စစ်ကိုင်းတိုင်း ကလေးမြို့၊ အောင်မင်္ဂလာရပ်ကွက်က စစ်ကောင်စီ ဖမ်းသွားတဲ့ ဒေသခံ ၂၀ ထဲက ၁၁ ယောက်ကျော် အောက်တိုဘာလထဲမှာ ပြန်လွတ်လာပြီလို့ ဒေသခံတွေက ပြောပါတယ်။
အဲဒီရပ်ကွက်က အသက်မပြည့်သေးတဲ့ ကလေးငယ် ၂ ဦး အပါအဝင်ဒေသခံ ၂၀ ကျော်ကို စစ်ကောင်စီတပ်က စက်တင်ဘာ ၂၇ ရက်မှာ ဖမ်းဆီးခဲ့ပြီး PDF နဲ့ ပတ်သက်မှုရှိမရှိ ရိုက်နှက်စစ်ဆေးမေးမြန်းခဲ့တယ်လို့ ဆိုပါတယ်။
အောက်တိုဘာ ၆ ရက်က ၂ ဦး၊ အောက်တိုဘာ ၉ ရက်က ၃ ဦး၊ အောက်တိုဘာ ၁၁ ရက်က ၃ ဦးနဲ့ အောက်တိုဘာ ၁၄ ရက်က ၃ ဦး အသီးသီးပြန်လွတ်မြောက်လာခဲ့ပြီး အဲဒီထဲမှာ အသက်မပြည့်သေးတဲ့ ကလေးငယ် ၂ ဦးနဲ့ နို့တိုက်မိခင်ပါ ပါတယ်လို့ ဒေသခံတွေက ပြောပါတယ်။
ဖမ်းဆီးခံရသူတွေကို စစ်ကောင်စီတပ်ဖွဲ့ဝင်တွေက ကလေးမြို့ ဒေသကွပ်ကဲမှု စစ်ဌာနချုပ်ထဲ ဖမ်းဆီးခေါ်ဆောင်သွားကာ မိသားစုဝင်တွေက ထမင်းပို့ရပြီး တွေ့ဆုံခွင့်မပေးဘူးလို့ သိရပါ ပြောပါတယ်။
ရိုက်နှက်ခံဒဏ်ရာတွေနဲ့ ပြန်လွတ်လာသူတဦးက "ကျနော်တို့ကို ဖမ်းသွားတုန်းက ဒေသကွပ်ကဲမှုစစ်ဌာနချုပ်(ဒကစ)ထဲကို ခေါ်သွားတယ်။ အဲဒီကိုရောက်တော့ တယောက်ချင်းစီ ခေါင်းကနေ လည်ပင်းအထိ မျက်နှာကို အဝတ်အမည်းနဲ့ စွပ်တယ်။ ပြီးရင်မေးတယ်။ PDF တွေနဲ့သိလား၊ ထောက်ပံ့လားဆိုပြီးတော့၊ မသိဘူး၊ မထောက်ပံ့ဘူးဖြေတော့ရိုက်တယ်။ စစ်ကြောရေးမှာ အရိုက်မခံခဲ့ရတဲ့ရက် တရက်မှမရှိဘူး" လို့ ပြောပါတယ်။
ဖမ်းဆီးခံရသူတွေထဲက ဦးအေးပို၊ နို့တိုက်မိခင်နဲ့ ကလေး၂ယောက်အပါအဝင် ဒေသခံ ၁၁ ယောက် ပြန်လွတ်ခဲ့ပြီး ဦးထိုက်ကြီး၊ ချမ်းမြေ့အောင်အပါအဝင် ဒေသခံ ၁၀ ယောက်လောက်သာ ကလေးမြို့မရဲစခန်းမှာ ဆက်ပြီး ချုပ်နှောင်ခံထားရဆဲ ဖြစ်တယ်လို့ သိရပါတယ်။
လွတ်မြောက်လာတဲ့ အမျိုးသမီးတဦးက "ကျမတို့ကိုထမင်းလည်း မကျွေးဘူး။ စစ်ကြောရေးမှာရော အချုပ်ထောင်မှာရောပဲ။ အိမ်ကလာပို့ကြရတာ။ မိသားစုလိုက် အဖမ်းခံရတဲ့သူတွေဆို ထမင်းပို့လာတဲ့သူမရှိလို့ ဝေစားကြရတယ်။ နို့တိုက်မိခင်ဆိုရင် သူကိုယ်တိုင် အစာမစားရတော့ ကလေးငယ်ကိုတောင် နို့မတိုက်နိုင်ခဲ့ဘူး" လို့ ပြောပါတယ်။
အခုရပ်ကွက်ဟာ ဒလန်များပြီး PDF ထဲဝင်တဲ့သူတွေရဲ့ နေအိမ်တွေ ချိပ်ပိတ်ခံရတာတွေ ရှိတယ်လို့ မြို့ပြပြောက်ကျားအဖွဲ့တွေနဲ့ ဒေသခံတွေက ပြောပါတယ်။
၂၀၂၂ ခုနှစ် ဧပြီလမှ အောက်တိုဘာလအထိ လင်မယား ၂ ယောက် အိမ်မှာ အသတ်ခံရပြီး ဘုရားပေါ်မှာ အမျိုးသမီ ၁ ယောက် ပစ်သတ်ခံခဲ့ရသလို လက်ဖက်ရည်ဆိုင်မှာ လင်မယား ၂ ယောက်နဲ့ ဘုရင့်နောင်လမ်းပေါ်မှာ အမျိုးသမီး ၁ ယောက် အသတ်ခံခဲ့ရကြောင်း၊ သူတို့ဟာ အဲဒီ ရပ်ကွက်နေသူတွေဖြစ်ကာ နေရာတခုစီမှာ ဒလန်အဖြစ် ရှင်းလင်းခံခဲ့ရတာလို့ ဒေသခံကက စုံစမ်းသိရပါတယ်။
စစ်တပ်က အာဏာသိမ်းပြီးနောက် ကလေးမြို့မှာ ဖမ်းဆီးထိန်းသိမ်းခံရသူ ၆၀၀ ဝန်းကျင် ရှိပြီဖြစ်ပြီး ပစ်ခတ်သတ်ဖြတ်ခံခဲ့ရသူ ၁၀၀ ကျော်ရှိနေပြီလို့ သပိတ်အဖွဲ့ဝင်တွေရဲ့ စစ်တမ်းအရ သိရပါတယ်။
မွန်ပြည်နယ် ရေးမြို့နယ် ကိုဗစ်လူနာတွေနဲ့ သေဆုံးသွားသူတွေကို ရှေ့တန်းက ကူညီပေးနေတဲ့ အောင်မင်္ဂလာရပ်ကွက်က လူငယ်ပရဟိတအဖွဲ့ဝင်အားလုံး ကိုဗစ်-၁၉ ရောဂါပိုး ကူးစက်ခံရထားတယ်လို့ မြို့ခံပရဟိတသမားတဦးက ပြောပါတယ်။
ပရဟိတအဖွဲ့ဝင် ၈ ဦးအား သြဂုတ် ၁၆ ရက်နေ့ စစ်ဆေးရာမှာ ရောဂါပိုးတွေ့ခဲ့တာဖြစ်ပြီး မြို့ပေါ်ရပ်ကွက် နဲ့ နယ်ကျေးရွာပါမကျန် ကိုဗစ် လူနာတွေနဲ့ ထိတွေ့လူနာတွေအပြင် သေဆုံး လူနာတွေကို နေ့စဉ်နဲ့အမျှနေ့ရောညပါ ရှေ့တန်းကနေ ပါဝင်ကူညီပေးနေတာလို့ ဆိုပါတယ်။
အခုလို ကိုဗစ်-၁၉ ရောဂါ ကူးစက်ခံရတာကြောင့် ပရဟိတလုပ်ငန်းကို ခေတ္တရပ်နားထားမယ်လို့ ပရဟိတအဖွဲ့ တာဝန်ရှိသူတဦးက ပြောပါတယ်။
ကိုဗစ်-၁၉ ကူးစက်ခံရခဲ့ရတဲ့ အောင်မင်္ဂလာရပ်ကွက်က ပရဟိတအဖွဲ့ဝင်အားလုံးကို ကုသရေးစင်တာမှာ ထားရှိပြီး လက်ရှိအခြေနေမှာ အားလုံးက ကျန်းမာရေးကောင်းမွန်တယ်လို့ ဆိုပါတယ်။
ရေးမြို့နယ်တွင် ပရဟိတအဖွဲ့ ပေါင်း အနည်းဆုံး ၁၀ ဖွဲ့ လောက်ရှိပြီး အောင်မင်္ဂလာရပ်ကွက်က လူငယ်ပရဟိတအဖွဲ့ဝင်အားလုံး ပိုးကူးစက်ခံထားရတာပါ။
ရေမြို့နယ်မှာ ကိုဗစ်-၁၉ ပိုးတွေ့ အတည်ပြုလူနာ ဒီနေ့အထိ ၁၁၁၈ ဦးနဲ့ သေဆုံးသူ ၉၆ ဦးရှိပြီလို့ သိရပါတယ်။
