ရှမ်းပြည်နယ်တောင်ပိုင်း  အောင်ပန်းမြို့၊ ဦးသန့်လမ်းဆုံမှာ  မတ် ၄ ရက်၊ မွန်းလွဲ  ၂ နာရီလောက်က  စစ်ကောင်စီတပ်သားတွေကို သတိပေးစာနဲ့အတူ အဝေးထိန်းမိုင်းထည့်ထားတဲ့ စက္ကူပုံး တစ်ခုကို ပြည်သူတစ်ဦးက အမှိုက်ထင်ပြီး ကောက်ယူသွားခဲ့လို့ အသက်မဲ့ မိုင်းအဖြစ် ပြောင်းလဲ ခဲ့ရတယ်လို့ သိရပါတယ်။

Urban Task Force Aung Ban -UTF အဖွဲ့ရဲ့ တာဝန်ရှိသူ တစ်ဦးက "ပြည်သူတွေကို ဒီလိုအဖြစ်အပျက်မျိုး သင်ခန်းစာယူ‌စေချင်ပါတယ် ။ အခုတခါကလည်း ကျနော်တို့ ဘက်က အချိန်မီသိရှိလိုက်နိုင်တဲ့အတွက် အဲဒီပြည်သူထိခိုက်ဒဏ်ရာမဖြစ်ခဲ့တာပါ။ နောက်ဆိုရင် ရှမ်းတောင်မှာ စစ်ဆင်ရေး ပိုစိတ်လာတော့မှာ ဖြစ်တဲ့အတွက် မိမိ အန္တရာယ်ကို ကြည့်ရှောင်ကြစေချင်ပါတယ်။ ကျနော်တို့ဘက်က တော်လှန်ရေးအရှိုန် ဒီထက်ပို မြှင့်လာဖို့ပဲ ရှိတယ်”လို့ ဒီဗွီဘီ ကိုပြောပါတယ်။ 

နောက်နောင် လမ်းပေါ် အလားတူ မသင်္ကာဖွယ်ပစ္စည်း တွေ့ရှိပါ လူထုအနေနဲ့ မစူးစမ်းဖို့ အောင်ပန်းမြို့ ပြောက်ကျားတပ်စုက သတိပေးစာထုတ်ပြန်ထားပါတယ်။

ရှမ်းပြည်တောင်ပိုင်း၊ အောင်ပန်းမြို့ထဲမှာ ဒီကနေ့မနက်က စစ်အာဏာ ရှင်ဆန့်ကျင်ရေးသပိတ်စစ်ကြောင်းကို အကြမ်းဖက်စစ်ကောင်စီရဲ့ လက်နက်ကိုင်တပ်တွေက  မီးခိုးဗုံးတွေနဲ့ပစ်ပြီး ကျည်ဆန်အစစ်တွေနဲ့ပါ ပစ်ခတ်တဲ့အတွက် ဆန္ဒပြသူ အနည်းဆုံး ၃ သေဆုံးပြီး ၁၇ ဦးခန့် ဒဏ်ရာရထားပါတယ်။ 

သေဆုံးသူ အရေအတွက် ဒီထက်ပိုများနိုင်တယ်လို့ သတင်းတွေထွက်ပေါ်နေတဲ့အပြင် ဆန္ဒပြသူ ၆ ဦးလည်း ဖမ်းဆီးခံထားရပါတယ်။ 

အင်အား ၁၀၀ ကျော်လောက်ရှိတဲ့ စစ်တပ်နဲ့ရဲတွေက ကနေ့ မနက် ၈ နာရီ ၄၅ မိနစ်လောက်ကစ ငြိမ်းချမ်းစွာဆန္ဒပြသူတွေပြုလုပ်ထားတဲ့ အကာအရံတွေကို ဘူဒိုဇာကားနဲ့လာ ရောက်ဖျက်ဆီးသလို မီးခိုးငွေ့ဗုံးတွေနဲ့လည်း အချက်ပေါင်းများစွာပစ်ခတ်ခဲ့ကြောင်း၊ ဆန္ဒပြသူ တွေက သူတို့ကိုအပြင်စည်းကနေပြန်ဝိုင်းရာမှာ ကျည်အစစ်တွေနဲ့စပစ်လို့ အစပိုင်းမှာ ၂ ဦးသေ ဆုံးပြီး ၁၂ ဦးဒဏ်ရာရခဲ့တယ်လို့ အောင်ပန်းဆန္ဒပြတဲ့ထဲပါဝင်သူတစ်ဦးက ဒီဗွီဘီကိုပြောပါတယ်။ 

“အတားအဆီးကို ရဲတွေက ဘူဒိုဇာနဲ့အရင်လာဖျက်တယ်။ ကျနော်တို့ကလည်း ခံတပ်လေးတွေဘက်ကနေ ရသလောက်တောင့်ထားတယ်။ စဖျက်တာကစပြီး ကျနော်တို့ဘက်ကို မီးခိုးဗုံးတွေ အလုံးရေများစွာပစ်တယ်၊ သူတို့ကမြို့ထဲကလမ်းဆုံကို အပိုင်စီးထားတော့ ကျနော်တို့ဘက်က အဖမ်းခံရတဲ့ ကိုယ့်လူတွေကို ပြန်ဝင်ကြည့်တဲ့အချိန်မှာ ကျည်အစစ်နဲ့ စပစ်တယ်ခင်ဗျ ၊ စနိုက်ပါနဲ့ပစ်တာ တစ်ယောက်က လည်ပင်းကိုဖြတ်ပြီးမှန်တယ်၊ တယောက်က ပေါင်ကိုမှန်ပြီး သွေးလွန်ပြီးသေသွားတယ်။ သူတို့ကို ကျနော်တို့ဆွဲထုတ်နေရင်း ဆက်ပစ်နေတော့ သေနတ်မှန်သူအားလုံး တစ်ဆယ်ကျော်ရှိမယ်၊ နောက်ပြီးထွက်ပြေးတဲ့လူတွေနောက်လိုက်ဖမ်းတာ ၆ ယောက်လောက်ပါသွားတယ်။ အဖမ်းခံရတဲ့အထဲက တစ်ယောက်က သူတို့ကိုပြန်ပြောလို့ဆိုပြီး ခေါင်းကိုသေနတ်နဲ့ပစ်ပြီး ကားပေါ်ဆွဲတင်သွားတယ်၊သေလားရှင်လားမသိရဘူးခင်ဗျ  ”

သေဆုံးသူနဲ့ဒဏ်ရာရသူ ၂ ဦးကို ဆေးရုံပို့ထားပြီး ကျန်တဲ့ဒဏ်ရာရသူတွေကတော့ ရဲနဲ့စစ်တပ်အတားအဆီးတွေရှိနေလို့ နီးစပ်ရာ အမှတ် ၆ ကျောင်းထဲမှာ ရှေးဦးသူနာပြုစု ထားကြောင်း၊ စာသင်ကျောင်းမှာ ခဏထားထားတဲ့ ဒဏ်ရာရသူ ၁၂ ဦးအနက် ရင်ဘတ်နဲ့ ဗိုက်ကိုထိမှန်ထားတဲ့တစ်ယောက်က ထပ်ပြီးသေဆုံးသွားတယ်လို့ သူကဆက်ပြောပါတယ်။ 

နောက်ထပ်ဆန္ဒပြသူတစ်ဦးကတော့ လောလောဆယ် ဒဏ်ရာရသူ ၈ ဦးကို ကလောပြည်သူ့ဆေးရုံသို့ ပို့ဆောင်ထားပြီး ဒဏ်ရာပြင်းထန်လို့ သေဆုံးသူရှိကြောင်း ၊ ဒါပေမဲ့ ဆေးရုံ တာဝန်ရှိသူတွေက ကာယကံရှင်မိသားစုတွေကိုယ်တိုင်လာရောက်ဆက်သွယ်မှ ပြောမယ်ဆိုတာကြောင့် သေဆုံးသူအရေအတွက်အတည်မပြုနိုင်ဘူးလို့ ဆိုပါတယ်။ 

“  ကျနော်သိရသလောက်တော့ ဒဏ်ရာရသူအားလုံး ၁၇ ယောက်လောက်ရှိမယ်ခင်ဗျ ၊ ကလောဆေးရုံကို ၈ ယောက် ပို့နိုင်ခဲ့တယ်၊ သေဆုံးတာကတော့ ၃ ယောက်ပဲ အတည်ပြုနိုင်တယ်၊ ဆေးရုံကလူတွေရဲ့အခြေအနေသွားမကြည့်နိုင်သေးဘူး၊ ဆေးရုံကလည်း မိသားစုဝင်မှပေးတွေ့မယ်လို့ ပြောတယ်၊  သေနတ်သံတွေက အခုထိ ( မွန်းလွဲ ၂ နာရီခွဲခန့်) ထိ ကြားနေရတုန်းပါ၊ တနေရာနဲ့တနေရာသွားလာဖို့လည်း ခက်ခဲနေပါတယ်  ”

ရဲနဲ့ စစ်တပ်အင်အားတွေလည်း ထပ်ရောက်လာပြီး  အောင်ပန်းမြို့တွင်း ၁၂ ရပ်ကွက်ထဲရှိ ပြည်သူတွေမိမိလုံခြုံရေးအတွက်လုပ်ထားတဲ့ အတားအဆီးအကာ အရံတွေကို ဘူဒိုဇာတွေနဲ့ လိုက်လံဖျက်ဆီးနေတယ်လို့ ဆိုပါတယ်။ 

အောင်ပန်းက စစ်အာဏာရှင်ဆန့်ကျင်ရေးသပိတ်စစ်ကြောင်း ဖြိုခွင်းခံရတာ ဒါနဲ့ပါဆို ၃ ကြိမ်ရှိပြီး စစ်တပ်က အသလွတ်ဝင်ပစ်ခတ်တာ ၁ ကြိမ်ရှိကာ ထိုစဉ်က ဆန္ဒပြပြည်သူ ၂ ဦး ဒဏ်ရာရခဲ့ပါတယ်။