ဘင်္ဂလားပင်လယ်အော်အရှေ့အလယ်ပိုင်းမှာ မေလ ၁၀ ရက်နေ့  ဆိုင်ကလုန်းမုန်တိုင်း ဖြစ်လာနိုင်တယ်လို့ ဇလဌာနက အရေးပေါ် ထုတ်ပြန်ထားပြီး မိုးသက်လေပြင်းတွေ တိုက်ခတ်နိုင်လို့ ဧရာဝတီမြစ်ဝကျွန်းပေါ်ဒေသနဲ့ ရခိုင်ကမ်းရိုးတန်းဒေသမှာ နေထိုင်သူတွေ အထူးသတိပြု ကြိုတင်ပြင်ဆင်ကြဖို့ တိုက်တွန်းထားပါတယ်။

ဘင်္ဂလားပင်လယ်အော်အရှေ့တောင်ပိုင်းမှာ မေလ ၇ ရက်နေ့ လေဖိအားနည်းရပ်ဝန်းဖြစ်နိုင်ပြီး ပိုမိုအားကောင်းလာနိုင်ကာ မေလ ၈ ရက်မှာ  မုန်တိုင်းငယ်(Depression) အဖြစ်သို့ ရောက်ရှိနိုင်တယ်လို့ ဆိုပါတယ်။

မုန်တိုင်းငယ်ဟာ မြောက်ဘက်သို့ ဆက်လက်ရွေ့လျားနိုင်ပြီး မေလ ၁၀ ရက်မှာ ဘင်္ဂလားပင်လယ်အော် အရှေ့အလယ်ပိုင်းမှာ ဆိုင်ကလုန်းမုန်တိုင်း အဖြစ်သို့ အားကောင်း လာနိုင်တယ်လို့ မိုးဇလက ခန့်မှန်းထားပါတယ်။

ခန့်မှန်းချက်တွေအရ မုန်တိုင်းဟာ မြစ်ဝကျွန်းပေါ်နဲ့ ရခိုင်ကမ်းရိုးတန်းအနီးသို့ ရောက်ရှိနိုင်လို့ မေ ၉ ရက်မှ ၁၃ ရက်အထိ  ရံဖန်ရံခါ မိုးသက်လေပြင်းကျရောက် လှိုင်းကြီးပြီး ရေပြင်/မြေပြင်လေ တစ်နာရီလျှင် မိုင် ၅၀ မှ ၆၀ လောက် အထိတိုက်ခတ်နိုင်တယ်လို့ ဆိုပါတယ်။ 

လက်ရှိအချိန်မှာတော့ မုန်တိုင်းစတင်အစပျိုးခြင်းမရှိသေးလို့ ခန့်မှန်းတွက်ချက်တဲ့ မော်ဒယ်တို့အပေါ်မူတည်ပြီး မုန်တိုင်းရွေ့လျားမယ့် လမ်းကြောင်းအမျိုးမျိုးပြောင်းလဲနေတယ်လို့ ဆိုပါတယ်။

ဖြစ်လာနိုင်တဲ့ မုန်တိုင်း အရှိန်ကြောင့်လေပြင်းတိုက်ခတ်၊ မိုးကြီး၊ ရေကြီး မြေပြိုဖြစ်ပေါ်နိုင်လို့ ကုန်းမြင့်ဒေသအနီးနဲ့ မြန်မာ့ကမ်းရိုးတန်းတစ်လျှောက်၊ မြစ်ငယ်၊ချောင်းငယ်တွေအနီး နေထိုင်ကြသူတွေ ကြိုတင်သတိပြုနေထိုင်ကြဖို့ အကြံပြုထားပါတယ်။

ဒါ့အပြင် ပြည်တွင်းလေကြောင်း ပျံသန်းရေးနဲ့ ကမ်းနီး၊ ကမ်းဝေးငါးဖမ်းရေယာဉ်တွေ သင်္ဘောတွေလည်း ကြိုတင်သတိပြုရှောင်ရှားကြဖို့ တိုက်တွန်းထားပါတယ်။

အမျိုးသားညီညွတ်ရေးအစိုးရ (NUG) လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနကလည်း မေလ ၈ ရက်နေ့ ဘင်္ဂလားပင်လယ်အော်အရှေ့တောင်ပိုင်းမှာ ဖြစ်ပေါ် လာနိုင်တဲ့ လေဖိအားနည်းရပ်ဝန်းနှင့်စပ်လျဉ်းပြီး  မိုးလေဝသအေဂျင်စီ ၂ ခုရဲ့ ခန့်မှန်းတွက်ချက်မှုတွေကို ထုတ်ပြန်ထားပါတယ်။

အဓိကအချက်မှာ လာမယ့်ရက်အနည်းငယ်အတွင်း ဘင်္ဂလားပင်လယ်အော် အရှေ့တောင်ပိုင်းမှာ မုန်တိုင်းတစ်လုံး ဖြစ်ပေါ်လာနိုင်ပြီး မိုးလေဝသဆိုင်ရာအချက်အလက်တွေ အပေါ်မူတည်ပြီး ခန့်မှန်းထားတဲ့ လမ်းကြောင်း(၂)ခု အနက် လမ်းကြောင်းတစ်ခုသို့ ရွေးချယ်ရွေ့လျားလာနိုင်တယ်လို့ ပုံတွေနဲ့တကွထုတ်ပြန်ထားပါတယ်။

ဒါကြောင့် ခန့်မှန်းလမ်းကြောင်းမှာ နေထိုင်ကြသူတွေအနေနဲ့  မိုးလေဝသခန့်မှန်းချက်တွေကို ဂရုပြုနားထောင်ပြီး လိုအပ်တဲ့ ကြိုတင်ပြင်ဆင်မှုများ ပြုလုပ်ကြဖို့ NUG အစိုးရက အသိပေးထားပါတယ်။

မုန်တိုင်းဟာ မြန်မာနိုင်ငံကိုဦးတည်ဖို့ ၇၅ ရာခိုင်နှုန်း လောက်ရှိကြောင်း၊ ဧရာဝတီတိုင်း ၊ရခိုင် ပြည်နယ်၊ ရန်ကုန်တိုင်း၊ မွန်ပြည်နယ်အနီး မတ္တမုကွေ့တို့မှာ လေပြင်းအန္တရာယ်ရှိလာနိုင်တယ်လို့ မိုးလေဝသ ကျွမ်းကျင်သူ ဝေဖြိုးဟန်( လေကြောင်းမိုးလေဝသ)ကလည်း သူ့ရဲ့ လူမူကွန်ရက်ကနေ သတိပေးချက်ထုတ်ပြန်ပေးထားပါတယ်။

မုန်တိုင်း လမ်းကြောင်း ၁ ဟာ ဒီကနေ့ကစပြီး  ၈ ရက်နေ့အတွင်း  မြန်မာနိုင်ငံအလယ်ပိုင်းနဲ့ မြစ်ဝကျွန်းပေါ်ဒေသတွေမှာ လက်ရှိအပူချိန်နဲ့  1-2C°လောက် အပူချိန်မြင့်တက်လာပါက ရခိုင်ပြည်နယ် စစ်တွေနဲ့  ကျောက်ဖြူအနီးကနေ မေလ ၁၃ ရက်နေ့ မွန်းလွဲ ညနေပိုင်းမှာ ဝင်ရောက်နိုင်တယ်လို့ ခန့်မှန်းထားပါတယ်။

လမ်းကြောင်း ၂ ကတော့  ဒီနေ့ကစပြီး   ၈ ရက်နေ့အတွင်း  မြန်မာနိုင်ငံ အလယ်ပိုင်းနဲ့ မြစ်ဝကျွန်းပေါ်ဒေသမှာ လက်ရှိအပူချိန်နဲ့ 3-4C°လောက်အထိ အပူ ချိန်မြင့်တက်လာပါက ဧရာဝတီတိုင်း လပွတ္တာနဲ့ ဘိုကလေးအနီးမှ မေလ ၁၃ ရက်နေ့မွန်းလွဲ ညနေပိုင်းမှာ မုန်တိုင်း ဖြတ်ကျော်ဝင်ရောက်နိုင်သည်ဟု ခန့်မှန်း တွက်ချက်ထားပါတယ်။

နေပြည်တော် လယ်ဝေး၊ ဇမ္မူသီရိ၊ စလင်း၊ နတ်မောက်၊ ရွှေတောင်နဲ့ ဓနုဖြူမြို့နယ်တို့မှာ ဧပြီ ၂၁ ရက်မှ ၂၃ ရက်အတွင်း မိုးရွာသွန်းပြီး လေပြင်းတိုက်ခတ်ခဲ့လို့ လူ ၆ ဦး သေဆုံးကာ ၁၀၉ ဦး ဒဏ်ရာရရှိခဲ့ကာ လူနေအိမ် လူနေအိမ် ၁၂၃၅ လုံး ပျက်စီးခဲ့တယ်လို့ အုပ်ချုပ်ရေးနဲ့ နီးစပ်သူတွေဆီက သိရပါတယ်။

ပဲခူးတိုင်းဒေသကြီး ရွှေတောင်မြို့နယ်မှာ မနေ့ ည၆ နာရီကျော်က မိုးသည်းထန်စွာရွာသွန်းပြီး လေပြင်းတိုက်ခတ်ခဲ့ရာ အထည်ချုပ်စက်ရုံအပါအဝင် နေအိမ် ၅၄ လုံးပြို ကျပျက်စီးခဲ့တယ်လို့ ဒေသခံတစ်ဦးက ပြောပါတယ်။

"ရွာဘက်တွေကတော့ နေအိမ်တွေပြိုကျတာ မြို့ပေါ်ကအမိုးလန်တာပဲရှိတာ သရက်တော၊ ကျီးသဲ၊ သာစီကုန်း၊ ဆယ်ကြီးကုန်း၊ နွားခြံကုန်း၊ အဲ့ရွာဘက်မှာ နေအိမ်တွေပြိုကျတယ်။”

ဧရာဝတီတိုင်း ဓနုဖြူမြို့နယ်မှာ ဧပြီ ၂၁ ရက်က မိုးရွာသွန်းပြီး လေပြင်းတိုက်ခတ်ခဲ့ရာ လူနေအိမ် အလုံး ၃၀ ကျော်  ကျော်ပြိုကျပျက်စီးခဲ့ရာ စစ်ကောင်စီက တအိမ်ထောင်လုံး ပြိုကျလျှင် ကျပ် ၁ သိန်းနဲ့ ပျက်စီးတဲ့ အိမ်တွေကိုတော့ တအိမ်ကို ကျပ် ၃၀၀၀၀ ပေးတယ်လို့ သိရပါတယ်။

ဒေသခံတစ်ဦးက "ခမရ ၁၀၈ က အိမ်ပျက်စီးသွားလို့ဆိုပြီး သုံးသောင်းလာပေးတယ်။ အကုန်ပြိုကျသွားရင် တစ်သိန်းပေးတယ်။ အိမ်ထောင်စု ၃၇ ရှိတယ်။ ပြိုကျတာက ၁၉ အိမ် ပျက်စီးတာက၁၈ အိမ်"လို့ ပြောပါတယ်။

စလင်းမြို့နယ်မှာတော့  ဧပြီလ ၂၂ နေ့လယ်က  လေပြင်းတိုက်လို့ ရပ်ကွက်တချို့နဲ့ ကျေးရွာ ၉၄ ရွာမှာ နေအိမ် ၆၃၈ လုံး ဘုန်းကြီးကျောင်း စာသင်ကျောင်းတွေပျက်စီးခဲ့ တယ်လို့ မြို့ခံတစ်ဦးက ပြောပါတယ်။

နေအိမ်က ၆၃၈ လုံး၊ စာသင်ကျောင်း ၅ ကျောင်း၊ ဘုန်းကြီးကျောင်း ၃ ကျောင်း၊ ဓမ္မာရုံ ၁ ခု၊ ဌာနဆိုင်ရာရုံး ၂ လုံး၊ ဝန်ထမ်းအိမ်ရာ ၂ ခန်း အပြင် လမ်းမီးတိုင်တွေပါ ပြိုလဲကျခဲ့တယ်လို့ ပြောပါတယ်။

နတ်မောက်မြို့နယ်မှာလည်း ဧပြီ ၂၂ ရက်က လေပြင်းတိုက်ခတ်ခဲ့လို့ မြို့ပေါ် ရပ်ကွက် ၇ ရပ်ကွက်နဲ့ ကျေးရွာ ၂၀ လောက်ရှိ  လူနေအိမ် ၂၉၆ လုံးပြိုကျပျက်စီးခဲ့ပါတယ်။

နေပြည်တော် ဇမ္မူသီရီမြို့နယ်မှာ ဧပြီ ၂၂ ရက် ညနေ ၅ နာရီလောက်က  လေပြင်းတိုက်ခတ်ခဲ့လို့ စည်ပင်သာယာကျေးရွာ၊ မွန်းတည့်ခွင်းတောင်ရွာနဲ့ မြောက်ရွာ၊ ချောင်ကန်းကြီးကျေးရွာတို့မှာ နေအိမ် အလုံး ၃၀ ကျော်ပျက်စီးသွားပါတယ်။

လယ်ဝေးမြို့နယ်မှာလည်း ဧပြီ ၂၁ ရက်ညနေက မိုးသည်းထန်စွာရွာပြီး လေပြင်းတိုက်လို့ တံတားဦးကျေးရွာနဲ့ အောင်မြင်ကုန်းကျေးရွာမှာ အိမ်ပေါင်း ၂၂၂ လုံးပျက်စီးကြောင်း လယ်ဝေးမီးသတ်ဦးစီးဌာနကနေ သိရပါတယ်။

လေပြင်းတွေကြောင့် တံတားဦးကျေးရွာနေ ဒေါ်တင်မြ၊ ဒေါ်မာမာစိုးနဲ့ အောင်မြင်ကုန်းကျေးရွာနေ ကိုကျော်စွာမြင့်၊ ကိုဝင်းထွန်း၊ ဒေါ်ကြွေနဲ့ ဒေါ်အေးရီတို့ သေဆုံးခဲ့ပြီး ၁၀၉ ဦးဒဏ်ရာရရှိကာ လယ်ဝေးမြို့နယ်ဆေးရုံနဲ့ ဇမ္မူသီရိ ခုတင် ၁၀၀၀ ဆေးရုံတို့မှာ ပို့ဆောင်ကုသပေးထားရပါတယ်။