃၀ ရာခိုင်နှုန်းကို ရေကြောင်းနဲ့ တင်ပို့ရာ လမ်းကြောင်းဖြစ်တဲ့ ဟော်မုခ်ရေလက်ကြားမှာ နှစ်စဉ်နှစ်တိုင်း  စစ်ရေးလေ့ကျင့်တယ်လို့ ရိုက်တာက ဖော်ပြပါတယ်။