ဥရုဂွေးနိုင်ငံမြို့တော် မွန်တီဗီဒီယိုမှာ ဇူလိုင် ၂၂ ရက် မနက်ပိုင်းက လူနေအဆောက်အအုံတလုံးမှာ ပေါက်ကွဲမှုကြောင့် လူ ၁၀ ဦး ဒဏ်ရာရခဲ့ပြီး ၂ ဦးက စိုးရိမ်ရတဲ့ အခြေအနေမှာရှိတယ် လို့ ဒေသအာဏာပိုင်တွေက ပြောပါတယ်။
မြို့တော်ရဲ့ ကမ်းရိုးတန်းအနီးမှာရှိတဲ့ ဗီလာ ဘိုင်ယာရစ်ဇ် ရပ်ကွက်မှာ ပေါက်ကွဲမှု ဖြစ်ပွားခဲ့တာဖြစ်ပြီး အနီးနားပတ်ဝန်းကျင်နဲ့ လူနေအဆောက်အအုံတွေလည်း ထိခိုက်ပျက်စီးမှု ရှိခဲ့ပါတယ်။
အဆောက်အအုံရဲ့ ခြောက်ထပ်ဟာ လုံးဝပျက်စီးသွားကြောင်း ဒေသတွင်း မီဒီယာတွေမှာ ဖော်ပြပါတယ်။
အခင်းပြီးနောက်မှာ စိုးရိမ်ရတဲ့ အခြေအနေ ရှိတဲ့ လူ ၂ ယောက်ဟာ မီးလောင်ဒဏ်ရာ ပြင်းထန်ပြီး ကာဗွန်မိုနောက်ဆိုဒ် ရှူရှိုက်မိခြင်းကြောင့် ဒေသတွင်း ဆေးရုံမှာ ကုသခံနေရတာဖြစ်ကြောင်း ရဲတပ်ဖွဲ့က ပြောကြားခဲ့ပါတယ်။ အခင်းဖြစ်ပွားရတဲ့ အကြောင်းရင်းကို မီးသတ်သမားတွေက မဖော်ထုတ်နိုင်သေးပါဘူး။
