ရန်ကုန်မြို့မှာ ဒီဇင်ဘာလဖြေဆိုရမယ့်  ဂျပန်ဘာသာအရည်အချင်းစစ်စာမေးပွဲ (JLPT) N4 level  လျှောက်လွှာတွေကို မနက် ၂ နာရီလောက်ကတည်းက လာရောက်တန်းစီ ဝယ်ယူသူတွေ များပြားတဲ့အတွက် အွန်လိုင်းစနစ်နဲ့သာ ရောင်းချသွားတော့မယ်လို့ Myanmar Association of Japan Alumni (MAJA) က ထုတ်ပြန်ပါတယ်။

အဆိုပါလျှောက်လွှာတွေကို  သြဂုတ် ၃ ရက်မှာ N5 level က စတင်ရောင်းချခဲ့တာဖြစ်ပြီး လူတဦးကို လျှောက်လွှာ ၂ စောင်နှုန်းနဲ့ ရောင်းချပေးနေပြီး တရက်တည်းမှာပဲ N5 level လျှောက်လွှာအစောင်ရေ ၄,၇၅၀ လုံး ရောင်းကုန်သွားခဲ့တာပါ။

ဒီနေ့ သြဂုတ် ၅ ရက်မှာ N4 level အတွက် ရောင်းချပေးသွားမှာဖြစ်ပြီး လက်မှတ် ၈,၀၀၀ ကို ၃ ရက်ခွဲပြီး ရောင်းသွားမယ်လို့ ထုတ်ပြန်ခဲ့ပေမဲ့ ရောင်းချနိုင်ခြင်း မရှိခဲ့ပါဘူး။

ရန်ကုန်မှ JLPT လျှောက်လွှာသွားဝယ်သူတဦးက “ဖောင်ဝယ်ဖို့ မနက်အစောကြီးကတည်းက မိုးရွာထဲ လာစောင့်တန်းစီးနေတဲ့သူတွေကို မထီမဲ့မြင်ပြုသလိုပါပဲ။ မနက် ၂ နာရီလောက်တည်းက အပြေးအလွှားနဲ့ ဖောင်ဝယ်ဖို့ လူ ၅,၀၀၀ လောက်ရှိနေတာ။ မာရှယ်လောထုတ်ထားတဲ့အချိန်၊ ခိုးဆိုးဓားပြမှုတွေ ပေါနေတာတောင် မကြောက်နိုင်ဘဲ လာကြရတာ။ ဒီနေ့ N4 အတွက် တစောင်မှ မရောင်းပေးရသေးဘဲ လူအရမ်းများလို့ မရောင်းပေးဘူးပြောတယ်။ လိုချင်တဲ့သူကတော့ များမှာပဲ၊ ကိုယ်ချင်းစာကြည့်သင့်တယ်။ ပြည်ပျက်ကြီးက ရုန်းထွက်နိုင်ဖို့ လူတွေ ဘယ်လောက်ဒုက္ခခံနေရလဲဆိုတာ” လို့ ပြောပါတယ်။

ဒါ့အပြင် မန္တလေးမှာလည်း JLPT လျှောက်လွှာဝယ်ယူသူတွေ အဆမတန် များပြားတာကြောင့် အွန်လိုင်းစနစ်နဲ့သာ ရောင်းချပေးမယ်လို့ ထုတ်ပြန်ခဲ့ရပါတယ်။

မြန်မာနိုင်ငံမှာ လက်ရှိ ဂျပန်အရည်အချင်းစစ်စာမေးပွဲဟာ JLPT အပြင် Net Test၊ Top J နဲ့ တခြားစာမေးပွဲတွေလည်း ရှိပါတယ်။

MAJA နဲ့ ကျောင်းသားတွေအကြား အနည်းငယ်တင်းမာမှုတွေရှိခဲ့လို့ ရဲနဲ့ စစ်ကားတွေခေါ်ပြီး နာရီဝက်အတွင်း မပြန်ရင် ပစ်မယ်ဆိုတဲ့ ထိန်းချုပ်မှုတွေ ပြုလုပ်ခဲ့ရတယ်လို့ လျှောက်လွှာ သွားရောက်ဝယ်ယူသူ ကျောင်းသားတွေဆီက သိရပါတယ်။

လျှောက်လွှာရောင်းချတာနဲ့ ပတ်သက်ပြီး အသေးစိတ်ကို ထပ်မံကြေညာသွားမှာဖြစ်ပြီး စာမေးပွဲ အောင်မြင်စွာ ကျင်းပနိုင်ရေးအတွက် ‌ကျောင်းသူကျောင်းသားတွေ အနေနဲ့ ပူးပေါင်းဆောင်ရွက်ပေးဖို့လည်း MAJA က တောင်းဆိုထားပါတယ်။

၇ လတာကာလအတွင်း ရောင်းအားရော ဆုငွေပါ ကျဆင်းလာတဲ့ အောင်ဘာလေထီကို စစ်ကောင်စီက နွေဦးထီကဲ့သို့ အွန်လိုင်းကနေ ရောင်းချဖို့ ပြင်ဆင်နေတယ်လို့ ထီရုံး ထုတ်ပြန်ချက်အရ သိရပါတယ်။

အဲဒီလို အွန်လိုင်းကနေ ရောင်းချနိုင်ဖို့ နည်းပညာပံ့ပိုးမှုပေးနိုင်မယ့် Service Provider လုပ်ငန်းတစ်ခု ရွေးချယ်သွားမယ်လို့ စစ်ကောင်စီလက်အောက်ခံ ထီရုံးက ဒီကနေ့ ထုတ်ပြန်လိုက်တာပါ။ 

ဒီနှစ်ထဲစပြီး အကောင်ထည်ဖော်ချင်နေတယ်ဆိုတာ သိရတယ်လို့ အောင်ဘာလေထီရုံး ဝန်ထမ်းတစ်ဦးက ပြောပါတယ်။ 

နည်းပညာပံ့ပိုးမှုပေးနိုင်မယ့် ကုမ္ပဏီတွေကို အောက်တိုဘာ ၁၅ ရက်အထိ EOI တင်သွင်းနိုင်တယ်လို့လည်း အသိပေးထားပါတယ်။

အောင်ဘာလေထီရုံးအနေနဲ့ လက်ရှိမှာ Paper ထီစနစ်ကို ကျင့်သုံးနေပြီး ​ပြည်သူများက စစ်ကောင်စီကို ဆန့်ကျင်တဲ့အနေနဲ့ ထီမထိုးကြတော့ပါဘူး။ 

NUG အစိုးရက နွေဦးထီ ဆိုပြီး သြဂုတ်လမှာ အွန်လိုင်းစနစ်နဲ့ ထီရောင်းချခဲ့ပါတယ်။

နွေဦးထီကို ပြည်သူတွေအနေနဲ့ စိတ်ဝင်စားမှုများခဲ့ပြီး ရောင်းမလောက်အောင် အောင်မြင်ခဲ့ပြီးတဲ့နောက် စစ်ကောင်စီက အောင်ဘာလေထီကို အွန်လိုင်းစနစ် ကျင့်သုံး ရောင်းချဖို့ လုပ်လာတာလည်း ဖြစ်ပါတယ်။