တော်လှန်ရေးကာလ ဖွင့်လှစ်လိုက်တဲ့ Ayeyarwaddy Federal School မှာ အွန်လိုင်းနဲ့ မြေပြင်က ကျောင်းသား ၃၀၀၀ လောက်တက်ရောက်နေပြီး ဖက်ဒရယ်ပညာရေးနဲ့ ပတ်သက်တာ၊ လူ့အခွင့်အရေး၊ ပန်းချီ၊ ဂီတ စတာတွေ သင်ကြားပေးနေတယ်လို့ ကျောင်းရဲ့ ဒုဥက္ကဋ္ဌက ပြောပါတယ်။

ဇွန် ၁ ရက်နေ့ စတင်ဖွင့်လှစ်တဲ့ Ayeyarwaddy Federal School မှာ CDM ဆရာ၊ ဆရာမ ၁၃၀ လောက်က သင်ကြားပေးနေတာဖြစ်ပြီး အွန်လိုင်းမှာရော၊ မြေပြင်စာသင်ကျောင်းလည်း ဖွင့်လှစ်သင်ကြားနေတာပါ။

ကျောင်းရဲ့ ဒုဥက္ကဋ္ဌ ဦးဖြိုးဝေအောင်က “NUG ရဲ့ ကြားကာလသင်ရိုးညွှန်းတမ်းကို သင်ပေး​တယ်။ ဒါ့အပြင် ဖက်ဒရယ်ပညာရေးနဲ့ ပတ်သက်တာ၊ လူ့အခွင့်အရေး၊ ပန်းချီ၊ ဂီတ၊ အနုပညာ စသဖြင့်တွေကို တွဲဖက်သင်ရိုးအနေနဲ့ သင်ကြားပေးနေပါတယ်။ Google Form နဲ့ လျှောက်ခိုင်းပြီး ရွေးချယ် လက်ခံထားတာဆိုတော့ တိုင်းနဲ့ပြည်နယ်အစုံက ကျောင်းသားတွေ တက်နေကြပါတယ်” လို့ ပြောပါတယ်။

KG တန်းကနေ Grade 11 အထိ အွန်လိုင်းကနေ ကျောင်းသားပေါင်း ၂၈၀၀ ကျော်၊ မြေပြင်ကျောင်းမှာ ကျောင်းသား ၁၀၀ လောက် တက်နေပြီး ကျောင်းလခမပေးရဘဲ သင်ကြားပေးတဲ့ ဆရာ ဆရာမတွေကို ဒေတာခနဲ့ ဂုဏ်ပြုငွေ ချီးမြှင့်နိုင်ဖို့ကိုတော့ ပြင်ပကနေ အလှူရှင်ရှာဖွေနေတယ်လို့လည်း သူက ဆိုပါတယ်။

“အဓိက အခက်အခဲက ရန်ပုံငွေပေါ့။ zoom အသုံးပြုပြီး သင်ကြားရေးလုပ်နိုင်ဖို့ Participant ၃၀၀ ဆံ့နဲ့ ၅၀၀ ဆံ့ အကောင့် zoom pro acc တွေ အများကြီး လိုတယ်။ ပြီးတော့ ဆရာ၊ ဆရာမတွေကို Data ကြေးနဲ့ ဂုဏ်ပြုငွေ ပေးအပ်နိုင်ရေးတွေလည်း အများကြီး လိုအပ်နေတယ်။ မြေပြင်သင်ကြားရေးအတွက် ကျောင်းသုံးစာအုပ်တွေလည်း လိုအပ်နေပါတယ်” လို့ ပြောပါတယ်။

လှူဒါန်းပေးလိုသူတွေအနေနဲ့ Ayeyarwaddy Federal School ရဲ့ Page မှာ ဆက်သွယ်လှူဒါန်းနိုင်တယ်လို့ သူက ဆက်ပြောပါတယ်။

ပြီးတော့ တိုင်းပြည်အတွက် လက်နက်စွဲကိုင်တိုက်နေသူပဲရှိပြီး  ပြန်လည်ထူထောင်ရေးလုပ်နေသူတွေ  မရှိတော့ဘူးဆိုရင် တိုင်းပြည်နစ်နာနိုင်တာကြောင့် CDM တွေဟာလည်း အရေးပါတယ်လို့ သူက ပြောပါတယ်။

“CDM ဟာ ပြည်သူ့တော်လှန်ရေး တပ်ဦးပါ။  အကြမ်းဖက်စစ်ကောင်စီရဲ့ အုပ်ချုပ်မှုယန္တရားကို  ဖျက်ဆီးနိုင်ဖို့ ပကဖ(ပြည်သူ့ကာကွယ်ရေးအဖွဲ့) တွေ၊ ပအဖ(ပြည်သူ့အုပ်ချုပ်ရေးအဖွဲ့) တွေ၊ PDF အဖွဲ့တွေက မြေပြင်အုပ်ချုပ်ရေးယန္တရားကို ထိန်းချုပ်ထားနိုင်ဖို့ ကြိုးစားနေကြသလို ကျနော်တို့ ပညာရေး ဌာနအနေနဲ့လည်း ပညာရှင်ယန္တရားကို အုပ်ချုပ်ခွင့်မရအောင် ထိန်းနိုင်ဖို့ ကြိုးစားနေကြတာမို့ ပြည်သူ့ပညာရေးကျောင်းတွေကိုလည်း ဝိုင်းဝန်းကူညီပံ့ပိုးပေးကြပါလို့ တိုက်တွန်းပါတယ်။”

ဧရာဝတီတိုင်းက စစ်အာဏာရှင်ဆန့်ကျင်တဲ့လူငယ်တွေစုပေါင်းပြီး Ayeyarwaddy Federal Army   (ဧရာဝတီဖက်ဒရယ်လက်နက်ကိုင်တပ်ဖွဲ့)ကို  ဧပြီ ၁၅ ရက်နေ့က စတင်ဖွဲ့စည်းခဲ့တယ်လို့ ပါဝင်သူ ၁ ဦးက တည်ပြုပြောပါတယ်။

တိုင်းအတွင်းကလူငယ်တွေနဲ့ အလွှာပေါင်းစုံက ပညာရှင်တွေပူပေါင်းပြီး ခုလို ဖွဲ့စည်းလိုက်ရတာဖြစ်တယ်လို့ ပြောပါတယ်။

"အဓိကတော့ ပြည်သူတွေကို အကြမ်းဖက်ပစ်ခတ်သတ်နေတာကို ကာကွယ်နိုင်ဖို့နဲ့ စစ်အာဏာရှင်စနစ်ချုပ်ငြိမ်းပြီး ဖက်ဒရယ်ဒီမိုကရေစီစနစ် ပေါ်ပေါက်လာဖို့ တည်ထောင်တာ''လို့ ပါဝင်သူ လူငယ် ၁ ဦးက ပြောပါတယ်။

ပြည်သူလူထုက ရွေးချယ်တင်မြှောက်ထားတဲ့ နိုင်ငံတော်အာဏာကို ပြန်လည်အပ်နှင်းစေဖို့နဲ့ ပြည်သူတွေကို အကြမ်းဖက်ပစ်သတ်နေတဲ့ စစ်တပ်ကို တိုင်းရင်းသားညီနောင်တွေနဲ့အတူ စုပေါင်းတော်လှန်သွားမှာဖြစ်တယ်လို့ ဆိုပါတယ်။

အကြမ်းဖက်စစ်တပ်ကို တော်လှန်ချင်တဲ့ လူငယ်တွေအနေနဲ့လည်း Ayeyarwaddy Federal Army ရဲ့ မြို့နယ်အသီးသီးက တာဝန်ခံတွေကို ဆက်သွယ်နိုင်မှာဖြစ်တယ်လို့ သိရပါတယ်။