၈၈ မျိုးဆက်ကျောင်းသားခေါင်းဆောင် ဦးဂျင်မီနဲ့ အန်အယ်လ်ဒီ လွှတ်တော်အမတ်ဟောင်း ‌ဦးဖြိုးဇေယျာသော်တို့အပေါ်  စစ်ကောင်စီရဲ့စစ်ခုံရုံးကချမှတ်ထားတဲ့  သေဒဏ်အမိန့်ကို လက်တွေ့အကောင်ထည်ဖော်မယ်ဆိုရင် လက်တုံ့ပြန်သွားမယ်လို့ စစ်ကိုင်းတိုင်းအခြေစိုက် Myanmar Defense Force (MDF) က ဇွန်လ ၄ ရက်မှာ သတိပေး ထုတ်ပြန်လိုက်ပါတယ်။

သေဒဏ်ချမှတ်ခံရသူ ဦးဂျင်မီနဲ့ ဦးဖြိုးဇေယျာသော်တို့ရဲ့ အယူခံကို  ပယ်ချခဲ့ပြီး သေဒဏ်ကို လုပ်ထုံးလုပ်နည်းအတိုင်းဆက်လက်လုပ်ဆောင်ဖို့ အတည်ပြုထားတယ်လို့ စစ်ကောင်စီရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောထားတာပါ။

ဒါနဲ့ပတ်သတ်ပြီး MDF ကာကွယ်ရေးတပ်ဖွဲ့က "ကိုဂျင်မီနဲ့ ကိုဖြိုးဇေယျာသော်တို့ကို ကြိုးမိန့်ပေးတာ စစ်ကိုင်းတိုင်းဘက် PDF တိုင်းစေ့ကြားပြီးပြီ။ တကယ် Action ပါယူခဲ့ရင်တော့ ကျနော်တို့‌ကျင့်သုံးနေတဲ့ ကိုဓဥပဒေအတိုင်းပဲ ဆောင်ရွက်သွားမယ်။ အပြောမဟုတ်ဘူး စစ်ကိုင်းတိုင်းဘက်က အရင်လက်တွေ့ပြစေချင်တယ်ဆိုလည်း ဖြစ်တယ်။ သိပ်မခက်ခဲလှဘူး" လို့ ထုတ်ပြန်ချက်မှာ ဖော်ပြထားပါတယ်။

ဦးဂျင်မီနဲ့ ဦးဖြိုးဇေယျာသော်တို့ကို စစ်ကောင်စီရဲ့ စစ်ခုံရုံးက ပုဒ်မ ၄၉ (က) / ၅၀ (ဈ) / ၅၀ (ည) အမှုတွေနဲ့ စွဲချက်တင် သေဒဏ်ချမှတ်ခဲ့တာ ဖြစ်ပါတယ်။

ဒါ့အပြင် စစ်ကောင်စီရဲ့ သေဒဏ်အတည်ပြုခံရတဲ့အထဲမှာ ကိုလှမျိုးအောင်နဲ့ ကိုအောင်သူရဇော်တို့လည်း ပါဝင်တယ်လို့ သိရပါတယ်။

၈၈ မျိုးဆက်ကျောင်းသားခေါင်းဆောင် ဦးကျော်မင်းယု (ခ) ဦးဂျင်မီနဲ့  အန်အယ်ဒီ လွှတ်တော်အမတ်ဟောင်း ဦးဖြိုးဇေယျာသော်တို့ကို သေဒဏ်ပေးဖို့ စစ်ကောင်စီရဲ့ ဆုံးဖြတ်ချက်ဟာ လူ့အခွင့်အရေးကို ပြောင်ပြောင်တင်းတင်းချိုးဖောက်မှုလို့ ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်က ရှုတ်ချလိုက်ပါတယ်။

သေဒဏ်ဟာ လူ့အသက်ကို အပြည့်အ၀ လေးစားရမယ်ဆိုတဲ့ အချက်နဲ့ ကိုက်ညီမှု မရှိဘူးလို့ ကုလသမဂ္ဂအတွင်းရေးမှူးချုပ်ကရှုမြင်ပါတယ်လို့သူ့ရဲ့ ပြောရေးဆိုခွင့်ရှိသူက စတီဖင် ဒူဂျာရစ်က သတင်းစာရှင်းလင်းပွဲမှာ ပြောပါတယ်။

စစ်ကောင်စီရဲ့ ဒီဆုံးဖြတ်ချက်ကို ဖျက်သိမ်းဖို့လိုပြီး၊ လူ့ဂုဏ်သိက္ခာနဲ့ လူ့အခွင့်အရေးကို လေးစားဖို့ လိုတယ်လို့  ပြောပါတယ်။ 

နိုင်ငံတကာလွတ်ငြိမ်းချမ်းသာခွင့်အဖွဲ့  Amnesty International ပြောခွင့်ရှိသူကလည်း ဒီမိုကရေစီ တက်ကြွလှုပ်ရှားသူ နှစ်ယောက်ကို စစ်ကောင်စီက သေဒဏ်ပေးဖို့ ကြံစည်နေတာကို ချက်ခြင်း ဖျက်သိမ်းဖို့နဲ့ နိုင်ငံတကာအသိုင်းအဝိုင်းကလည်း ဒီကိစ္စမှာ ကြားဝင် ဟန့်တားဖို့ တောင်းဆိုလိုက်ပါတယ်။

လူ့အခွင့်အရေး စောင့်ကြည်ရေးအဖွဲ့ Human Rights Watch ရဲ့ လက်ထောက် ညွှန်ကြားရေးမှူး ဖေးလ်ရော်ဘတ်ဆင်က ထင်ရှားတဲ့ နိုင်ငံရေး ခေါင်းဆောင်နှစ်ယောက်ကို သေဒဏ်ပေးဖို့ စစ်ကောင်စီက ဆုံးဖြတ်လိုက်တာဟာ ပြည်သူတွေရဲ့ စစ်အာဏာရှင် ဆန့်ကျင်ရေး လှုပ်ရှားမှုကို ပိုပြိး ကြီးထွားစေလိမ့်မယ်။ 

ယမ်းပုံမီးကျ ဖြစ်လိမ့်မယ်။ အာဏာသိမ်း စစ်ကောင်စီဟာလည်း အာရှမှာ အဆိုးဆုံး လူ့အခွင့်အရေး ချိုးဖောက်တဲ့ ပုံရိပ်ကို ခိုင်မာစေလိမ့်မယ်လို့ ပြောပါတယ်။  

၈၈ မျိုးဆက်ကျောင်းသားခေါင်းဆောင် ဦးကိုဂျင်မီနဲ့ အန်အယ်လ်ဒီ လွှတ်တော်ကိုယ်စားလှယ်ဟောင်း ဦးဖြိုးဇေယျာသော်တို့အပေါ် ချမှတ်ထားတဲ့ သေဒဏ်ကို အတည်ပြုလိုက်လို့ စစ်ကောင်စီ ပြောခွင့်ရသူက  ဇွန်လ ၃ ရက် ဒီကနေ့  မီဒီယာတွေကို ပြောပါတယ်။

ဦးဂျင်မီနဲ့ ဦးဖြိုးဇေယျာသော်တို့ကို လက်နက်ခဲယမ်းတွေ ဖမ်းဆီးမိတယ်ဆိုပြီး  စစ်ကောင်စီက အကြမ်းဖက်မှုတိုက်ဖျက်ရေးဥပဒေတွေနဲ့ စစ်ခုံရုံးမှာ တရားစွဲကာ ပြီးခဲ့တဲ့ ဇန်နဝါရီ ၂၁ ရက်နေ့မှာ သေဒဏ်ချမှတ်တာဖြစ်ပါတယ်။