အီတလီနိုင်ငံမြောက်ပိုင်းက ဆာဗိုနာခရိုင်ထဲမှာ တောမီးလောင်နေတဲ့အတွက် လေယာဉ်သုံးပြီး ငြှိမ်းသတ်နေရပါတယ်။
တောမီးကို ကိုယ်တိုင် ဗွီဒီယိုရိုက်ကူးထားတဲ့ လီယွန်နယ် ဖတ်တွန် ဆိုတဲ့ အမျိုးသားက သူတို့မိသားစုတွေ အားလပ်ရက် အပန်းဖြေစခန်းချတဲ့အနားအထိ တောမီးကူးစက်လာလို့ အနားကဟိုတယ်ကို ပြောင်းရွှေ့ခဲ့ရတယ်လို့ ပြောပါတယ်။
အီတလီ မီဒီယာတွေမှာတော့ တောမီးလောင်ကျွမ်းနေတဲ့ အနီးနားမြို့က လူဦးရေ ၁၅၀ လောက်ကို နေရာပြောင်းရွှေ့ ကယ်ထုတ်ခဲ့ရတယ်လို့ ဖော်ပြကြပါတယ်။
အခုအချိန်ဟာ ဥရောပ နွေရာသီဖြစ်တဲ့အတွက် ဥရောပတခွင် တောမီးလောင်ကျွမ်းနေတာ သမိုင်းမှာ ဒုတိယအဆိုးဆုံးအဖြစ် မှတ်တမ်းဝင်သွားပြီလို့ ဥရောပ ပူးတွဲသုတေသနစင်တာက ဆိုပါတယ်။
ဒီနှစ်နွေမှာ ဥရောပနိုင်ငံတွေ အတော်များများဟာ တောမီးဘေးနဲ့ ကြုံနေရပြီး လူထောင်ချီ နေရာပြောင်းရွှေ့ရ၊ အိမ်တွေ၊ စီးပွားရေးလုပ်ငန်းတွေ ပျက်စီးခဲ့ပါတယ်။
