close

Adidas

close

November 11, 2022

ဆန္ဒပြအလုပ်သမားများအား အလုပ်ထုတ်မှု မြန်မာပေါင်ချိန်စက်ရုံကို Adidas ကန့်ကွက်

မြန်မာပေါင်ချိန်ဖိနပ်စက်ရုံက လုပ်ခလစာတိုးပေးဖို့ တောင်းဆိုတဲ့ အလုပ်သမားတချို့ကို အလုပ်ကထုတ်လိုက်တဲ့အပေါ် ကန့်ကွက်ကြောင်း အဲဒီစက်ရုံကချုပ်လုပ်နေတဲ့ Adidas ဘရန်း ကုမ္ပဏီက ထုတ်ပြန်လိုက်ပါတယ်။

မြန်မာပေါင်ချိန်စက်ရုံက လုပ်ခလစာတိုးမြှင့်ပေးဖို့ တောင်းဆိုဆန္ဒပြတဲ့ အလုပ်သမားတွေထဲက အလုပ်သမား ၃၀ နီးပါးကို အလုပ်ကထုတ်ပယ်ခဲ့တာပါ။

အဲဒီလိုထုတ်ပယ်ခံရတဲ့ အလုပ်သမားတွေဟာ ရပိုင်ခွင့်အတွက် လွတ်လပ်စွာ တောင်းဆိုတာဖြစ်ပြီး အလုပ်ထုတ်ခံရတဲ့အထဲမှာ စက်ရုံသမဂ္ဂအဖွဲ့ဝင်အများစု ပါဝင်ခဲ့တာဟာ လက်ခံနိုင်စရာမဟုတ်ဘူးလို့ Adidas ရဲ့ ထုတ်ပြန်ချက်မှာ ဖော်ပြထားပါတယ်။

သူတို့အနေနဲ့ အဲဒီလို အလုပ်သမားတွေကို ဖိနှိပ် အလုပ်ထုတ်ပယ်တာဟာ ဥပဒေကြောင်းနဲ့ ညီမညီ စစ်ဆေးနေပြီး အလုပ်ထုတ်ခံထားရသူတွေကို အမြန်ဆုံး ပြန်ခန့်ထားဖို့လည်း မြန်မာပေါင်ချိန်စက်ရုံကို တောင်းဆိုထားပါတယ်။

အဲဒီစက်ရုံက အလုပ်သမားတွေဟာ တရက်လုပ်ခ ၄,၈၀၀ ကျပ်အစား ၈,၀၀၀ ကျပ်ပေးဖို့ အောက်တိုဘာလကုန်ပိုင်းက စက်ရုံထဲ ဆန္ဒပြတောင်းဆိုခဲ့တာပါ။

ဆန္ဒပြမှုမှာ အလုပ်သမားရာချီ ပါဝင်ခဲ့ပြီး အဲဒီစက်ရုံက အလုပ်သမားသမဂ္ဂဝင် ၁၇ ယောက် အပါအဝင် ၃၀ လောက်ကို အလုပ်ကထုတ်ပယ်ခဲ့တာ ဖြစ်ပါတယ်။

အလုပ်ထုတ်ခံရတဲ့အထဲ ပါဝင်သူတယောက်က “အခုက ဘရန်းကလည်း ဖိအားပေးထားတော့ စက်ရုံက ဘာဆက်လုပ်မယ် မသိသေးဘူး။ ဆန္ဒပြပွဲမှာပါတဲ့ အလုပ်သမားတွေကိုတော့ သတိပေး အရေးယူတာ ပယ်ဖျက်ပေးနေတယ်။ အလုပ်ထုတ်ခံရသူတွေကိုတော့ ဘာဆက်လုပ်မယ် မသိဘူး။ အဲဒါ စောင့်ကြည့်နေတုန်း” လို့ ပြောပါတယ်။

မြန်မာပေါင်ချိန်စက်ရုံဟာ Adidas ဖိနပ်ကို အဓိကချုပ်လုပ်နေတာဖြစ်ပြီး အဲဒီ ဘရန်းချုပ်တဲ့ စက်ရုံတွေမှာ အလုပ်သမားအခွင့်အရေး ချိုးဖောက်ခံရမှု ရှိနေတယ်ဆိုပြီး နိုင်ငံတကာရှိ အလုပ်သမားအဖွဲ့တွေက ကမ်ပိန်းလုပ် ရှုတ်ချနေကြပါတယ်။

မြန်မာနိုင်ငံက သူတို့ထုတ်ကုန်ချုပ်လုပ်နေတဲ့ စက်ရုံက ဖြစ်ပျက်တဲ့ အခြေအနေအပေါ် Adidas က ဖြေရှင်းချက်ထုတ်ပေမဲ့ ထိရောက်မှုရှိမရှိ စောင့်ကြည့်ရဦးမယ်လို့ မြန်မာပေါင်ချိန်စက်ရုံ လုပ်သားတချို့က ဆိုပါတယ်။

မြန်မာပေါင်ချိန်စက်ရုံက အလုပ်ထုတ်ခံထားရတဲ့ သမဂ္ဂဝင်တွေကတော့ အလုပ်ပြန်ရဖို့အပြင် မူလတောင်းဆိုချက်ဖြစ်တဲ့ လုပ်ခလစာ တိုးမြှင့်ပေးရေးအတွက် Adidas က ကူညီပေးနိုင်မယ်လို့ မျှော်လင့်ကြောင်း ပြောပါတယ်။

57 seconds Ago

June 4, 2020

အာဆင်နယ်ကွင်းလယ်လူ အိုဇေးလ်နှင့်  Adidas စာချုပ်သက်တမ်း ထပ်မတိုး

အာဆင်နယ်ကွင်းလယ်လူ အိုဇေးလ်ကို Adidas ကုမ္ပဏီက စပွန်ဆာစာချုပ် သက်တမ်းတိုး တော့မှာ မဟုတ်ဘူးလို့ သိရပါတယ်။  ကွင်းလယ်လူ အိုဇေးလ်ဟာ ဂျာမန်အားကစားပစ္စည်း ထုတ်လုပ်ရေးကုမ္ပဏီ Adidas နဲ့ ပေါင် ၂၂ သန်းတန်စာချုပ်ကို ၂၀၁၃ ခုနှစ်တည်းက ချုပ်ဆိုခဲ့တာဖြစ်ပါတယ်။  ၁ နှစ်ကို ပေါင် ၂ ဒသမ ၅ သန်း ရရှိခဲ့တဲ့ အိုဇေးလ်နဲ့ Adidas တို့ရဲ့ စာချုပ်သက်တမ်းက အခု လကုန် ကုန်ဆုံးမယ်လို့ သိရပါတယ်။  အိုဇေးလ်ဟာ ၂၀၁၈ ခုနှစ်က တူရကီသမ္မတ အာဒိုဂန်နဲ့ တွေ့ဆုံခဲ့တာကြောင့် ဂျာမနီဘောလုံးအဖွဲ့ချုပ်က ဝေဖန်ခဲ့ပြီး လက်ရွေးစင်သင်းကနေလည်း အနားယူခဲ့ပါတယ်။  Adidas က စပွန်ဆာစာချုပ် ရပ်နားလိုက်တာဟာ အဲဒီကိစ္စတွေနဲ့ သက်ဆိုင်နေတယ်လို့ သုံးသပ်မှုတွေရှိပေမယ့် အတည်ပြနိုင်ခြင်းတော့ မရှိသေးပါဘူး။  အိုဇေးဟာ အာဆင်နယ်မှာ တပတ်လုပ်ခပေါင် ၃ သိန်းခွဲရရှိနေပြီး အသင်းရဲ့ လုပ်ခအများဆုံး ကစားသမားဖြစ်ပါတယ်။ 
2 years Ago
Up