လာမယ့်နိုဝင်ဘာကျရင် ကာတာမှာ ကျင်းပမယ့် ကမ္ဘာဖလားမှာ အီရန်အသင်းကို ပယ်ထားဖို့ အီရန် အမျိုးသမီးအခွင့်အရေးလှုပ်ရှားတဲ့ Open Stadiums အဖွဲ့က ကမ္ဘာ့ဘောလုံး အဖွဲ့ချုပ်(ဖီဖာ) ဥက္ကဋ္ဌထံစာရေး တောင်းဆိုလိုက်ပါတယ်။
အီရန်အစိုးရဟာ အမျိုးသမီးတွေအပေါ်မှာ ခွဲခြားနှိမ်ချတာကြောင့် အခုလို တောင်းဆိုရတာလို့ ဆိုပါတယ်။
အီရန်အာဏာပိုင်တွေဟာ ဖီဖာအဖွဲ့က ဘယ်လိုပဲဖိအားပေးနေပေမယ့် အမျိုးသမီးတွေကို ဘောလုံးပွဲကြည့်ရှုခွင့်မပေးသေးဘူးလို့ ဆိုပါတယ်။
Open Stadiums အဖွဲ့ဟာ အီရန်မှာ အမျိုးသမီးတွေ ဘောလုံးပွဲကြည့်ခွင့်ရဖို့ လှုံ့ဆော်နေတာ ဆယ်စုနှစ်တခုရှိခဲ့ပြီး အခုအချိန်အထိ မအောင်မြင်သေးပါဘူး။
အီရန်အသင်းဟာ ဒီနှစ် ကာတာကမ္ဘာ့ဖလားနဲ့ပါဆိုရင် ကမ္ဘာ့ဖလားမှာ ဝင်ပြိုင်ခွင့်ရတာ ၆ ကြိမ်ဖြစ်ပြီ၊ အင်္ဂလန်၊ ဝေလ၊ အမေရိကန်အသင်းတို့နဲ့ တအုပ်စုတည်း ကျနေပါတယ်။
