မော်စကို၊ စိန့်ပီတာစဘတ် အပါအဝင်  ရုရှားနိုင်ငံရဲ့ တခြားမြို့ကြီးတွေရှိ ဘဏ်တွေနဲ့ ATM ငွေထုတ်စက်တွေမှာ လူတွေ ငွေစုပြုံထုတ်နေတာကြောင့် ငွေပြတ်လပ်မှု ဖြစ်နေပါတယ်။

ရုရှားဘဏ်တွေကို နိုင်ငံတကာငွေပေးချေမှုစနစ်ကနေ ပိတ်ပင်ခဲ့ပြီးနောက် ငွေအပ်နှံသူတွေက စိုးရိမ်ပြီး အလုအယက် ပြန်ထုတ်နေကြတာပါ။ ရူဘယ်ငွေကြေးတန်ဖိုးကလည်း စစ်စတိုက်တဲ့ ဖေဖော်ဝါရီ ၂၄ ရက်ကတည်းက ထိုးကျသွားတာပါ။

မော်စကိုမြို့ ဘဏ်တခုမှာ ငွေထုတ်ဖို့ စောင့်ဆိုင်းနေတဲ့ အီဂေါ ဆိုသူက “ဒီမှာ အခြေအနေက ဆိုးလာပြီ။ ၂၁ ရာစုမှာ နေနေတာပါ။ ကိုယ့်ငွေကို စမတ်ဖုန်းနဲ့ အလုပ်လုပ်နေတာ။ အခုတော့ ဘဏ်မှာ တန်းစီနေရတယ်၊ ဘယ်လိုလုပ်မလဲ၊ စစ်ကို လုံးဝ ဆန့်ကျင်ပါတယ်” လို့ ပြောပါတယ်။

နောက်တဦးကလည်း “SWIFT ငွေပေးချေမှု အလုပ်မဖြစ်တော့ရင် ဘယ်လိုပစ္စည်းတွေ စားစရာတွေ ဝယ်မလဲ၊ နိုင်ငံခြားကုန်ပစ္စည်းတွေကို ဘယ်လို လှမ်းဝယ်တော့မလဲ။ စစ်ပွဲကြောင့် ထိခိုက်မှုတွေ အများကြီး ရှိတယ်” လို့ ပြောတာပါ။

ရန်ကုန်က ပုဂ္ဂလိက  ဘဏ်တွေရဲ့ ATM စက်တွေမှာ ငွေလာထုတ်တဲ့သူတွေများနေတဲ့အတွက် ပြည်သူတွေဟာ တန်းစီနေရရုံသာမကဘဲ လက်မှာ  ဆော့ပင်နဲ့ နံပတ်ရေးပြီး တန်းစီငွေထုတ်နေကြရပါတယ်။

ပုဂ္ဂလိက ဘဏ်တွေရဲ့ ATM စက်တွေကနေ လူတစ်ဦးကို တစ်ရက် ကျပ် နှစ်သိန်း၊ တစ်ပတ် ကျပ် လေးသိန်းသာ အများဆုံးထုတ်ယူဖို့ ဘဏ်တွေက ကန့်သတ်ထားပါတယ်။

စစ်အာဏာသိမ်းပြီးနောက်ပိုင်း ဘဏ်တွေမှာ ငွေသားထုတ်ပေးတာကို ကန့်သတ်လိုက်တဲ့အတွက်  ပြည်သူတွေကြားမှာ ငွေသားရဖို့ ခက်ခဲခဲ့တာပါ။

ဘဏ်ထဲကငွေကို အပြင်ကငွေသားနဲ့လဲလှယ်တဲ့ ဈေးကွက်တစ်ခုလည်းဖြစ်နေပြီး ဝန်ဆောင်ခ သဘောမျိုး ၁၀ ရာခိုင်နှုန်းနဲ့အထက် ပေးရတာတွေလည်း ရှိနေပါတယ်။ စစ်အာဏာသိမ်းပြီး နောက်ပိုင်းမှာ ဘဏ်တွေအပေါ် ယုံကြည်မှုမရှိတော့တဲ့အတွက် ပြည်သူတွေက ငွေသားအပ်နှံမှုမရှိတော့ဘဲ ငွေသားထုတ်ယူမှုတွေပဲ ရှိနေပါတယ်။