အဲဗာတန်နည်းပြ

September 4, 2022

ဗန်ဒိုက်ကို အနီကတ်မပြခဲ့သည့် ကွင်းလယ်ဒိုင်ကို အဲဗာတန်နည်းပြ လမ်းပတ်ဝေဖန်

မနေ့ညကကန်သွားတဲ့ ပရီးမီးယားလိဂ်ပွဲစဉ်မှာ လီဗာပူးနောက်ခံလူ ဗန်ဒိုက်ကို အနီကတ်ပြသဖို့ ပျက်ကွက်ခဲ့တဲ့ ကွင်းလယ်ဒိုင်ကို အဲဗာတန်နည်းပြ လမ်းပတ်က ဝေဖန်လိုက်ပါတယ်။

ဂိုးမရှိသရေကျခဲ့တဲ့ အဲဒီပွဲစဉ်ရဲ့ ပွဲချိန် ၇၅ မိနစ်လောက်မှာ နောက်ခံလူဗန်ဒိုက်ဟာ အဲဗာတန်ကွင်းလယ်လူ အိုနာနာနဲ့ ဘောလုံးယှဉ်လုရာမှာ ခြေကျင်းဝတ်ကို ခြေထောက်နဲ့ တိတိကျကျ ထောက်မိခဲ့တာပါ။

ဒါပေမဲ့ ကွင်းလယ်ဒိုင် လူကြီးက အဝါကတ်ပဲပြသခဲ့ပြီး အနီကတ်ပြသခြင်းမရှိတဲ့အပေါ် နည်းပြလမ်းပတ်က မကျေမနပ် ဖြစ်ခဲ့တာပါ။

နောက်ခံလူ ဗန်ဒိုက်ကို ကစားသမားတယောက်အနေနဲ့ သဘောကျပေမဲ့ တခါတရံမှာ အခုလို ဖျက်ထုတ်မှုတွေကဆိုးရွားကြောင်း၊ ဒိုင်လူကြီးအနေနဲ့ VAR နဲ့ ပြန်ကြည့်ပြီး ဆုံးဖြတ်ချက်ချဖို့ မလုပ်ဆောင်ခဲ့တဲ့အပေါ် အံ့အားသင့်မိကြောင်း၊ ဒီလိုဖျက်ထုတ်မှုဟာ အနီကတ်ပြသရမှာဖြစ်ကြောင်း နည်းပြလမ်းပတ်က ပွဲအပြီးမှာ မှတ်ချက်ပေးခဲ့ပါတယ်။

ဆိုရှယ်မီဒီယာတွေမှာလည်း ဗန်ဒိုက်ရဲ့ ဖျက်ထုတ်မှုဟာ အနီကတ် ပြစ်ဒဏ်ထိုက်ကြောင်း မှတ်ချက်ပေးကြပါတယ်။

12 mins Ago

September 14, 2020

1.2K

မြန်နှုန်းမြင့်တာလိုချင်ရင် ဂျိမ်းစ်အစား အူစိန်ဘော့ကို ခေါ်ခဲ့မှာပါ - အန်ဆယ်လော့တီ

ကစားသမားသစ် ဂျိမ်းစ်ရိုဒရီဂွတ်ဇ်ရဲ့ မြန်နှုန်းရဲ့ ရုပ်ပိုင်းဆိုင်ရာလိုအပ်ချက်တချို့ ရှိနေတဲ့ အပေါ် လုံးဝစိုးရိမ်စိတ်မရှိဘူးလို့ အဲဗာတန်နည်းပြ ကားလို့အန်ဆယ်လော့တီက ပြောပါတယ်။ မြန်နှုန်းမြင့်တာကို လိုချင်တယ်ဆိုရင် ဘောလုံးသမားတွေအစား တာတိုအပြေးသမား အူစိန်ဘော့ကို ခေါ်ယူလိုက်မှာလို့လည်း သူကပြောခဲ့ပါတယ်။ အဲဗာတန်နဲ့ပွဲဦးထွက်မှာ ရိုဒရီဂွတ်ဇ်ဟာ ခြေစွမ်းပြနိုင်ခဲ့ပြီး အသင်းအတွက်အခွင့်အရေး ၅ ကြိမ်ဖန်တီးနိုင်ခဲ့ပါတယ်။ ဒီပွဲမှာ အဲဗာတန်အသင်းဟာ တိုက်စစ်မှူး ကယ်ဗတ်လီဝိန်ရဲ့ တစ်လုံးတည်းသော သွင်းဂိုးနဲ့အနိုင်ရရှိခဲ့ပါတယ်။ အန်ဆယ်လော့တီဟာ ရီးရဲလ်မက်ဒရစ်၊ ဘိုင်ယန်မြူးနစ်အသင်းတွေကို ကိုင်တွယ်စဉ်တုန်းကတည်းက ရိုဒရီဂွတ်ဇ်နဲ့ လက်တွဲခဲ့ဖူးသူဖြစ်ပြီး ကိုလံဘီယာသားကို အဲဗာတန်အသင်းထံ ခေါ်ယူခဲ့ရာမှာလည်း အဓိကနေရာက နေပါဝင်ခဲ့သူဖြစ်ပါတယ်။ ကစားသမားရဲ့ ပွဲဦးထွက်ခြေစွမ်းကို ကျေနပ်မိတယ်လို့ သူကပြောပါတယ်။ “ဘောလုံးကစားတတ်တဲ့ ကစားသမားတိုင်းဟာ အသားကျဖို့ အချိန်သိပ်ယူစရာမလိုပါဘူး။ ရိုဒရီဂွတ်ဇ်ဟာ သူဘာလုပ်ရမလဲဆိုတာကို နားလည်ထားပြီး အလန်နဲ့ ဒိုကူရေးတို့ဟာလည်း တူတူပါပဲ။ ကျနော်က သူတို့ရဲ့ အရည်အချင်းတွေ ထုတ်ပြဖို့ပဲ ပြောခဲ့တာဖြစ်ပြီး သူတို့ကလည်း ဒီအတိုင်းဆောင်ရွက်ခဲ့ပါတယ်။ ကျနော်တို့ ကွင်းလယ်မှာ ကောင်းမွန်တဲ့အစုအဖွဲ့တခုကို ဖန်တီးနိုင်ခဲ့ပါတယ်။ အရင်ရာသီတုန်းက ကျနော့်ကွင်းလယ်လူ တွေဟာ ဘောလုံးနဲ့အတူဆိုရင် ပုံစံကောင်းရှိခဲ့ပေမယ့် ကျနော်တို့ဘောလုံးမရှိချိန်မှာလည်း ပုံစံကောင်းပြသနိုင်ဖို့ လိုပါတယ်” လို့ အဲဗာတန်နည်းပြက ပြောပါတယ်။ ကွင်းလယ်လူ ရိုဒရီဂွတ်ဇ်ဟာကမ္ဘာ့အမြန်ဆုံးကစားသမားမဟုတ်ပေမယ့် အရည်အသွေးတွေအများကြီးရှိတယ်လို အန်ဆယ်လော့တီက ပြောပါတယ်။ “ကျနော်တို့ သူ့ကို အရည်အသွေးတွေပြသတဲ့နေရာမှာ အသုံးပြုမှာဖြစ်ပါတယ်။ သူဟာ တောင်ပံကစာသမားတစ်ယောက်မဟုတ်ပါဘူး။ ဒါပေမယ့် သူဟာ အတွင်းထဲဝင် ကာ ဘောလုံးလက်ခံယူနိုင်ပါတယ်။ သူဟာ တကယ့်ကိုအန္တရာယ်ရှိတဲ့ကစားသမားဖြစ်ပါတယ်။ ကျနော် သူ့ရဲ့ ရုပ်ပိုင်းဆို်င်ရာ ကြံ့ခိုင်မှုအပေါ်မှာလည်း စိုးရိမ်မှုမရှိပါဘူး။ ဒီလိုသာစိုးရိမ်နေမယ်ဆိုရင် ကျနော် သူ့အစား အူစိန် ဘော့ကိုပဲ ခေါ်ခဲ့မှာ။” အန်ဆယ်လော့တီဟာ စပါးနဲ့ပွဲမှာပြသခဲ့တဲ့ အဲဗာတန်ရဲ့အသင်းလိုက်ခြေစွမ်းကို ကျေနပ်မှုတယ်လို့ ပြောဆိုလိုက်ပြီး ဒီရာသီမှာ ပြီးခဲ့တဲ့ရာသီအဆင့် ၁၂ ထက်ပိုကောင်းတဲ့ အမှတ်ပေးဇယားအခြေအနေတခုကို ရရှိဖို့ မျှော်လင့်နေတယ်လို့ ပြောပါတယ်။

2 years Ago