ရုရှားကျူးကျော်မှုဒဏ်ခံနေရတဲ့ ယူကရိန်းအတွက် ဥရောပသမဂ္ဂ (အီးယူ) က ဘဏ္ဍာရေးနဲ့ စစ်ရေးအထောက်အပံ့တွေ ဆက်ပံ့ပိုးပေးဖို့ အီးယူနိုင်ငံခြားရေးဝန်ကြီးတွေက ဇူလိုင် ၁၈ မှာ တောင်းဆိုခဲ့ပါတယ်။

အစားအစာနဲ့ စွမ်းအင်ဈေးနှုန်းတွေ မြင့်တက်နေပေမယ့် ရုရှားအပေါ် ပိတ်ဆို့အရေးယူမှုဟာ မှန်ကန်တဲ့ ဆုံးဖြတ်ချက်ဖြစ်ကြောင်းလည်း အီးယူရဲ့ နိုင်ငံခြားရေးနဲ့ လုံခြုံရေးမူဝါဒရုံးအကြီးအကဲ ဂျိုးဆက်ဖ် ဘော်ရယ်က အစည်းအဝေး မတိုင်မီ ပြောခဲ့ပါတယ်။

"ပိတ်ဆို့အရေးယူမှုဟာ အမှားအယွင်းတခုလို့ ဥရောပခေါင်းဆောင်တချို့က ပြောနေကြတယ်။ အဲဒါက အမှားတခုလို့ ကျနော်မထင်ပါဘူး။ အဲဒါက ကျနော်တို့ လုပ်ရမယ့်အရာဖြစ်ပြီး ဆက်လုပ်ရမယ့်အရာပဲ" လို့ ဂျိုးဇက်ဘော်ရယ်က သတင်းထောက်တွေကို ပြောပါတယ်။

ယူကရိန်းနိုင်ငံထဲက အိုဒက်ဆာနဲ့ တခြားဆိပ်ကမ်းတွေကို ပိတ်ဆို့ထားတဲ့ကိစ္စဟာ သီတင်းပတ် ကုန်ရက်မှာ သဘောတူညီမှုရဖို့ မျှော်လင့်တယ်လို့လည်း သူက ပြောပါတယ်၊

"ရေရှည်မှာ ယူကရိန်းဘက်က ရပ်တည်သွားမယ်ဆိုတာ ပြသဖို့ အရေးကြီးတယ်။ ရုရှားက ကျမတို့ကို ခြေကုန်လက်ပန်းကျ သွားအောင် ကြိုးစားနေတယ်။ ဥရောပနဲ့ အတ္တလန္တိတ်ဖြတ်ကျော် စည်းလုံးညီညွတ်မှုနဲ့အတူ ရုရှားရဲ့ လုပ်ရပ်ကို ရှင်းရှင်း လင်းလင်း ဆန့်ကျင်နေပါတယ်” လို့ ဂျာမနီရဲ့  အီးယူရေးရာဝန်ကြီး အန်နာ လွယ်အာမန်က ပြောပါတယ်။

ယူကရိန်းနိုင်ငံဆီကို လက်နက်တွေ ထောက်ပံ့ဖို့ အီးယူက နောက်ထပ် ယူရို သန်း ၅၀၀ ထောက်ပံ့မှုကို အတည်ပြုဖို့ ရှိနေပါတယ်။

ပြီးခဲ့တဲ့ ဖေဖော်ဝါရီ ၂၄ ရက်က ယူကရိန်းဆီ ရုရှားတပ်တွေ စေလွှတ်တိုက်ခိုက်ပြီးတဲ့နောက် ယူကရိန်းနိုင်ငံဆီ အီးယူကပေးတဲ့ လုံခြုံရေးအထောက်အပံ့ ယူရို ၂ ဘီလီယံ ဖြစ်သွားခဲ့ပါတယ်။

ရုရှားနိုင်ငံမှ ရွှေတင်သွင်းခွင့် ပိတ်ပင်ထားပါတယ်။ 

ယူကရိန်းနိုင်ငံခြားရေးဝန်ကြီး ဒီမီထရို ကူလီဘာဟာ ဇူလိုင် ၁၈ ရက်နှောင်းပိုင်းမှာ အီးယူဝန်ကြီး ၂၇ ဦးကို ဗွီဒီယိုကွန်ဖရင့်ကတဆင့် မိန့်ခွန်းပြောမှာဖြစ်ပြီး ရုရှားအပေါ် ဒဏ်ခတ်ပိတ်ဆို့မှုတွေ၊ နောက်ထပ် လက်နက်တွေနဲ့ ရုရှားနိုင်ငံအပေါ် တင်းမာသောစည်းမျဥ်းတွေ ထပ်ချရေး တောင်းဆိုဖို့ အီးယူသံတမန်တွေက မျှော်လင့်ထားကြပါတယ်။