ရခိုင်ပြည်နယ်၊ ရသေ့တောင်မြို့မှာ ရက္ခိုင့်တပ်တော် (အေအေ) တပ်ဖွဲ့ဝင် ၂ ဦး လက်နက်နဲ့အတူ ထွက်ပြေးစဉ် ရက္ခိုင့်တပ်တော်က အင်အားအလုံးအရင်းနဲ့ ပြန်လည်လိုက်ဖမ်းရာမှာ အပြန်အလှန်ပစ်ခတ်မှုတွေ ရှိခဲ့တယ်လို့ ရသေ့တောင်မြို့ခံတွေက ပြောပါတယ်။

အေအေတပ်ဖွဲ့ဝင် ၂ ဦးဟာ လက်နက်တွေနဲ့အတူ ဧပြီ ၂၃ ရက်မှာ ရသေ့တောင်မြို့ပေါ်ကို ထွက်ပြေးလာတာဖြစ်ပြီး ၂၄ ရက် မနက်ပိုင်းမှာ အေအေတပ်ဖွဲ့ဝင်တွေက အင်အားအလုံးအရင်းနဲ့ ပြန်လည်ဖမ်းဆီးခဲ့တာလို့ ရသေ့တောင်မြို့ခံတဦးက ပြောပါတယ်။

“သူတို့ကို ALP က အရာရှိတဦးက စည်းရုံးပြီး ခေါ်လာတာလို့ သိရတယ်။ သူတို့ ရသေ့တောင်ဆေးရုံ ဝန်ထမ်းအိမ်ရာမှာ ပုန်းခိုနေကြတာ။ အဲဒီကို အေအေတပ်ဖွဲ့ဝင်တွေက အင်အား ၁၀၀ နဲ့ဝိုင်းပြီးတော့ ဖမ်းဆီးဖို့လုပ်ရာမှာ အပြန်အလှန်ပစ်ခတ်မှု ဖြစ်ပွားကြတာ။ စပြီးပစ်ခတ်ကြတာကတော့ မနက် ၅ နာရီခွဲလောက်မှာ ပစ်ခတ်ကြတာ။ သေနတ်သံကတော့ ၁၀ ချက်နဲ့ အထက်လောက်ကြားလိုက်ရတယ်။ နောက် ဗုံးပေါက်ကွဲသလိုမျိုး ပေါက်ကွဲသံ ၂ ချက် ကြားလိုက်ရတယ်။ သူတို့ကို အခု မနက် ၈ နာရီကျော်လောက်မှာ အေအေ ဖမ်းဆီးသွားပြီလို့ သိရတယ်။”

အေအေတပ်ဖွဲ့ဝင်တွေကို စည်းရုံးခေါ်ဆောင်ခဲ့တဲ့ ALP က အရာရှိဟာ အေအေက ဖမ်းဆီးထောင်ချထားရာကနေ အခုနှစ် နှစ်သစ်ကူးမှာ လွတ်ငြိမ်းချမ်းသာခွင့်နဲ့ ပြန်လွှတ်ပေးလိုက်တာဖြစ်တယ်လို့ သိရပါတယ်။

အေအေတပ်ဖွဲ့က ပစ်ခတ်ဖမ်းဆီးမှု ပြုလုပ်ရာမှာ ရပ်ကွက်အနီးရှိ ဒေသခံတွေကို ယာယီဖယ်ပြီးမှ ပစ်ခတ်ဖမ်းဆီးခဲ့ကြတာဖြစ်ပြီး အရပ်သားထိခိုက်မှုမရှိဘူးလို့ မြို့ခံတွေက ပြောပါတယ်။

အခုလို ပစ်ခတ်ဖမ်းဆီးမှုနဲ့ပတ်သက်ပြီး အသေးစိတ်သိရဖို့ အေအေရဲ့ ပြောရေးဆိုခွင့်ရှိသူကို ဆက်သွယ်နေဆဲ ဖြစ်ပါတယ်။

ရခိုင်ဒေသမှာ ဖြစ်ပွားခဲ့တဲ့တိုက်ပွဲတွေအတွင်း ထိခိုက်ဒဏ်ရာရရှိခဲ့ကြတဲ့ ရက္ခိုင့်တပ်တော်(AA) တပ်ဖွဲ့ဝင်တွေအတွက် ဆေးကုသပေးခဲ့ကြတဲ့ နွေဦးတော်လှန်ရေးမှဆေးလောကသားတွေကို  ဖိတ်ကြားဂုဏ်ပြုသွားမယ်လို့ အေအ ဒုစစ်ဉီးစီးချုပ် ဒေါက်တာညိုထွန်းအောင်က ပြောပါတယ်။

"နွေဦးတော်လှန်ရေးထဲက ဆရာဝန်တွေ၊ သူနာပြုတွေနဲ့ ဆေးလောကသားတွေ CDM ပြုလုပ်ပြီး အေအေနဲ့ နီးစပ်တဲ့ဒေသတွေမှာ လာရောက်ခိုလှုံနေကြတာတွေရှိတယ်။ သူတို့က ရခိုင်က တိုက်ပွဲတွေမှာ ဒဏ်ရာရှိခဲ့တဲ့ ကျနော်တို့ရဲ့ အေအေ တပ်ဖွဲ့ဝင်တွေကို ဆေးဝါးကုသပေးခဲ့တာတွေများစွာရှိခဲ့တယ်။​ အဲ့ဒါကြောင့် အချိန်ကာလတခုမှာ ULA အစိုးအနေနဲ့ အဆင်မြင့် အခမ်းအနားတွေမှာ သူတို့ကိုဖိတ်ကြားဂုဏ်ပြုသွားမှာဖြစ်တယ်။"

ဇန်နဝါရီ ၂၀ ရက်က အွန်လိုင်းကနေ ကျင်းပတဲ့  “မြန်မာ့တော်လှန်ရေးနှင့် ဆေးလောကသားများ၏ အခန်းကဏ္ဍ”ဆွေးနွေးပွဲမှာ ဒေါက်တာညိုထွန်းအောင်က ပြောကြားလိုက်တာပါ။

အာဏာရှင်တော်လှန်ရေး ဆက်လက်တိုက်ပွဲဝင်နေကြတဲ့ မြန်မာ့ဆေးလောကသားများ အားလုံးကိုလည်း ULA/AA အနေနဲ့ ဒီနေရာက လေးလေးနက်နက်၊ လှိုက်လှိုက်လဲလဲဂုဏ်ပြု မှတ်တမ်းတင်ထားကြောင်း ဒေါက်တာညိုထွန်းအောင်က ပြောဆိုခဲ့ပါသေးတယ်။

ဒေါက်တာ ညိုထွန်းအောင်ဟာ ဆေးတက္ကသိုလ်(၂) ရန်ကုန်မှာ ဆေးပညာသင်ယူခဲ့ပြီး၊ ၂၀၀၉ ခုနှစ်မှာ ဗိုလ်ချုပ် ထွန်းမြတ်နိုင်နဲ့ အတူ ရက္ခိုင့်တပ်တော်(AA)ကို ဦးဆောင်ကာ ရခိုင်အမျိုးသားတွေရဲ့ အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့်၊ ဂုဏ်သိက္ခာရှိ ရက္ခိုင့်လူ့ဘောင်တစ်ခုကို ထူထောင်ရေး ဦးဆောင်တိုက်ပွဲဝင်နေသူ ဖြစ်ပါတယ်။

“မြန်မာ့တော်လှန်ရေးနှင့် ဆေးလောကသားများ၏ အခန်းကဏ္ဍ”အစီအစဉ်မှာ NUG အစိုးရ ကျန်းမာရေးနှင့်ပညာရေးဝန်ကြီး ဒေါက်တာဇော်ဝေစိုးအပါအဝင် နွေဉီးတော်လှန်ရေးမှာ အင်တိုက်အားတိုက်ပါဝင်နေကြတဲ့ ‌ဆေးလောကသားတွေ တက်ရောက်ခဲ့ကြပါတယ်။