ဆွီဒင်နိုင်ငံက တုတ်ထောက်ခုန်အားကစားသမား အာမန်ဒပ်ပလန်းတစ်ဟာ သူကိုယ်တိုင် တင်ထားတဲ့ အရင်ကမ္ဘာ့စံချိန်ဟောင်းကို ကျော်ဖြတ်ပြီး ၆ ဒသမ ၂၂ မီတာအမြင့်နဲ့အတူ ဖေဖော်ဝါရီ ၂၅ ရက်က ကမ္ဘာ့စံချိန်သစ် တင်နိုင်ခဲ့ပါတယ်။
ပြင်သစ်နိုင်ငံ ကလယ်မွန့် ဖယ်ရန်မြို့မှာ ကျင်းပခဲ့တဲ့ ကမ္ဘာ့ပြေးခုန်ပစ် Indoor Tour Silver ပြိုင်ပွဲက တုတ်ထောက်ခုန် ကမ္ဘာ့စံချိန်ဟောင်း ၆ ဒသမ ၂၁ မီတာအမြင့်ကို ဒပ်ပလန်းတစ်ကပဲ ပိုင်ဆိုင်ထားတာပါ။
အသက် ၂၃ နှစ်အရွယ် အိုလံပစ်ချန်ပီယံဟာ ပထမကြိုးစားမှု နှစ်ကြိမ်စလုံးမှာ တန်းနဲ့တိုက်ခဲ့ပေမဲ့ တတိယအကြိမ်မှာတော့ တန်းကို အောင်အောင်မြင်မြင် ကျော်လွှားနိုင်ခဲ့တာကြောင့် ပရိသတ်လူအုပ်ကြီးက အားပေးရင်း ရုတ်ရုတ်သဲသဲ ဖြစ်သွားခဲ့ပါတယ်။
အမြင့်တန်းကိုကျော်ဖြတ်အပြီး မြေပြင်ပေါ်အကျမှာပဲ အောင်ပွဲခံမီးပန်းတွေ ထွက်ပေါ်လာကာ ၂၀၁၂ ခုနှစ်က အိုလံပစ်ချန်ပီယံဟောင်းတဦးဖြစ်တဲ့ ဒါရိုက်တာ ရီနို့ လယ်ဗေးနီကို ဒပ်ပလန်းတစ်က ပျော်ရွှင်မှုတွေနဲ့အတူ သွားရောက်ပွေ့ဖက်ခဲ့ပါတယ်။
ဒပ်ပလန်းတစ် ရွှေတံဆိပ်ဆုရရှိခဲ့တဲ့ အမေရိကန်နိုင်ငံ အောရီဂန်ပြည်နယ် ယူဂျင်းမြို့က ကမ္ဘာ့ချန်ပီယံရှစ်ပြိုင်ပွဲဆီသွားရာ လမ်းကြောင်းမှာ အရင်ကမ္ဘာ့စံချိန်ဟောင်းကို ပြီးခဲ့တဲ့နှစ်၊ ဇူလိုင်လကမှ တင်ထားခဲ့တာပါ။
စနေနေ့မှာ အခုလို စံချိန်အသစ်တင်နိုင်ခဲ့တာကြောင့် ဒါဟာ ဒပ်ပလန်းတစ်အတွက် ကစားသမားဘဝ ၆ ကြိမ်မြောက် ကမ္ဘာ့စံချိန်တခုဖြစ်သလို ၆ မီတာနဲ့အထက် တန်းကျော်လွှားမှုကိုလည်း ဒီ ဆွီဒင်နိုင်ငံသားက အကြိမ် ၆၀ မြောက်အထိ လုပ်ပြနိုင်ခဲ့ပြီ ဖြစ်ပါတယ်။
ဒီလအစောပိုင်းတုန်းက ဆွီဒင်နိုင်ငံ အူ(ပ်)ဆာလာမြို့က အိမ်ကွင်းပရိသတ်တွေရှေ့မှာ ၆ ဒသမ ၁၀ မီတာအမြင့်နဲ့အတူ ဒပ်ပလန်းတစ်အတွက် အကောင်းဆုံးရာသီအဖွင့်မှတ်တမ်းကိုပါ ပိုင်ဆိုင်နိုင်ခဲ့ပါတယ်။
အမျိုးသားအသင်းနဲ့ လုပ်ခလစာ သာတူညီမျှရရှိရေးအတွက် တောင်းဆိုတိုက်ပွဲဝင်နေတဲ့ ကနေဒါနိုင်ငံရဲ့ လက်ရွေးစင်အမျိုးသမီးဘောလုံးအသင်းဟာ အမေရိကန်မှာကျင်းပမယ့် SheBelieves ဖလားပြိုင်ပွဲမှာ ပါဝင်ယှဉ်ပြိုင်ကစားဖို့ လေ့ကျင့်ပြင်ဆင်နေပါတယ်။
အိုလံပစ်ချန်ပီယံ ကနေဒါအမျိုးသမီးအသင်းဟာ အမျိုးသားလက်ရွေးစင်ဘောလုံးအသင်းနဲ့ တန်းတူ လုပ်ခလစာ မရရှိဘူးဆိုရင် လာမယ့်အနာဂတ်မှာ သပိတ်မှောက် ဆန္ဒပြဖို့ ကတိပြု ဆုံးဖြတ်ထားတာကြောင့် ဒီတောင်းဆိုတိုက်ပွဲဝင်မှုကို အဆုံးသတ်ဖို့ အဝေးကြီးလိုသေးတယ်လို့ ကနေဒါအမျိုးသမီးအသင်း ကစားသမားတွေက ဖေဖော်ဝါရီ ၁၅ ရက် လေ့ကျင့်ခန်းအစီအစဉ်အပြီး ပြောပါတယ်။
ကနေဒါ၊ အမေရိကန်၊ ဘရားဇီးလ်နဲ့ ဂျပန် စတဲ့ နိုင်ငံအသင်း ၄ သင်း ပါဝင်ယှဉ်ပြိုင်ကစားသွားမယ့် SheBelieves ဖိတ်ခေါ်ဖလားပြိုင်ပွဲကို အမေရိကန်နိုင်ငံမှာ လက်ခံကျင်းပသွားမှာပါ။
ဒါဟာ လက်ရှိကမ္ဘာ့ဖလားချန်ပီယံ အမေရိကန် အမျိုးသမီးအသင်းအတွက်တော့ လာမယ့် ကမ္ဘာ့ဖလားပြိုင်ပွဲအတွက် ကြိုတင်ပြင်ဆင်မှုတရပ် ဖြစ်ပါတယ်။
ကနေဒါ အမျိုးသမီးရှေ့တန်းတိုက်စစ်မှူး ဂျနင်း ဘက်ခ်ကီက လာမယ့်ပြိုင်ပွဲအတွက် ပြင်ဆင်နေချိန်မှာပဲ အသင်းသားတွေအနေနဲ့ အတူတကွ ရပ်တည်နေကြောင်း ပြောပါတယ်။
ကနေဒါဘောလုံးအဖွဲ့ချုပ် (CSA) ဟာ ၂၀၂၁ ခုနှစ်မှာ အမျိုးသားဘောလုံးအစီအစဉ်အတွက် အမေရိကန်ဒေါ်လာ ၁၁ သန်းအထိ အသုံးပြုခဲ့ပေမဲ့ အမျိုးသမီးဘောလုံး အစီအစဉ်အတွက် ကိုတော့ ဒေါ်လာ ၅ ဒသမ ၁ သန်းသာ အသုံးပြုခဲ့တာ ဖြစ်ပါတယ်။
အလားတူ လုပ်ခလစာ သာတူညီမျှမှုရရှိဖို့ တောင်းဆိုတိုက်ပွဲဝင်ရာမှာ အောင်မြင်မှုရရှိခဲ့တဲ့ အမေရိကန် အမျိုးသမီးဘောလုံးအသင်းနဲ့ ကနေဒါ အမျိုးသားဘောလုံးအသင်းဆီက အားပေးထောက်ခံမှုတွေကို ရရှိခဲ့တယ်လို့လည်း အမျိုးသမီးအသင်းက ပြောပါတယ်။
လာမယ့် She Believes ဖလားဖိတ်ခါ်ပြိုင်ပွဲကို အမေရိကန်နိုင်ငံ အော်လန်ဒို၊ ဖလော်ရီဒါ၊ နက်စ်ဗီးလ်မြို့တို့အပြင် တက္ကဆက်ပြည်နယ်က နက်စ်ဗီးလ်မြို့နဲ့ ဖရစ္စကိုမြို့တို့မှာ ကျင်းပမှာပါ။
၂၀၁၁ ခုနှစ်က အမျိုးသမီးကမ္ဘာ့ဖလားကို အာရှတိုက်ကိုယ်စားပြု ပထမဆုံးရရှိခဲ့တဲ့ ဂျပန်အသင်းကလည်း ဒီဖိတ်ခေါ်ပြိုင်ပွဲကို ဝင်ရောက်ယှဉ်ပြိုင်ဖို့ ရှိပါတယ်။
