အမေရိကန်ပြည်ထောင်စု၊ အီလီနွိုက်ပြည်နယ် တောင်ပိုင်းရှိ အင်တာစတိတ် အမှတ် ၅၅ မှာ မေလ ၁ ရက်က ဖုန်မှုန့် မုန်တိုင်းတိုက်ခတ်မှုကြောင့် လူအများအပြား သေဆုံးပြီး လူပေါင်းဒါဇင်နဲ့ချီ ဒဏ်ရာရရှိခဲ့ကြောင်း ပြည်နယ်ရဲတပ်ဖွဲ့က ပြောပါတယ်။
အီလီနွိုက်ပြည်နယ်၊ ဒေးဗားနင်ကျေးရွာမှာ မနက် ၁၁ နာရီ ထိုးပြီးလောက်ချိန်မှာ ကုန်တင်ကားတွေ၊ ကားတွေလည်း တိုးတိုက်စုပုံလာမှုကြောင့် ယာဉ်ကြောရှုပ်ထွေးမှု ဖြစ်ပွားခဲ့ပြီး အကြမ်းဖျင်းအားဖြင့် ခရီးသည်တင်ကား အစီး ၄၀ ကနေ ၆၀ လောက်ထိနဲ့ ၁၈ ဘီးကား နောက်တွဲကုန်တင်ယာဉ်တပိုင်း ထရပ်ကားကြီးတွေလည်း အဲဒီအစုအပြုံထဲမှာ အများအပြား ပါဝင်ခဲ့ကြောင်း ပြည်နယ် ရဲတပ်ဖွဲ့ ပြောရေးဆိုခွင့်ရှိသူက သတင်းစာရှင်းလင်းပွဲမှာ ပြောပါတယ်။
ဒဏ်ရာရရှိသူ ၃၀ လောက်ကို ဒေသဆိုင်ရာဆေးရုံတွေကို ပို့ဆောင်ခဲ့ကြောင်းလည်း ပြောရေးဆိုခွင့်ရှိသူက ပြောပါတယ်။
ထရပ်ကားတွေထဲမှာ ၂ စီးက မီးလောင်ခဲ့ပြီး တစီးက ပေါက်ကွဲခဲ့တာ ဖြစ်နိုင်ကြောင်းလည်း ဆိုပါတယ်။
ဒီလိုယာဉ်တွေ ဝင်တိုက်စုပုံမှုကြောင့် သေဆုံးမှု၊ ဒဏ်ရာရရှိမှုတွေနဲ့ ပတ်သက်ပြီး တရားဝင်သတင်းတွေတော့ မထွက်ပေါ်လာသေးပါဘူး။ အဝေးပြေးလမ်းရဲ့ လမ်းကြောင်း ၂ ခု လုံးကို နာရီများစွာကြာအောင် ပိတ်ထားဆဲ ဖြစ်ပါတယ်။
ဒေသဆိုင်ရာ အာဏာပိုင်တွေရဲ့ ပြောကြားချက်အရ ယာဉ်တွေ စုပုံတိုက်မိမှုမှာ ပါဝင်ပတ်သက်သူတွေနဲ့ သူတို့ရဲ့ မိသားစုတွေအတွက် ဒေးဗားနင်ကျေးရွာရဲ့ မြို့တော်ခန်းမကို အသုံးပြုထားကြောင်း သိရပါတယ်။
