APEC အာရှ-ပစိဖိတ် စီးပွားရေးပူးပေါင်းဆောင်ရွက်ရေး အသင်းကြီးရဲ့ ၂၀၂၂ ခုနှစ်အတွက် ထိပ်သီးဆွေးနွေးပွဲကြီးကို နိုဝင်ဘာ ၁၆ ရက်မှ ၁၈ ရက်အထိ ထိုင်းနိုင်ငံက အိမ်ရှင်အဖြစ် လက်ခံကျင်းပမှာ ဖြစ်ပါတယ်။

နိုင်ငံတကာက နိုင်ငံ့အကြီးအကဲတွေပါ တက်ရောက်လာမယ့် ဒီအစည်းအဝေးကြီး ချောမွေ့အောင်မြင်စွာ ပြီးဆုံးရေးအတွက် အိမ်ရှင်ထိုင်းနိုင်ငံအနေနဲ့ အဘက်ဘက်ကနေ ထောင့်စေ့အောင် ကြိုတင်ပြင်ဆင်ထားရာမှာ ၁၀၀ ရာခိုင်နှုန်း အဆင်သင့်ဖြစ်နေပါပြီလို့ ထိုင်းနိုင်ငံခြားရေးဝန်ကြီးဌာန ပြန်ကြားရေးဌာနညွှန်မှူး နိုင်းထားဏီး ဆဲန်ရတ်က သတင်းထောက်တွေကို ပြောပါတယ်။

အစည်းအဝေးခန်းမအဆင်အပြင်၊ နေရာချထားရေး၊ လုံခြုံရေး၊ အစည်းအဝေးမှာ ဝေငှမယ့် စာရွက်စာတမ်းတွေအားလုံး ရာနှုန်းပြည့် ပြင်ဆင်ထားပြီးကြောင်း၊ အစည်းအဝေး တက်ရောက်ဖို့ နိုင်ငံတကာက ဧည့်သည်တော်ပေါင်း ၂,၂၀၀ ဦး ကြိုတင်မှတ်ပုံတင်ထားပြီး အဲဒီထဲမှာ အမေရိကန်သမ္မတက သူ့ရဲ့လက်ထောက် ဒုသမ္မတ ကမ္မလာ ဟယ်ရစ်ကို စေလွှတ်မယ်လို့ ပြောပါတယ်။

ရုရှားသမ္မတ ဗလာဒီမာ ပူတင်ရဲ့ အတည်ပြုချက်ကိုတော့ စောင့်မျှော်နေဆဲဖြစ်ကြောင်း၊ အထူးစီးပွားရေးဇုန်က ခေါင်းဆောင်တွေဖြစ်တဲ့ တရုတ်သမ္မတ ရှီကျင့်ဖျင်၊ ကနေဒါဝန်ကြီးချုပ် ဂျပ်စတင် ထရူးဒေါ၊ အင်ဒိုနီးရှားသမ္မတ ဂျိုကို ဝီဒိုဒို၊ ဟောင်ကောင်အမှုဆောင်အရာရှိချုပ် ဂျွန်လီး၊ ဂျပန်ဝန်ကြီးချုပ် ဖုမီအို ခီရှိဒါ့၊ ဖိလစ်ပိုင်သမ္မတ မားကို့စ် ဂျူနီယာ၊ စင်ကာပူဝန်ကြီးချုပ် လီရှန်လွန်းနဲ့ နယူးဇီလန်ဝန်ကြီးချုပ် Jacinda Ardern တို့လည်း တက်ရောက်လာမှာဖြစ်တယ်လို့  နိုင်းထားဏီး ဆဲန်ရတ်က ပြောပါတယ်။

APEC 2022 အစည်းအဝေးလုံခြုံရေးအတွက် ထိုင်းအမျိုးသားရဲတပ်ဖွဲ့ ရဲချုပ်ကြီး ဒမ်းရုန်းဆဒ် ကစ်သီပဖတ်နဲ့ အထူးလုံခြုံရေးဌာနက တာဝန်ရှိသူတွေဟာ မနေ့ နိုဝင်ဘာ ၉ ရက်က အစည်းအဝေးကျင်းပမယ့်နေရာနဲ့ ပတ်ဝန်းကျင်အနီးတဝိုက်ရဲ့ လုံခြုံရေး ပြင်ဆင်မှုတွေကို လာရောက်စစ်ဆေးသွားခဲ့ပါတယ်။

K-9 တပ်ဖွဲ့မှ အနံ့ခံခွေးတွေရဲ့ အန္တရာယ်ရှိပစ္စည်းတွေ ရှာဖွေမှု၊ EDO အဖွဲ့ရဲ့ ဗုံးရှာဖွေရှင်းလင်းမှု၊ အရေးပေါ်အခြေအနေလှုပ်ရှားမှု စတာတွေကို စစ်ဆေးကြည့်ရှုခဲ့ပါတယ်။

APEC 2022 အစည်းအဝေးကာလအတွင်း ယာဉ်ကြောပိတ်ဆို့မှု မဖြစ်စေဖို့ အစည်းအဝေးကျင်းပမယ့် ဆီရီခေတ် အမျိုးသားခန်းမကြီးတည်ရှိရာ လမ်းကြောင်းတွေဖြစ်တဲ့ ရာ့ချ်ဒါး ဖိဆစ်လမ်းမှ အဆုန်မွန်းသရီးမီးပွိုင့် - ဖရလမ်းဆီမီးပွိုင့် - ဒုန်ဖိထပ် မီးပွိုင့်ထိ စတဲ့လမ်းကြောင်းတွေ ပိတ်ထားမှာဖြစ်ပါတယ်။

ဒါ့အပြင် ဘန်ကောက်၊ နွန်ထပူရီ၊ စမွတ်ပရကန် စတဲ့ ခရိုင် ၃ ခုတွင်းမှာ နိုဝင်ဘာ ၁၆ ရက်မှ ၁၈ ရက်နေ့ထိ အစိုးရရုံးပိတ်ရက်အဖြစ် ကြေညာပြီး စာသင်ကျောင်းတွေအားလုံးလည်း ပိတ်ထားရမယ်လို့ ဆိုပါတယ်။

နိုဝင်ဘာ ၁၆ ရက်မှ ၁၉ ရက်နေ့ထိ MRT မြေအောက်ရထားပြေးဆွဲမှု ရပ်နားပြီး ဘတ်စ်ကား ၆ စီးနဲ့ ကြိုပို့ပေးမယ်လို့ ဆိုပါတယ်။

အစည်းအဝေးကာလတွင်း ဘန်ကောက်ဧရိယာထဲမှာ ဒရုန်းလွှတ်တင်ခွင့်မရှိ၊ တက်လာတဲ့ ဒရုန်းတွေကို တန်ပြန်တိုက်ခိုက်ဖို့ Anti-Drone တွေ ၂၄ နာရီ လွှတ်ထားမယ်လို့ ဆိုပါတယ်။

APEC 2022 အစည်းအဝေးကာလမှာ ရဲဝန်ထမ်းတွေ လုံခြုံရေးအပြည့်အဝယူရုံနဲ့ မပြီးဘဲ ပြည်သူတွေပါ ပူးပေါင်းပါဝင်စေလိုကြောင်း၊ မသင်္ကာဘွယ်ရာတွေ တွေ့ရှိပါက အရေးပေါ်ဖုန်းလိုင်း ၁၉၁ သို့မဟုတ် ၁၅၉၉ ကို ၂၄ နာရီ ဆက်သွယ်အကြောင်းကြားဖို့၊ သတင်းပို့ချက်ဟာ လုံခြုံရေးအတွက် အရေးပါကာ လူဆိုးကိုဖမ်းမိနိုင်က ဆုချမယ့် အကြောင်းလည်း ရဲတပ်ဖွဲ့က ထုတ်ပြန်ထားပါတယ်။

APEC 2022 ကာလမှာ ဆန္ဒပြ တောင်းဆိုမှုတွေလည်းရှိကြောင်း၊ လက်ရှိ ဆန္ဒပြခွင့် တောင်းထားတဲ့အဖွဲ့ ၂ ဖွဲ့ရှိပြီး ပြည်သူ့ဟစ်တိုင်နေရာမှာသာ ဆန္ဒပြဖို့ ခွင့်ပြုထားကြောင်း ဘန်ကောက်မြို့တော်ဝန် နိုင်းချာ့ချတ်ဆစ်ထိဖန်းက သတင်းထောက်တွေကို ပြောပါတယ်။

ဒီအဖွဲ့တွေအတွက်လည်း စိုးရိမ်ပူပန်မှုမရှိကြောင်း၊ တာဝန်ယူသွားမယ့် အဖွဲ့တွေလည်း ဒီမတိုင်ခင်ကတည်းက သင်တန်းတွေပေးပြီး လေ့ကျင့်ထားကြတာမို့ အစစအရာရာ ချောမွေ့စွာ ပြီးဆုံးသွားမယ်လို့ ယုံကြည်ကြောင်း ဘန်ကောက်မြို့တော်ဝန်က ပြောသွားပါတယ်။