မွန်ပြည်နယ်၊ ရေးမြို့နယ်၊ မော့ကနင်ကျေးရွာအုပ်စု၊ ရွာသာယာရပ်ကွက်က ကျိုက်ဝယ်နွဲသွားလမ်းဘေးခြံထဲက ရေတွင်းမှာ ဖေဖော်ဝါရီ ၄ ရက် မွန်းလွဲ ၂ နာရီခွဲလောက်က ခြံလုပ်သား အမျိုးသားတယောက်  အောက်ဆီဂျင်ပြတ်ပြီး သေဆုံးခဲ့တယ်လို့ လူမှုကယ်ဆယ်ရေးသမားတွေက ပြောပါတယ်။

အသက် ၅၂ နှစ်ရှိ ဦးတင်ဦးဟာ အနက် ပေ ၂၀ ရှိ ရေတွင်းထဲ ရာဘာသစ်တုံး ဆင်းဆယ်ရာက အောက်ဆီဂျင် ပြတ်သေဆုံးသွားတာဖြစ်ပြီး အလောင်းကို ၁ နာရီကျော်ကြာ ဆင်းဆယ်ရတယ်လို့ ဒေသခံတွေက ပြောပါတယ်။

ဦးတင်ဦးဟာ ခြံလုပ်သားလည်းဖြစ်သလို တခြားမြို့ကနေ လာရောက်လုပ်ကိုင်တဲ့ ရွှေ့ပြောင်း လုပ်သားတယောက်လည်း ဖြစ်ပြီး သူရဲ့ ရုပ်အလောင်းကို လမိုင်းပြည်သူ့ဆေးရုံကို ပို့ဆောင် ထားတယ်လို့ သိရပါတယ်။

ရေးမြို့နယ်ထဲမှာ ရာဘာဥယျာဥ်ခြံလုပ်ငန်းနဲ့ ပင်လယ်ရေလုပ်ငန်းတွေမှာ တခြားနယ်တွေက လာရောက်လုပ်ကိုင်ကြတဲ့သူတွေအနက် ပင်လယ်ငါးဖမ်းလုပ်ငန်းခွင်မှာ ရွှေ့ပြောင်းလုပ်သားတွေ အများဆုံးဖြစ်ပါတယ်။

မန္တလေးတိုင်း မိုးကုတ်မြို့အရှေ့ပိုင်း၊ ရှောလီဝိုင်းအုပ်စု၊ ရွှေတိုင်ရပ်ကွက်က ကျောက်မျက်တွင်း ဟောင်းထဲမှာ အောက်တိုဘာ ၅ ရက် ညနေ ၅ နာရီလောက်က အမျိုးသားတယောက် အောက်ဆီဂျင်ပြတ် သေဆုံးခဲ့တယ်လို့ ဒေသခံတယောက်က ပြောပါတယ်။

အကျယ် ၆ ပေရှိပြီး အနက် ပေ ၁၈၀ လောက်ရှိတဲ့ တွင်းထဲမှာ ကျောက်မျက်တွင်း လုပ်ကိုင်နေစဉ် အောက်ဆီဂျင်ပြတ် သေဆုံးခဲ့တာလို့ ဆိုပါတယ်။

ဒေသခံ တဦးက “သူတို့တွင်းက တစောင်းကြီး။ အောက်ဘက်မှာ ကျောက်လုပ်နေရင်းနဲ့ လေပြတ် သေတာ။ အရင်က အပေါ်မှာ စက်ကြည့်ဖို့ လူ တယောက်ရှိတယ်။ ခု သူမရှိတဲ့အချိန် လေပြတ်ပြီး သေတာ။ ကယ်ဆယ်ရေးတွေလာတော့ စစ်သားတွေလည်းပါတာနဲ့ ကြောက်ပြီး အကုန်ပြေး ကြတာ။”

ကျောက်မျက်တွင်းထဲ အောက်ဆီဂျင်ပြတ် သေဆုံးသွားသူကို ကယ်ဆယ်ရေးအဖွဲ့တွေက မိုးကုတ်မြို့နယ် ပြည်သူ့ဆေးရုံကို ပို့ဆောင်လိုက်တယ်လို့ သိရပါတယ်။