ရန်ကုန်တိုင်း၊ ဒလမြို့နယ်၊ ဥပဒေရုံးနဲ့ ခန်းမတွေတည်ရှိရာ မင်းရဲကျော်စွာလမ်းပေါ်မှာ ဒီနေ့ သြဂုတ် ၈ ရက်နေ့လည် ၂ နာရီခွဲ ဝန်းကျင်က စစ်ကောင်စီတပ်ဖွဲ့ဝင်အချင်းချင်းပစ်ခတ်လို့  ၁ ဦး သေဆုံးခဲ့တယ်လို့ ဒေသခံတွေထံက သိရပါတယ်။

အခင်းဖြစ်ပြီးပြီးချင်း ပစ်ခတ်ခဲ့တဲ့စစ်သားကို ဒလမြို့ရဲစခန်းမှာထိန်းသိမ်းထားကာ စစ်ဆေးနေတယ်လို့ သိရပြပီး  ပစ်ခတ်ခံရပြီး သေဆုံးသူဟာ  ဗိုလ်အဆင့်ရှိသူ ဖြစ်တယ်လို့ ဒေသခံတစ်ဦးက ပြောပါတယ်။

အဆိုပါ ပစ်ခတ်မှု ဘာကြောင့် ဖြစ်ပွားရတာလဲဆိုတာနဲ့ ဘယ်လို ဖြစ်ပွားခဲ့တယ်ဆိုတာတော့ အသေးစိတ်မသိရသေးပါဘူး။ 

ချင်းပြည်နယ် ဟားခါးမြို့နယ် မြို့သစ်ရပ်ကွက်မှာ မနေ့ည ၁၁ နာရီ မိနစ် ၄၀ လောက်က မီးလောင်မှုဖြစ်ပွားခဲ့ပြီး လူနေအိမ်‌ ၃ လုံး ပျက်စီးဆုံးရှုံးကာ အမျိုးသား ၁ ဦး သေဆုံးခဲ့တယ်လို့ မြို့နယ် မီးသတ်တပ်ဖွဲ့ တာဝန်ရှိသူတဦးက ပြောပါတယ်။

“အပူပေးတဲ့ ဟီတာစက်က တစ်ဆင့် မီးလောင်ကျွမ်းခဲ့တာပါ။ လက်တလောတော့ သေဆုံးသူကို ပုဒ်မ နှစ်ခုနဲ့ အမှုဖွင့်ထားတယ်။ သူက အိမ်ငှားနေသူပါ။”

ပြည်နယ်၊ ခရိုင်နဲ့ မြို့နယ်မီးသတ် တပ်ဖွဲ့ဝင်   ၅၀ နီးပါးက အုပ်ချုပ်မှုယာဥ်၊ မီးငြှိမ်းသတ်ယာဥ်၊ မီးသတ်ရေသယ်ယာဥ် သူနာတင်ယာဥ် စုစုပေါင်း ၈ စီးနဲ့ သွားရောက် မီးငြှိမ်းသတ်ခဲ့ကာ အခင်းဖြစ်ပြီး တစ်နာရီနီးပါးအကြာမှာ မီးငြိမ်းသတ်နိုင်ခဲ့တယ်လို့ ဆိုပါတယ်။

မီးလောင်သေဆုံးသွားသူကတော့ အိမ်ငှားနေထိုင်တဲ့ ဦးသန်းဝင်း (၃၆ နှစ်) ဖြစ်တယ်လို့ သိရပါတယ်။

မီးလောင်မှုနဲ့ပတ်သက်လို့ သေဆုံးသူကို ဟာခါးမြို့မရဲစခန်းမှာ မီးပေါ့ဆမှု၊ လူသေဆုံးမှု ရာဇသတ်ကြီးဥပဒေပုဒ်မ ၂၈၅/၃၀၄-က တို့နဲ့ အမှုဖွင့်လှစ်ထားတယ်လို့ အဆိုပါရဲစခန်းက သိရပါတယ်။

ရဲထွဋ်