ရန်ကုန်၊ တောင်ဥက္ကလာပမြို့နယ်၊ ၇ ရပ်ကွက် သစ္စာလမ်းပေါ်မှာ ဖေဖော်ဝါရီ ၂၈ ရက် မနေ့ည ၈ နာရီကျော်က အငှားယာဉ်တစီး မီးလောင်ပြီး တစ်ဦးသေဆုံးကာ တစ်ဦးဒဏ်ရာရရှိခဲ့တယ်လို့ ရပ်ကွက်နေသူတွေဆီက သိရပါတယ်။

အငှားယာဥ်ဟာ သစ္စာလမ်းမပေါ်မှာ ဖွင့်လှစ်ထားတဲ့ ပိုးထည်တိုက်ကို ဝင်တိုက်ကာ ဂတ်စ်အိုးပေါက်ပြီး  ယာဥ်မောင်းသေဆုံးကာ ဘေးကလိုက်လာတဲ့ အမျိုးသားတယောက် ခြေထောက်နဲ့ လက်ပြတ်သွားတယ်လို့ ရပ်ကွက်နေသူတစ်ဦးက ပြောပါတယ်။

"ဂတ်စ်အိုးပေါက်ပြီး ကားမီးလောင်တာလို့ ပြောနေကြတယ်။ ယာဥ်မောင်းကတော့ ပွဲချင်းပြီးပဲ ဘေးကလိုက်လာတဲ့သူလည်း ခြေထောက်တွေ လက်တွေပြတ်သွားတယ်။ မီးလောင်ဒဏ်ရာတွေနဲ့ သေနေတဲ့ ယာဥ်မောင်းကို ပရဟိတအဖွဲ့အတော် ဆွဲထုတ်လိုက်ရတယ်"လို့ ပြောပါတယ်။

ကားမီးလောင်မှုကို တောင်ဥက္ကလာပမြို့နယ်မီးသတ်တပ်ဖွဲ့နဲ့ ရွှေရောင်တွဲလက်ပရဟိတအသင်းက ပူးပေါင်းငြိမ်းသတ်ခဲ့ရာ ၇ မိနစ်အတွင်း မီးငြိမ်းသွားတယ်လို့ အုပ်ချုပ်ရေးနဲ့နီးစပ်သူတစ်ဦးက ပြောပါတယ်။

"ပြောနေတာတော့ ဂတ်စ်အိုးပေါက်တယ်ပေါ့။ ဒါပေမဲ့ စစ်ဆေးရဦးမှာ။ သေတဲ့သူရော ဒဏ်ရာရတဲ့သူရော မိသားစုနဲ့ဆက်သွယ်နိုင်ဖို့ ဆောင်ရွက်နေတယ်။”

သေဆုံးသူနဲ့ ဒဏ်ရာရရှိသူကို ရွှေရောင်တွဲလက်ပရဟိတအသင်းက သင်္ဃန်းကျွန်းဆေးရုံကြီးကို ပို့ဆောင်ပေးထားပါတယ်။

ဖေဖော်ဝါရီ ၁၆ ရက်မှ ၂၈ ရက် အတွင်း ရန်ကုန်တိုင်း မရမ်းကုန်း၊ ဒဂုံ၊ ဒဂုံမြို့သစ် စက်မှုဇုန်နဲ့ တောင်ဥက္ကလာပမြို့နယ်တွေမှာ ကားမီးလောင်မှု လေးကြိမ်ဖြစ်ပွားခဲ့ပြီး လူတစ်ဦးသေဆုံးကာ တစ်ဦးဒဏ်ရာရရှိခဲ့ ပါတယ်။

ဇန်နဝါရီလကလည်း ကမာရွတ်၊ တောင်ဒဂုံနဲ့ မင်္ဂလာဒုံမြို့နယ်တွေမှာ ကားမီးလောင်မှု ဖြစ်ခဲ့ပေမဲ့ ထိခိုက်ဒဏ်ရာရသူတော့ မရှိပါဘူး။ 

Photo- ရွှေရောင်တွဲလက်ပရဟိတအသင်း

မန္တလေးမြို့၊ ရန်ကုန် - မန္တလေးလမ်း၊  ၇၈ လမ်းရှိ စစ်တပ်ပိုင် မြဝတီဘဏ်ခွဲကို  လုံခြုံရေးယူပေးနေတဲ့ စစ်ကောင်စီ တပ်သားတွေကို မန္တလေးမြို့ပြပြောက်ကျားမဟာမိတ်တပ်ပေါင်းစုအဖွဲ့က ဧပြီ ၂ ရက် ဒီနေ့ ည ၇ နာရီ လောက်က သေနတ်နဲ့ သွားရောက်ပစ်ခတ်ခဲ့ရာ စစ်ကောင်စီ တပ်သားတယောက်  သေဆုံးသွားပါတယ်။

မန္တလေးမြို့ပြပြောက်ကျား မဟာမိတ်တပ်ပေါင်းစု အဖွဲ့ဝင် ဗိုလ်ဖီးနစ်က " ကျနော်တို့နောက်မှာ Double Cab ၂ စီးရှိတဲ့ ကြားက ရအောင်တိုက်ခိုက်ခဲ့တာပါ ။ သေနတ်နဲ့ ၈ ချက်ပစ်ခတ်ခဲ့ပြီး လဲကျသွားတဲ့ စစ်ကောင်စီ တပ်သားဆီက သေနတ်ကောက်ဖို့ ကြိုးစားခဲ့ပေမဲ့ အချိန်မရလို့ အမြန်ဆုတ်ခဲ့ရတယ်”လို့ ဒီဗွီဘီကိုပြောပါတယ်။

အခုလို မြဝတီဘဏ်ခွဲ လုံခြုံရေးတပ်ဖွဲ့ ပစ်ခတ်ခံရတာနဲ့ ပတ်သက်ပြီး စစ်ကောင်စီ ပြန်ကြားရေးသ သတင်းထုတ်ပြန်တာ မရှိသေးပါဘူး။ 

သေနတ်သံဖြစ်စေ ၊ ပေါက်ကွဲသံဖြစ်စေ အသံတခုခုကြားပါက  ပြည်သူတွေအနေနဲ့ စူးစမ်းလိုစိတ် မရှိကြပဲ လမ်းကြောင်းတွေရှင်းပေးကြဖို့ ပြောက်ကျားတပ်ဖွဲ့က တောင်းဆိုထားပါတယ်။