လူတိုင်း တွေးထင်ထားကြပါလိမ့်မယ်။ အခုကာလဟာ ကစားပွဲ (Game) တစ်ခုရဲ့ အဆုံးသတ်ပိုင်း (Ending period) ကို ရောက်နေပြီလို့ပဲ ရှုမြင်ကြပါလိမ့်မယ်။ မဟုတ်ပါဘူး။ စစ်ကောင်စီလက်ထဲ ဖဲတစ်ချပ် ကျန်နေပါသေးတယ်။ 

ဒီဖဲဟာ ဝှက်ဖဲ မဟုတ်ပေမဲ့ အားလုံးရဲ့ သတိမေ့လျော့ခံထားရတဲ့ ဖဲတချပ်လည်း ဖြစ်ပါတယ်။ ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှာ မဲမသမာမှု အကြောင်းပြချက်နဲ့ မင်းအောင်လှိုင် ခေါင်းဆောင်တဲ့ စစ်ခေါင်းဆောင်တစုဟာ အာဏာသိမ်းခဲ့ပါတယ်။ သမ္မတ ရှိနေပါလျက် သမ္မတကို အဓမ္မထိန်းသိမ်းပြီး စစ်တပ်က အမည်စာရင်းတင်သွင်း ခန့်ထားတဲ့ ဒုသမ္မတကို လက်မှတ်ထိုးစေပြီး အရေးပေါ်ကာလ ကြေညာတာဟာ ၂၀၀၈ ဖွဲ့စည်းပုံနဲ့ လုံးလုံးလျားလျား မညီဘဲ အာဏာသိမ်းတာသာ ဖြစ်တယ်ဆိုတာကို  ပြည်သူတွေ သိပါတယ်။ 

သို့သော်ငြားလည်း စစ်ကောင်စီကတော့ သူတို့ဟာ အာဏာထိန်းတာ ဖြစ်တယ်လို့ အစဉ်တစိုက် ပြောဆိုနေတာပါ။ စစ်တပ်က ဦးဆောင်ပြီး သူတို့စိတ်ကြိုက် ရေးဆွဲထားတဲ့  ၂၀၀၈ ဖွဲ့စည်းပုံနဲ့ မညီပေမယ့်လည်း စစ်ခေါင်းဆောင်တသိုက်ဟာ အာဏာသိမ်းပြီး ‌အချိုးကျ အာဏာခွဲဝေမှု (Proportional Representation - PR) စနစ်အဖြစ် ရွေးကောက်ပွဲဥပဒေကိုပြင်၊ အရပ်ဝတ်ပြောင်းပြီး နိုင်ငံရေးထွက်ပေါက်ယူဖို့ ပြင်ဆင်ခဲ့ကြတာပါ။ ဒါ့ကြောင့်လည်း အာဏာသိမ်းတာ မဟုတ်၊ အာဏာထိန်းတာလို့ပဲ အမြဲတစေ ပြောနေခဲ့တာပဲ ဖြစ်ပါတယ်။ 

အာဏာထိန်းတယ်လို့ မည်သို့ပင် ပြောဆိုနေပါစေ၊ စစ်တပ်ဟာ အရပ်ဒေသအသီးသီးက  ပြည်သူတွေရဲ့ ခုခံတိုက်ခိုက်မှုတွေနဲ့ ကြုံတွေ့ကြရပြီပဲ ဖြစ်ပါတယ်။ ဒါဟာ စစ်ခေါင်းဆောင်တသိုက်ရဲ့ ကိုယ်ကျိုးစီးပွားနဲ့ နိုင်ငံရေးထွက်ပေါက်ရှာ မလိမ့်တပတ် အာဏာသိမ်းမှုရဲ့ အကျိုးဆက်ပဲ ဖြစ်တယ်ဆိုတာကို အောက်ခြေက အရာရှိစစ်သည်တွေက သိမြင်လာကြပါပြီ။ အာဏာထိန်းတယ်လို့ အကြောင်းပြ၊ စစ်ခေါင်းဆောင်တွေ စိတ်ကြိုက် ရွေးကောက်ပွဲဆိုင်ရာ ဥပဒေတွေကို ထင်သလိုပြင်၊ ပြီးရင် ‌အရပ်ဝတ်ပြောင်း ရွေးကောက်ပွဲဝင် နိုင်ငံရေးထွက်ပေါက်ရှာသွားတာဟာ စစ်တပ် အကျိုးစီးပွားမပါဘဲ နင်းတက်နေတာသာ ဖြစ်တယ်ဆိုတာကို နားလည်လာကြပါပြီ။ ဒါ့ကြောင့်လည်း စစ်တပ်ကို စွန့်ခွာကုန်ကြတာ ဖြစ်ပါတယ်။ ကြာရင် စစ်တပ်ဟာ ပြိုကွဲဖို့ပဲ ရှိပါတော့တယ်။ 

ဒီအခြေအနေကို စစ်ခေါင်းဆောင်တွေက နားလည်ပါတယ်။ သူတို့ရဲ့ မူလရည်ရွယ်ချက် မအောင်မြင်တော့တဲ့အခါ လက်ထဲမှာ ကျန်နေတဲ့ ဖဲတချပ်ကို ပြပြီး သူ့ဘက်က ထိုးသားတွေဖြစ်တဲ့ အောက်ခြေစစ်သည်နဲ့ တပ်ထောက်ခံသူတချို့ကို ကစားပွဲကနေ ထွက်မပြေးအောင်  စည်းရုံးသိမ်းသွင်းပြီး အကြမ်းတမ်းဆုံး အရက်စက်ဆုံး ဆက်ကစားတော့မှာပါ။ 

အဲဒီဖဲတချပ်ကတော့ အာဏာသိမ်းပြီလို့ အတိအလင်း ကြေညာခြင်း ဖြစ်ပါတယ်။ မဲမသမာမှု ဖြစ်အောင် ဆောင်ရွက်ခဲ့သော ပါတီများကြောင့် နိုင်ငံတော်အာဏာကို တပ်မတော်က မလွှဲမရှောင်သာ ထိန်းသိမ်းခဲ့သော်လည်း နိုင်ငံမတည်မငြိမ်ဖြစ်အောင် ဆောင်ရွက်နေသော အဖွဲ့အစည်းများကြောင့် နိုင်ငံတော်အာဏာသိမ်းလိုက်ပြီဖြစ်ကြောင်းဆိုတဲ့ ကြေညာချက်မျိုး မကြာမီ ထွက်လာဖို့ရှိတယ်လို့ အတွင်းသတင်းတွေ ကြားသိနေရပါတယ်။ 

ပြီးခဲ့တဲ့ ရက်ပိုင်းက စကစနိုင်ငံခြားရေးဝန်ကြီး ဝဏ္ဏမောင်လွင်ဟာ ဒီလို အခြေအနေတွေ ပြောင်းနိုင်တဲ့အတွက် တရုတ်ကို ကြိုတင်ညှိနှိုင်းပြီး ထောက်ခံချက်တောင်းခံခဲ့ပုံပါပဲ။ တရုတ်နိုင်ငံခြားရေးဝန်ကြီး ဝမ်ယိကလည်း ဘယ်အခြေအနေ ရောက်နေပါစေ၊ စစ်ကောင်စီကို ဆက်လက်ထောက်ခံသွားမယ်လို့ စကားဦးသန်းခဲ့ပါတယ်။

စကစဘက်က အာဏာထိန်းတယ်ပြောပြော၊ သိမ်းတယ် ပြောပြော အတူတူပါပဲလို့ လူပြိန်းတွေး တွေးလို့မရပါဘူး။ အာဏာသိမ်းတယ်လို့ ကြေညာလိုက်တာနဲ့ အောက်ခြေ အရာရှိ၊ အရာခံ၊ အကြပ်၊ စစ်သည်တွေရဲ့ စိတ်အခြေအနေတွေ ပြောင်းသွားနိုင်တာကို သတိချပ်ကြရပါမယ်။ သူတို့ဟာ စစ်အာဏာရှင်ဟောင်း ဦးသန်းရွှေလက်ထက်က တပ်က ထင်တိုင်းကြဲ လုပ်ခွင့်ရခဲ့တဲ့ ကာလကို ပြန်လည်တိမ်းညွှတ်မက်မောလာကြမှာပဲ ဖြစ်ပါတယ်။ ဦးသန်းရွှေ လက်ထက်မှာ တပ်ကလူတွေ အရပ်ဘက်ဌာနတွေကို ထင်သလို ပြောင်းရွေ့ပြီး ကိုယ်ကျိုးစီးပွားရှာခွင့် သာခဲ့ကြတာ မဟုတ်လား။ အတိတ်က ဆောင်းခဲ့ရတဲ့ ရွှေထီးကို သူတို့ ပြန်လည် ရှာဖွေကြပါတော့မယ်။ 

လက်ရှိ အာဏာထိန်းမှုဟာ စစ်ခေါင်းဆောင်တွေရဲ့ အကျိုးစီးပွားသာရှိပြီး အောက်ခြေအတွက် အကျိုးစီးပွားမရှိတာကို သိထားတဲ့ အောက်ခြေစစ်သည်တွေဟာ အာဏာသိမ်းပြီဆိုတဲ့ ဘက်ကူးပြောင်းလိုစိတ် ဖြစ်နေတာကို ရပ်ပစ်လိုက်ကြမှာပဲ ဖြစ်ပါတယ်။ အာဏာသိမ်းခြင်းဟာ သူတို့ရဲ့ ကိုယ်ကျိုးစီးပွားဖြစ်ထွန်းလာနိုင်တဲ့ အရိပ်အယောင်အဖြစ် ပြောင်းလဲ ရှုမြင်လာကြမှာပါ။ ဒီသဘောတရားကို မကြာခင်က KNLA ဘက်ကို ခိုဝင်သွားတဲ့ ခမရ (၅၈၅) ဒုတပ်ရင်းမှူး ဗိုလ်မှူးတင်လင်းအောင်ရဲ့ ပြောစကားတွေမှာလည်း အရိပ်အမြွက် တွေ့ကြရမှာပါ။ 

အရေးပေါ်ကာလ သတ်မှတ်ရက်ကလည်း ပြည့်လုပြီ၊ ရွေးကောက်ပွဲ အောင်မြင်အောင် ကျင်းပနိုင်မယ့် အလားအလာကလည်း မရှိဆိုတော့ စစ်ကောင်စီဟာ အရပ်သားပြည်သူတွေ သေဆုံးအောင် တိုက်ခိုက်ကြတဲ့ အဖွဲ့အစည်းတွေ ရှိနေတဲ့အတွက်ဆိုပြီး နိုင်ငံတော်အာဏာကို သိမ်းယူကြောင်း ကြေညာနိုင်ပါတယ်။ တကယ် ထိခိုက် သေဆုံးမှုဖြစ်အောင် လုပ်မှာက ဘယ်အဖွဲ့ဖြစ်တယ်ဆိုတာကို ပြည်သူတွေ သိနေပေမဲ့ စစ်ကောင်စီကတော့ နိုင်ငံတကာကို အပြလှအောင် ချပြမှာပဲဖြစ်ပါတယ်။ 

အာဏာသိမ်းပြီဆိုတာနဲ့ တခြားအဖွဲ့အစည်းတွေဆီ ယိုစီးနေတဲ့ စစ်သည်တွေရဲ့ CDM လုပ်မှုတွေဟာ ရပ်တန့်သွားနိုင်ပါတယ်။ ရောင်တော်ပြန်လွှတ်နေတဲ့ စကစက မွေးထားတဲ့ တော်လှန်ရေးအမည်ခံ အဖွဲ့တချို့ရဲ့ တိုက်ခိုက်မှုတွေဟာလည်း တန့်ရပ်သွားနိုင်ပါတယ်။ အာဏာထိန်းတာတောင် ဒီလောက်ရက်စက်ခဲ့ရင် အာဏာသိမ်းရင် ပိုဆိုးတော့မယ်လို့ လက်နက်မဲ့ ပြည်သူတွေ အကြောက်တရား ပိုဝင်လာပါလိမ့်မယ်။ တော်လှန်ရေး အရှိန်အဟုန်ဟာ ရုတ်တရက် ထိုးကျသွားနိုင်ပါတယ်။

စစ်အာဏာရှင်စနစ် တိုက်ဖျက်ရေး လုပ်နေကြတဲ့ အဖွဲ့အစည်း အသီးသီးဟာ ဒီအခြေအနေ အရပ်ရပ်ကို ကြိုတင်တွေးမြင်ပြီး စကစလက်ထဲက လွှတ်ချလိုက်မယ့်  ဖဲတချပ်ကိစ္စကို မမေ့မလျော့ ရှိသင့်ကြောင်းပါ ခင်ဗျား။ 

အောင်သောင်းသစ်

မဲမသမာမှုတွေရှိခဲ့တယ်ဆိုတဲ့ အကြောင်းပြချက်နဲ့ အာဏာသိမ်းခဲ့တဲ့ မင်းအောင်လှိုင် လက်ထက်မှာ စစ်တပ်ဟာ ဖရိုဖရဲ ဖြစ်နေပါပြီ။ နေ့စဉ်နဲ့အမျှ အရပ်ဒေသအသီးသီးမှာ ခုခံတိုက်ခိုက်မှုတွေနဲ့ ကြုံတွေ့နေကြရပါတယ်။ ဒါဟာ တပ်မတော်ရဲ့ သက်တမ်းတလျှောက်မှာ အဆိုးရွားဆုံး အခြေအနေနဲ့ ရင်ဆိုင်နေရတာ ဖြစ်တယ်လို့ စစ်တပ်အရာရှိဟောင်းတွေက သုံးသပ်ပြောဆိုကြပါတယ်။ 

မင်းအောင်လှိုင်နဲ့ စစ်ခေါင်းဆောင်တသိုက်ကတော့ တိုင်းပြည်အေးချမ်းနေပါပြီလို့ နိုင်ငံတကာနဲ့ သူ့တပ်တွင်းမိသားစုတွေကို လီဆည်လုပ်ကြံပြသဖို့ သင်္ကြန်ပွဲတော် ကျင်းပနိုင်ရေး၊ ရုပ်ရှင်ရုံတွေ ပြန်ဖွင့်နိုင်ရေးတွေကို စိုင်းပြင်းနေကြတာပါ။ 

သူတို့ဘယ်လိုပဲ နိုင်ငံတကာကို လီဆည်ဖို့ ကြိုးပမ်းနေပါစေ၊ ပြည်တွင်းက အခြေအနေတွေကို ပြည်သူတွေသာ အသိဆုံးဖြစ်ပါတယ်။ စစ်တပ်က ပြိုနေချိန်မှာ ဒေသကာကွယ်ရေးတပ်ဖွဲ့တွေက အားကောင်းလာနေပါပြီ။ ရဲစခန်းတွေသာမက စစ်တပ်အထိုင်ချရာ ယာယီတပ်စခန်းတွေကိုပါ ဝင်ရောက် တိုက်ခိုက်နေကြပါတယ်။ ဒီတိုက်ခိုက်မှု ဖြစ်စဉ်တွေဟာ ရှေ့လျှောက် ပိုတိုးလာဖို့ပဲ ရှိပါတယ်။ 

ဒေသကာကွယ်ရေးတပ်ဖွဲ့တွေ ဝင်ရောက်တိုက်ခိုက်လို့ ဖရိုဖရဲ တပ်ပြိုကွဲပြီး ထွက်ပြေးရတဲ့ စကစတပ်ဖွဲ့ဝင်တွေ ရှိနေပါပြီ။

ဒီဖြစ်ရပ်မျိုးတွေက နေရာဒေသမရွေး ကြုံလာနိုင်ပါတယ်။ စကစတပ်ဖွဲ့ဝင်တွေ တိုက်ခိုက်ခံရလို့ ကိုယ့်ရပ်ရွာထဲကို ရုတ်တရက် ပြေးဝင်လာရင် ဘာတွေ လုပ်ကြမလဲ။ ဘယ်လို တုံ့ပြန် ဆက်ဆံကြမလဲ ဆိုတာကို ရပ်ရွာနေသူ အမျိုးသားတွေ ကြိုတင်ညှိနှိုင်း တိုင်ပင်ထားသင့်ပါတယ်။ တိုက်ပွဲကနေ ထွက်ပြေးလာတဲ့ စစ်ကျွံလာသူတွေကို ဘယ်လို တုံ့ပြန်ဆက်ဆံသင့်လဲ ဆိုတာကို တိုင်းရင်းသားလက်နက်ကိုင်အဖွဲ့က အရာရှိတဦးရဲ့ အကြံပြုချက်ကို မျှဝေချင်ပါတယ်။

(၁) သေနတ်နဲ့ ပြေးဝင်လာတိုင်း မကြောက်ပါနဲ့။ သူ့မှာ သေနတ်သာရှိပြီး ကျည်ကုန်နေတာလည်း ဖြစ်နိုင်ပါတယ်။ ဒါမှမဟုတ် ကျည်အနည်းငယ်သာ ရှိတော့တာလည်း ဖြစ်နိုင်ပါတယ်။ ဒါ့ကြောင့် သူ့ကို မြင်တွေတာနဲ့ ချက်ချင်းကြောက်ပြီး ထွက်မပြေးပါနဲ့။ ထွက်ပြေးခြင်းက သူ့ရဲ့ အရိုင်းစိတ်ကို တွန်းအားပေးပြီး ပစ်ခတ်မှု ဖြစ်နိုင်ပါတယ်။ ချက်ချင်း ကျည်ကွယ်ရာကို ပြောင်းရွှေ့နေပြီး သူ့အရိပ်အကဲကို အရင် သေချာကြည့်ပါ။ 

(၂) အရပ်ဝတ်နဲ့ သေနတ်ကိုင်လာရင် စကစတပ်ဖွဲ့ဝင်နဲ့ PDF ဘယ်လို ခွဲခြားမလဲဆိုတာက ကိုင်လာတဲ့ သေနတ်ဒင်ကို ကြည့်ပါ။ စကစတပ်ဖွဲ့ဝင်တွေ ကိုင်တဲ့ လက်နက်တွေမှာ အနီရောင်အောက်ခံပေါ် ဆေးသားအဖြူနဲ့ ရေးထားတဲ့ ဂဏန်း အမှတ်အသားတွေ ပါရှိပါတယ်။ အောက်ဖော်ပြပါပုံထဲက လက်နက်တွေကို နမူနာအဖြစ်ကြည့်ထားပါ။

(၃) ရပ်ရွာထဲ ကျွံလာတဲ့ စကစတပ်သားမှန်း သေချာရင် ဘာဆက်လုပ်မလဲ။ ကျည်ကွယ်ရာ နေရာကနေ ရပ်ရွာထဲ သေနတ်ကိုင်ဝင်လာတာ မဖြစ်သင့်ကြောင်းနဲ့ သေနတ်ကို ချထားရင် သူ လိုအပ်တာ အကူအညီပေးမယ့်အကြောင်း လှမ်းအော်ပြောပါ။ ဒီ‌လို အော်ပြောရာမှာ အိမ်နီးချင်း ရှေ့နောက်ဝဲယာက အမျိုးသားတွေ အားလုံးက ဝိုင်းအော်ပြောသင့်ပါတယ်။ ဒီလို ဝိုင်းအော်ခြင်းအားဖြင့် သူ ရင်ဆိုင်ရမှာဟာ တဦးတည်းမဟုတ်ဘူးဆိုတဲ့ အချက်ကို သူ့အသိစိတ်ထဲ သွင်းပေးနိုင်ပါတယ်။ 

(၄) သေနတ်ကို အောက်ချထားပြီး အကူအညီတောင်းလာပြီ ဆိုရင်တော့ ကျည်ကွယ်ရာက ထွက်လာပြီး သူ့ကို အဝေးကနေ နွေးထွေးတဲ့ အပြုံးနဲ့ လှမ်းနှုတ်ဆက်ပါ။ အိမ်နီးချင်း အမျိုးသားတွေလည်း ထွက်လာပြီး သူ လိုအပ်တာကို ကူညီမယ့်အကြောင်းနဲ့ ရပ်ရွာလုံခြုံရေးအရ လက်နက်ကို ခဏသိမ်းမှာကိုတော့ လက်ခံဖို့ ဝိုင်းဝန်းနားချပါ။ တခြားယောက်ျားသားတချို့က သူ မမြင်ကွယ်ရာကနေ ရရာ တုတ်၊ ဓား၊ လှံ ကိုင်စွဲပြီး အသင့်အနေအထား ရှိနေကြပါ။ 

(၅) အသာတကြည် လက်ခံရင် လက်နက်ကို သိမ်းယူပါ။ လူနဲ့ လက်နက်ကို ဝေးရာထား သိမ်းဆည်းပါ။ ဒီအခြေအနေရောက်ရင် အစားအသောက်တချို့ တည်ခင်းကျွေးမွေးနိုင်ပါတယ်။ သူ စားသောက်နေစဉ် သူ့ကို ရပ်ရွာက အန္တရာယ်ပေးမှာ မဟုတ်တဲ့အကြောင်းနဲ့ ရပ်ရွာလုံခြုံရေး အရလည်း ဆက်သွယ်ရေးစက်၊ ဖုန်း စတာတွေကိုပါ ခဏပေးအပ်ထားဖို့ လိုအပ်ကြောင်း ဝိုင်းဝန်းပြောဆိုပါ။ ဆက်သွယ်ရေးပစ္စည်းတွေ သိမ်းဆည်းပြီးရင် သူ့ကို ကောင်းစွာ ထိန်းသိမ်းထားပါ။ ဒေသရပ်ရွာ အုပ်ချုပ်ရေးအဖွဲ့တွေနဲ့ ချိတ်ဆက်ပြီး အပ်နှံလိုက်ပါ။ NUG လက်အောက်ခံ ဒေသရပ်ရွာ အုပ်ချုပ်ရေးအဖွဲ့တွေနဲ့ ချိတ်ဆက်ပြီး အပ်နှံလိုက်ပါ။

EAOs နဲ့ PDF တွေ တိုက်နေတာပဲ ငါတို့က နေသာသလို နေမယ်ဆိုလို့ရတဲ့ ကာလမျိုး မဟုတ်တော့ပါဘူး။ စစ်ဟာ သင့်အိမ်ရှေ့ပေါက်ကို အချိန်မရွေး ရောက်လာနိုင်တယ်ဆိုတာကို သတိချပ်ပါ။ ဘယ်အခြေအနေမှာ ဘယ်လို တုံ့ပြန်ကြမယ်ဆိုတာကို ရပ်ရွာနေသူတွေ ကြိုတင် ညှိနှိုင်း တိုင်ပင်ထားကြခြင်းသည်သာ အကောင်းဆုံးဖြစ်ပါကြောင်း တိုက်တွန်း နှိုးဆော်လိုက်ရပါတယ်။ 

အောင်သောင်းသစ်