မြန်မာ့အရေးကို အထူးစိုးရိမ်ပြီး သက်ဆိုင်တဲ့ဘက်အားလုံးပါဝင်တဲ့ တွေ့ဆုံဆွေးနွေးရေး အမြန်ဆုံးပြုလုပ်သွာဖို့ တိုက်တွန်းကြောင်း ASEM အာရှ-ဥရောပ ထိပ်သီးအစည်းအဝေးကနေ ကြေညာချက် ထုတ်ပြန်လိုက်ပါတယ်။
ကမ္ဘောဒီးယားနိုင်ငံကနေ အိမ်ရှင်အဖြစ် အွန်လိုင်းကတဆင့် ၂ရက်တာကျင်းပတဲ့ ASEM ထိပ်သီးအစည်းအဝေးကို အာရှ-ဥရောပ နိုင်ငံ ၅၁ နိုင်ငံ တက်ရောက်ခဲ့ပြီး မြန်မာ အာဏာသိမ်းစစ်ခေါင်းဆောင်ကို မဖိတ််ပဲ နိုင်ငံရေးအရကိုယ်စားမပြုသူကိုသာ ဖိတ်ကြားခဲ့တာကြောင့် မြန်မာဘက်က တက်ရောက်ခဲ့ခြင်းမရှိပါဘူး။
ဒါ့အပြင် မြန်မာ့အရေးနဲ့ ပတ်သက်လို့ ပါဝင်သင့်ပါဝင်ထိုက်သူ ဘက်ပေါင်းစုံပါဝင် တွေ့ဆုံဆွေးနွေးမှု ပြုလုပ်ဖို့အပါအဝင် အာဆီယံဘုံသဘောတူညီချက်ကို ထောက်ခံသွားမှာဖြစ်ကြောင်း နိုင်ငံကြီး(၇)နိုင်ငံက ပူးတွဲကြေညာချက်ထုတ်ပြန်လိုက်ပါသေးတယ်။
အမေရိကန်၊ ယူကေ၊ သြစတြေးလျ၊ ကနေဒါ၊ နယူးဇီလန်၊ နော်ဝေနဲ့ တောင်ကိုရီးယားနိုင်ငံတို့ ပါဝင်တဲ့ အဲဒီ့ကြေညာချက်ထဲမှာ အာဆီယံအထူးသံတမန်ကို မြန်မာနိုင်ငံအမြန်သွားရောက်နိုင်ဖို့လည်း တိုက်တွန်းထားပါတယ်။
အာဆီယံ အထူးသံတမန်ဟာ မြန်မာနိုင်ငံကိုသွားတဲ့အခါ ဖမ်းဆီးခံထားရတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တခြားနိုင်ငံရေးခေါင်းဆောင်တွေနဲ့ တွေ့ဆုံနိုင်ဖို့ တောင်းဆိုခဲ့ပေမယ့် စစ်ကောင်စီဘက်က လက်မခံပဲ ပယ်ချထားပါတယ်။
