ရန်ကုန်ရှိ မြန်မာနိုင်ငံကူးလက်မှတ် (ပတ်စ်ပို့) ထုတ်ပေးရေးရုံးကနေ ပတ်စ်ပို့လျှောက်ထားဖို့ အွန်လိုင်းဘွတ်ကင် စနစ်အသစ်နဲ့  ဖေဖော်ဝါရီ ၂၄ ရက်မှာ စတင်ခွင့်ပြုပေးခဲ့ပြီး လျှောက်တဲ့သူ ၈,၅၂၉ ဦးရှိပြီးနောက် ဒီကနေ့ ဖေဖော်ဝါရီ ၂၇ ရက် မနက်ပိုင်းမှာ ရုတ်တရက် ရပ်ဆိုင်းလိုက်ပါတယ်။

မြန်မာနိုင်ငံကူးလက်မှတ်ထုတ်ပေးရေး ဝက်ဘ်ဆိုက်မှာတော့ Online Appointment System လိုအပ်ချက် အနည်းငယ်ရှိသွားတာကြောင့် ပြန်လည်မွမ်းမံမှုတွေ ပြုလုပ်မှာဖြစ်လို့ ရပ်နားတာလို့ ပြီးခဲ့တဲ့ ဖေဖော်ဝါရီ ၂၅ ရက်က ရေးသားဖော်ပြခဲ့ပါတယ်။

ဝန်ဆောင်မှု ပြန်ဖွင့်မယ့်ရက်ကိုတော့ ကြေညာသွားမယ်လို့ နိုင်ငံကူးလက်မှတ် ထုတ်ပေးရေးရုံး ဝက်ဘ်ဆိုက်က ထုတ်ပြန်ထားပါတယ်။

ပတ်စ်ပို့ အွန်လိုင်းဘွတ်ကင်စနစ်သစ် စစဖွင့်ချင်း တရက်မှာပဲ လျှောက်တဲ့သူများတာကြောင့် ဝက်ဘ်ဆိုက်ဝင်ရတဲ့ အခက်အခဲတွေ ရှိခဲ့ကြောင်း ပတ်စ်ပို့ လျှောက်ထားသူတွေဆီက သိရပါတယ်။

လှိုင်မြို့နယ်မှ ပတ်စ်ပို့လျှောက်ထားသူတဦးက“လူတော်တော်များများက Passport system အသစ်ကို စောင့်နေတော့။ အကုန်လုံး စုပြုံပြီး ဝင်ကြမှာ။ ဒီတော့ ဝက်ဘ်ဆိုက်က လောလောဆယ် အဆင်ပြေမှာမဟုတ်ဘူး။ သိရသလောက် တချို့ဆို မဖွင့်ခင် ည ၁၂ လောက်ကတည်းက စမ်းဝင်နေကြတယ်” လို့ ပြောပါတယ်။

စစ်ကောင်စီရဲ့ အရင် QR စနစ်နဲ့ တိုကင်ရယူစဉ်က ကြားခံပွဲစားတွေကြောင့် ပတ်စ်ပို့ ပြုလုပ်ခ စျေးနှုန်းတွေဟာ သိန်းဂဏန်းအထိ ပြင်ပပေါက်စျေး ရှိခဲ့ပါတယ်။

စစ်ကောင်စီက အွန်လိုင်းစနစ်သစ်ကို လွယ်ကူမြန်ဆန်အောင် လုပ်ထားတယ်ဆိုပေမဲ့ နည်းပညာအခက်အခဲနဲ့ လျှောက်တဲ့သူများတာကြောင့် ၃ ရက်အကြာမှာ အခုလို ရပ်ဆိုင်းသွားတာပါ။

စစ်တပ် အာဏာမသိမ်းခင် ပတ်စ်ပို့စာအုပ်ပြုလုပ်ခ ငွေကျပ် ၄၀,၀၀၀ ဝန်းကျင်သာ ရှိပေမဲ့ အာဏာသိမ်းပြီးနောက် ကန့်သတ်ထားတဲ့ QR စနစ်တွေနဲ့ စောင့်ဆိုင်းရတဲ့ အခြေအနေတွေကြောင့် ပတ်စ်ပို့ပြုလုပ်ခ ငွေကျပ် ၃ သိန်းကနေ ၅ သိန်း၊ ၁၀ သိန်းအထိ ပေါက်စျေးရှိခဲ့ပါတယ်။

ပညာရပ်ဆိုင်ရာ သုတေသနစာတမ်းတွေကို  အွန်လိုင်းပေါ်ကနေ ငွေပေးပြီး  ဝယ်ယူတဲ့အထဲမှာ  ထိုင်းနိုင်ငံ ဘန်ကောက်နဲ့ ချင်းမိုင်က တက္ကသိုလ် ဆရာတချို့ ပါဝင်ပတ်သက်နေတယ်လို့ ထိုင်းသတင်းတွေမှာ ဖော်ပြပါတယ်။

နိုင်ငံတကာတက္ကသိုလ်တွေမှာ ကထိက၊ ပါမောက္ခ အစရှိတဲ့ ဂုဏ်ထူးရာထူးတွေ ရရှိဖို့ သက်ဆိုင်ရာပညာရပ်ကို လက်တွေ့ကွင်းဆင်း အချက်အလက်စုဆောင်းတာ၊ မှီငြမ်းကိုးကား ကျမ်းတွေ ရှာဖွေဖတ်ရှုတာတွေကို အချိန်ပေးပြီး သုတေသနစာတမ်း ရေးသားတင်ပြကြရပါတယ်။

ဒါပေမဲ့လည်း သုတေသနလုပ်ငန်းတွေကို အပင်ပန်းခံ၊ အချိန်ကုန်ခံ လုပ်စရာမလိုဘဲ ငွေရှိရင် အွန်လိုင်းကနေ ဝယ်ယူနိုင်ကြောင်း၊ အဆိုပါ အွန်လိုင်းပေါ်မှာ မိမိစိတ်ဝင်စားတဲ့ ဘာသာရပ်အမျိုးမျိုး၊ ခေါင်းစဉ်အမျိုးမျိုးကို ဖော်ပြထားပြီး တဦးချင်း အမည်ပေါက်အနေနဲ့သော်လည်းကောင်း၊ အစုအဖွဲ့လိုက် အမည်နဲ့သော်လည်းကောင်း မတူညီတဲ့ ဈေးနှုန်းတွေနဲ့ ဝယ်ယူနိုင်တယ်လို့ For Better Science အမည်ရှိ နိုင်ငံခြားဝက်ဘ်ဆိုက်တခုက ထုတ်ဖော်ရေးသား ဖွင့်ချလိုက်ပါတယ်။

အဆိုပါသုတေသနစာတမ်းကို ငွေပေးပြီး ဝယ်ယူတဲ့အထဲမှာ အင်ဒိုနီးရှား၊ ရုရှား၊ ဆော်ဒီအာရေဗျ၊ အာရပ်၊ အီဂျစ်၊ အီရတ်၊ ထိုင်း စတဲ့နိုင်ငံသားတွေ ပါဝင်ကြောင်း၊ ထိုင်းမှာဆိုရင် ချင်းမိုင်တက္ကသိုလ် ဆေးသိပ္ပံဌာနမှ ဆရာ ၁ ဦး၊ ဘန်ကောက် ကျူလာဖွန်းတက္ကသိုလ် သူနာပြုဌာနမှ ဆရာ ၁ ဦး ပါရှိကြောင်း ပြည်ပရောက် Biotech Institute မှ ဗိုင်းရပ်စ်ပညာရှင် ဒေါက်တာ အနန် ကျူန်းကယောက်ဝပ်ထနားက ပြီးခဲ့တဲ့ ဇန်နဝါရီ ၇ ရက်မှာ သူ့ရဲ့ လူမှုကွန်ရက်ကနေ ထုတ်ဖော်ရေးသားလိုက်ပါတယ်။

ချင်းမိုင်တက္ကသိုလ်က ဆရာဟာ ၂ နှစ်အတွင်း သုတေသနစာတမ်း အစောင် ၉၀ ကို တင်သွင်းခဲ့ကြောင်း၊ တချို့ခေါင်းစဉ်တွေဟာ သူယူထားတဲ့ဘာသာရပ်နဲ့ လုံးဝမသက်ဆိုင်ဘူး လို့လည်း ထောက်ပြထားပါတယ်။

ထိုင်းတက္ကသိုလ်လောကမှာ ဒေါက်တာဘွဲ့၊ ကထိက၊ လက်ထောက်ကထိက၊ ပါမောက္ခ၊ ဌာနမှူး အစရှိတဲ့ ရာထူးတွေရဖို့ သုတေသနစာတမ်းဟာ အဓိကကျသလို မိမိရဲ့စာတမ်းဟာ စာအုပ်အဖြစ် ထုတ်ဝေခွင့်ရရင် ဘတ်ငွေသိန်းဂဏန်းရှိ ပရောဂျက်တွေကိုလည်း ပညာရေးဌာနကနေ အထောက်အပံ့ရတယ်လို့ work point today သတင်းမှာ ဖော်ပြပါတယ်။

မရိုးသားသူတွေဟာ သောင်းဂဏန်းလောက် ငွေရင်းနှီးရုံနဲ့ ရာထူးတိုးတာ၊ လစာတိုးတာ ခံစားရပြီး ဘတ်သိန်းနဲ့ချီတဲ့ ပရောဂျက်ရန်ပုံငွေလည်း ရရှိကြောင်း၊ ဒါကြောင့် ပညာရေးလောကသည် ပညာမဲ့သော အရောင်းအဝယ် အမြတ်အစွန်းလုပ်ရာနေရာ ဖြစ်သွားမှာကို စိုးရိမ်မကင်းဖြစ်ကြောင်း ထိုင်းပညာရှင်လောကမှာ ဝေဖန်နေကြပါတယ်။

ဒီကိစ္စနဲ့ပတ်သက်ပြီး ချင်းမိုင်တက္ကသိုလ်အနေနဲ့ အလွန်ကြီးမားတဲ့ ပြဿနာရပ်အဖြစ် သတ်မှတ်ကာ အမြန်ဆုံး အရေးယူဖြေရှင်းသွားမယ်လို့ ဇန်နဝါရီ ၉ ရက် နေ့စွဲနဲ့ ထုတ်ပြန်ထားပါတယ်။

သုတေသနစာတမ်းကို မိမိဘာသာ အားထုတ်မှုမရှိဘဲ ငွေနဲ့ဝယ်ယူတာဟာ ပညာရေးကျင့်ဝတ်နဲ့ ဝန်ထမ်းဆိုင်ရာ ကိုယ်ကျင့်တရားကို ဆိုးရွားစွာထိခိုက်ကြောင်း၊ ချင်းမိုင်တက္ကသိုလ်အနေနဲ့ ဒီလိုလုပ်ဆောင်ချက်ကို လုံးဝလက်မခံကြောင်း၊ အရေးပေါ်ကော်မတီတရပ်ဖွဲ့ပြီး စွပ်စွဲခံရသူကို စုံစမ်းစစ်ဆေးကာ တက္ကသိုလ်ရဲ့ ကျင့်ဝတ် ကျင့်ထုံးတွေနဲ့အညီ အမြန်ဆုံး အရေးယူသွားမယ့်အကြောင်း ထုတ်ပြန်ထားပါတယ်။

ကိုးကား -  work point today