စစ်ကောင်စီက အကြမ်းဖက်မှုတိုက်ဖျက်ရေး ဥပဒေပုဒ်မ ၅၂ - က နဲ့ တရားစွဲဆိုထားတဲ့ မန္တလေးမြို့ မြန်မာနိုင်ငံ တံခွန်တောင်သူလယ်သမားအဖွဲ့ချုပ် မန္တလေးတိုင်း ဥက္ကဋ္ဌ ဦးလင်းထင်စိုးကို အိုးဘိုထောင်တွင်းတရားရုံးမှာ မတ်လ ၁၈ နေ့က ထောင်ဒဏ် ၅ နှစ်ချမှတ်လိုက်ပါတယ်။
ကိုလင်းထင်စိုးရဲ့ ရှေ့နေက “ဒီနေ့ပဲ ထောင်တွင်းတရားရုံးကနေ အမိန့်ချတယ်။ အကြမ်းဖက်နဲ့ မဆိုင်တဲ့ သက်သေတွေ တင်ပြီးတော့ အမိန့်ချလိုက်တာ။ ရှာဖွေပုံစံအဟောင်းတွေ တင်ခဲ့တယ်” လို့ ပြောပါတယ်။
မြန်မာနိုင်ငံ တံခွန်တောင်သူလယ်သမားအဖွဲ့ချုပ် မန္တလေးတိုင်း ဥက္ကဋ္ဌ ဦးလင်းထင်စိုးကို ဇူလိုင်လ ၁၈ ရက် ညပိုင်းက စစ်ကောင်စီက အင်အားအများအပြားနဲ့ ပြင်ဦးလွင်မှာ ဖမ်းဆီးခဲ့ပြီး ပုဒ်မ ၅၀၅ က နဲ့ ကနဦး တရားစွဲဆိုခံခဲ့ရပါတယ်။
ပုဒ်မ ၅၀၅ - က အတွက် အကြမ်းဖက်စစ်ကောင်စီက ဖြေလျော့ပေးခဲ့ပေမယ့် အကြမ်းဖက်မှု တိုက်ဖျက်ရေး ဥပဒေပုဒ်မ ၅၂ - က နဲ့ ထပ်မံ တရားစွဲဆိုခံခဲ့ရတာပါ။
မန္တလေးတိုင်း၊ ပြင်ဦးလွင်မြို့မှာ နေထိုင်တဲ့ မြန်မာနိုင်ငံတံခွန်တောင်သူလယ်သမားအဖွဲ့ချုပ် မန္တလေးတိုင်း ဥက္ကဋ္ဌ ဦးလင်းထင်စိုးကို ဇူလိုင်လ ၁၈ ရက် ညပိုင်းမှာ စစ်တပ်က ဖမ်းခေါ်သွားပါတယ်။
အာဏာသိမ်းစစ်ကောင်စီရဲ့ လက်နက်ကိုင်တွေဟာ အင်အားအလုံးအရင်းနဲ့ လာရောက်ဖမ်းဆီးတာဖြစ်ပြီး လူကိုဖမ်းသွားတဲ့အပြင် သူ့ရဲ့နေအိမ်ရှိ ငွေတချို့နဲ့ ကားကိုပါ သိမ်းသွားတယ်လို့ ကိုလင်းထင်စိုးနဲ့ နီးစပ်သူ တစ်ဦးက ပြောပါတယ်။
“မေးစရာရှိလို့ ဆိုပြီး ခေါ်သွားတာ။ တခြား မိသားစုတွေတော့ ဘာမှမလုပ်ဘူး။ ငွေနဲ့ ကားလည်း ယူသွားကြတယ်” လို့ ပြောပါတယ်။
မြန်မာနိုင်ငံတံခွန်တောင်သူလယ်သမားအဖွဲ့ချုပ် မန္တလေးတိုင်း ဥက္ကဋ္ဌ ဦးလင်းထင်စိုးကို ဘယ်မှာ ဖမ်းထားတယ်၊ ဘာကြောင့်ဖမ်းသွားတယ် ဆိုတာ အခုအချိန်ထိ မသိရသေးပါဘူး။
