ဆူဒန်စစ်တပ်ဟာ ၂၀၂၃ ရွေးကောက်ပွဲအပြီးမှာ နိုင်ငံရေးကနေ ထွက်သွားမယ်လို့ ဗိုလ်ချုပ်ကြီး အဘ်ဒယ်ဖှာတာ အယ်လ်ဘာဟန်က ရိုက်တာသတင်းဌာနနဲ့ လူတွေ့ မေးမြန်းခန်းမှာ ဒီဇင်ဘာ ၄ ရက်က ပြောလိုက်ပါတယ်။

ဖြုတ်ချခံ အာဏာရပါတီဟောင်းဟာ အသွင်ကူးပြောင်းရေး အစိုးရထဲမှာ ဘာအခန်းကဏ္ဍမှ ရမှာ မဟုတ်ဘူးလို့လည်း သူက ပြောလိုက်ပါတယ်။

ဘာဟန် ဦးဆောင်ပြီး အောက်တိုဘာနှောင်းပိုင်းမှာ စစ်တပ်က အာဏာသိမ်းပြီးတဲ့နောက် ဆူဒန်နိုင်ငံရဲ့ အရပ်သားဦးဆောင်တဲ့ ဒီမိုကရေစီ အသွင်ကူးပြောင်းရေးဟာ လမ်းချော် သွားခဲ့တာပါ။

 ၂၀၂၃ ဇူလိုင်မှာ ရွေးကောက်ပွဲတွေ မကျင်းပမီ နည်းပညာရှင်တွေ ဦးစီးတဲ့ အစိုးရကို ဦးဆောင်ဖို့ နိုဝင်ဘာ ၂၁ရက်မှာ ဝန်ကြီးချုပ်ဟောင်း အဘ်ဒါလာ ဟမ်းဒေါ့ခ်ကို မူလရာထူးမှာပြန်ထားဖို့ သဘောတူခဲ့ ပါတယ်။

“အစိုးရတရပ်ကို ရွေးကောက်ပြီးရင် စစ်တပ်ရော လက်နက်ကိုင်တပ်ရော ဘယ်လို လုံခြုံရေးတပ်ရောမဆို နိုင်ငံရေးမှာ ဝင်ပါမယ်လို့ ကျနော်မထင်ဘူး။ ဒါကို ကျနော်တို့ သဘောတူထားတယ်။ ဒါဟာ သဘာဝ အခြေအနေပဲ”လို့ ဘာဟန်က ပြောခဲ့ပါတယ်။

ဒါပေမဲ့ အိမ်နီးချင်း ခုခံရေး ကော်မတီနဲ့ နိုင်ငံရေးပါတီတွေက စစ်တပ် နိုင်ငံရေးကနေ ချက်ချင်း နှုတ်ထွက်ဖို့ ဆော်ဩခဲ့ပြီး ဟမ်းဒေါ့ခ်နဲ့ အပေးအယူ အပါအဝင် စစ်တပ်နဲ့ ဘယ်လို အပေးအယူကိုမဆို ပယ်ချခဲ့ပါတယ်။

အစိုးရ ဆန့်ကျင်ရေး ဆန္ဒပြပွဲတွေကို စစ်တပ်က အကြမ်းဖက် နှိမ်နင်းလို့ လုံခြုံရေး တပ်ဖွဲ့တွေရဲ့ သေနတ် ဒဏ်ရာကြောင့် အများအပြားပါတဲ့ လူ ၄၄ ယောက်ထက် မနည်း ကျည်သင့် သေဆုံးခဲ့တယ်လို့ ဆေးဘက်ဝန်ထမ်းတွေက ပြောပါတယ်။ 

ဒီဖြစ်ရပ်နဲ့ ပတ်သက်လို့ ဘယ်သူလုပ်တယ်ဆိုတာ ဖော်ထုတ်ဖို့ စုံစမ်းစစ်ဆေးနေပြီး ရာဇဝတ်သားတွေကို အပြစ်ပေးမယ်လို့ ဘာဟန်က ပြောခဲ့ပါတယ်။

အစိုးရဟာ ငြိမ်းချမ်းတဲ့ ဆန္ဒပြပွဲတွေရဲ့ အခွင့်အရေးကို ကာကွယ် ပေးတယ်လို့လည်း သူက ဆက်ပြောပါတယ်။ 

ဆူဒန်နိုင်ငံဟာ စီးပွားရေး အကျပ်အတည်းထဲကို နက်နက်ရှိုင်းရှိုင်း ရောက်နေပြီး နိုင်ငံတကာ ငွေကြေး ရံပုံငွေအဖွဲ့ IMF ၊ ကမ္ဘာ့ဘဏ်နဲ့ အနောက်နိုင်ငံတွေက ငွေတွေ စီးဝင်လာချိန်က စပြီး အပြုသဘော ဆောင်တဲ့ လက္ခဏာတွေ ပေါ်လာခဲ့တာပါ။  စစ်တပ်က အာဏာသိမ်းပြီးချိန်မှာတော့ အဲဒီ အထောက်အပံ့ အများအပြား ရပ်ဆိုင်းခဲ့ပါတယ်။

အရပ်သားအစိုးရ လက်အောက်မှာ အခြေအနေတွေ တည်ငြိမ်ပြီးတဲ့အခါ နိုင်ငံတကာ စီးပွားရေး အထောက်အပံ့တွေ ပြန်ရောက်လာမယ်လို့ မျှော်လင့်ကြောင်း ဘာဟန်က ပြောခဲ့ပါတယ်။