ကရင်ပြည်နယ်အတွင်း BGFတွေ တပ်စွဲထားတဲ့ သိန်းတန်ကုန်းကို သိမ်းပိုက်နိုင်ခဲ့သလို ပြီးခဲ့တဲ့ ၄ ရက်တာအတွင်း တိုက်ပွဲတွေမှာ အကြမ်းဖက်စစ်ကောင်စီတပ်တွေဘက်က အယောက် ၂၀ နီးပါး သေဆုံးခဲ့တယ်လို့ ကော်ဘရာ စစ်ကြောင်းက ထုတ်ပြန်ပါတယ်။

ဒါဟာ ပြီးခဲ့တဲ့ ဧပြီ ၁၀ ရက်ကနေ ၁၃ ရက်အထိ တိုက်ပွဲသတင်းတွေကို ထုတ်ပြန်လိုက်တာဖြစ်ပြီး တိုက်ပွဲကာလအတွင်း စစ်ကောင်စီဘက်က ထိခိုက်ဒဏ်ရာရသူ အများအပြား ရှိခဲ့တယ်လို့လည်း ဖော်ပြပါတယ်။

ဧပြီ ၁၀ ရက်မှာတော့ စစ်ကောင်စီတပ်တွေဘက်က လက်နက်ကြီးပစ်ခတ်တာကလွဲလို့ ထိတွေ့မှုမရှိပေမဲ့ နောက်တရက် ဧပြီ ၁၁ ရက်မှာတော့ အကြမ်းဖက်စစ် ကောင်စီတပ်တွေဘက်က လေကြောင်းတိုက်ခိုက်မှု ၅ ကြိမ် ပြုလုပ်ခဲ့တယ်လို့ ဆိုပါတယ်။ 

မနက် ၇ နာရီခွဲလောက်မှာ တိုက်လေယာဉ်နဲ့  ဗုံး ၅ ကြိမ် ပစ်ခတ်ပြီး အင်အား အလုံးအရင်းနဲ့ စစ်ကြောင်းထိုးခဲ့တာကြောင့် ရင်ဆိုင်တိုက်ပွဲဖြစ်ပွားခဲ့တာဖြစ်ကာ ၁၁ နာရီခွဲလောက်မှာတော့ MI35 တစင်း နာရီဝက်လောက် ပျံဝဲပြီး ဒုံးကျည်တွေ၊ စက်သေနတ်တွေနဲ့ ပစ်ခတ်ခဲ့တာလို့ ဆိုပါတယ်။

ဒါ့အပြင် နေ့လယ်  ၂ နာရီ ၁၅ မိနစ်လောက်မှာ ဂျက်တိုက်ရေယာဉ်နဲ့ နဲ့ ဗုံးကြဲခဲ့ပြီး ည ၁၂ နာရီခွဲမှာလည်း၁ ကြိမ် ဗုံးကြဲခဲ့ကာ အဆိုပါ တိုက်ပွဲတွေအတွင်း စစ်ကောင်စီဘက်က ၆ ယောက် သေဆုံးပြီးတော့ ၁၂ ယောက် ထိခိုက်ဒဏ်ရာရခဲ့ကာ တော်လှန်ရေး ပူးပေါင်းတပ်ဖွဲ့တွေဘက်ကတော့ ၄ ယောက် ကျဆုံးခဲ့တယ်လို့ ဆိုပါတယ်။

ဧပြီ ၁၂ ရက်မှာတော့ ကော်ဘရာစစ်ကြောင်း ပူးပေါင်းတပ်ဖွဲ့တွေဘက်က BGF သိန်းတန်ကုန်းကို တက်ရောက်သိမ်းပိုက်နိုင်ခဲ့တဲ့အပြင် စစ်ကောင်စီဘက်က ၁၀ ယောက် သေဆုံးကာ အများအပြား ဒဏ်ရာရခဲ့တယ်လို့ သိရပါတယ်။ 

ဒါ့အပြင် လက်နက် ၁၁ လက်၊ ရှေ့ထွက်မိုင်း ၂ လုံး၊ ကျည်အိမ်၊ နင်းမိုင်း ၁ လုံး၊ 5.56 ၅၈၄ တောင့်၊ 7.62 ကျည် ၇၅ တောင့်၊ အေကေကျည်ဘောက် ၂ ခု၊ HK ကျည်ဘောက် ၅ ခု၊ ကာဘိုင်ကျည်ဘောက် ၂ ခု၊ M ၁၆ ကျည်ဘောက် ၄ ခု သိမ်းဆည်း ရမိခဲ့တယ်လို့ ဆိုပါတယ်။

ဒါ့အပြင် ဧပြီ ၁၃ ရက်မှာလည်း တော်လှန်ရေးပူးပေါင်းတပ်ဖွဲ့တွေဘက်က ကျောက်မိုင်း BGF စခန်းကုန်းကို စနိုက်ပါနဲ့ ပစ်ခတ်ခဲ့လို့ အကြမ်းဖက်စစ်ကောင်စီလက်အောက်ခံ ၃ ယောက် သေဆုံးခဲ့ကာ စစ်ကောင်စီတပ်တွေဘက်ကလည်း တနေကုန် မကြာခဏ လက် နက်ကြီးတွေနဲ့ ပစ်ခတ်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ် တွေကြား တိုက်ပွဲတွေ ပြင်းထန်နေပါတယ်။

တော်လှန်ရေးတပ်ဖွဲ့ဝင် မြန်မာလူငယ် ၃ ယောက်ကို ထိုင်းအာဏာပိုင်တွေက ဖမ်းဆီးပြီး စစ်ကောင်စီလက်အောက်ခံ BGF နယ်ခြားစောင့်တပ်ထံ လွှဲပြောင်းပေးအပ်ခဲ့တဲ့ဖြစ်စဉ်ဟာ နိုင်ငံတကာ ရဲလုပ်ထုံးလုပ်နည်းတွေနဲ့ ညီညွတ်မှုမရှိဘူးလို့ အမျိုးသားညီညွတ်ရေးအစိုးရ (NUG) က ဧပြီ ၇ ရက်မှာ ထုတ်ပြန်ပါတယ်။

ကရင်ပြည်နယ်၊ ကေအန်ယူ တပ်မဟာ ၆ ဒေသမှာ တော်လှန်ရေးတာဝန် ထမ်းဆောင်နေရင်း ရတဲ့ ဒဏ်ရာကို ဆေးကုသဖို့  နယ်စပ်ဖြတ်ကျော်ပြီး ထိုင်းနယ်စပ် မဲဆောက်မြို့ကို အရေးပေါ်သွားရောက်စဉ် မတ်လ ၃၁ ရက်က  ထက်နေဝင်း (ခ)တောင်ပိုင်းနဂါးအပါ ရဲဘော်သုံးဦး ထိုင်းလဝကရဲ့ဖမ်းဆီးခံလိုက်ရပြီးနောက်  BGF တပ်ဖွဲ့လက်ထဲကို ပြန်ပို့ခံရတာ ဖြစ်ပါတယ်။

ဒီလုပ်ရပ်က မြန်မာစစ်ကောင်စီရဲ့ အကြမ်းဖက်ရက်စက်မှုတွေအပါအဝင်  အကြောင်း အမျိုးမျိုးကြောင့် ထိုင်းနိုင်ငံအတွင်း ရွေ့ပြောင်း ခိုလှုံရောက်ရှိနေတဲ့ မြန်မာနိုင်ငံသားတွေရဲ့ အသက်အန္တရာယ်နဲ့ လုံခြုံရေးကို ခြိမ်းခြောက်လာတဲ့ ကိစ္စရပ်ဖြစ်တာကြောင့် NUG အနေနဲ့ နိုင်ငံသားတွေကို ကာကွယ်စောင့်ရှောက်ရမယ့် တာဝန်ရှိတာနဲ့အညီ အဆိုပါ ဖြစ်စဉ်နဲ့တကွ အလားတူဖြစ်စဉ်တွေကို အထူးအလေးထားဦးစားပေးပြီးတော့ သက်ဆိုင်ရာအဖွဲ့အစည်းတွေနဲ့ ဆက်သွယ်ညှိနှိုင်း၊ ဖြေရှင်းဆောင်ရွက်နေတယ်လို့ ထုတ်ပြန်ပြောပါတယ်။

ထိုင်း လ.ဝ.က ရဲ့ ဖမ်းဆီးခြင်းခံလိုက်ရတဲ့ PDF ရဲဘော် ၃ ဦးဟာ Lion Battalion စစ်ကြောင်းက  ဒု-စစ်ကြောင်းမှူး ကိုသီဟ (၃၈ နှစ်)၊ ထက်နေဝန်း(ခ)တောင်ပိုင်းနဂါး (၃၁ နှစ်)နဲ့ စောဖြိုးလေး (၂၆ နှစ်)တို့ဖြစ်ကြပါတယ်။

သူတို့ကို ထိုင်းအာဏာပိုင်တွေကဖမ်းဆီပြီး BGF ဆီ လွှဲပြောင်းအပ်နှံခဲ့ပြီးနောက် မြဝတီမြို့ အင်ကြင်းမြိုင် BGF ဂိတ်မှာ ပစ်ခတ်ခံရလို့  သူတို့ထဲက ၁ ယောက် သေဆုံးသွားကာ ကျန် ၂ ယောက်ကို BGF က စစ်ကောင်စီထံ အပ်နှံလိုက်တယ်လို့ သတင်းထွက်ပေါ်ခဲ့ပေမဲ့ ဒီဗွီဘီသတင်းဌာနအနေနဲ့ သီးခြားအတည်ပြုနိုင်ခြင်း မရှိသေးပါဘူး။

အဆိုပါလူငယ် ၃ ယောက်ဟာ မဲဆောက်မြို့ကို ဆေးကုသဖို့ လာရောက်ရာမှာ ထိုင်းလဝက ရဲနဲ့ စစ်တပ်ဂိတ်ကို လမ်းမှားရောက်သွားခဲ့လို့ ဖမ်းဆီးခံခဲ့ရာကာ မြန်မာဘက်ခြမ်းက နယ်ခြားစောင့်တပ် BGF ဂိတ်ကိုပို့ဆောင်ခံရတာဖြစ်ကြောင်းနဲ့  ပစ်သတ်ခံလိုက်ရတယ်ဆိုတာတော့ မဟုတ်ဘူးလို့ တောင်ပိုင်းနဂါးနဲ့နီးစပ်သူတစ်ဦးက ပြောပါတယ်။

"အရေးပေါ်ဆေးလာကုတဲ့အချိန် တောမောင်း(လဝက)က ဖမ်းဆီးလိုက်တာလို့ ကြားတယ်။ ပထမ ညှိသေးတယ်။ ဒါပေမဲ့ စစ်ကောင်စီကနေ ဒီဘက်မှာ By name နဲ့ ဖမ်းဖို့ပြောထားတာတွေရှိတော့ ဟိုဘက်ကမ်း BGF ဂိတ်ကို ပြန်သွန်တာ အသတ်ခံလိုက်ရတယ်ဆိုတာတော့ မဟုတ်ဘူး။ သုံးယောက်လုံးကို လက်ရှိ မော်လမြိုင်စစ်ကြောရေးမှာ ပို့ထားလို့သိရတယ်” လို့ ဆိုပါတယ်။

လက်ရှိမှာတော့ ဒု-စစ်ကြောင်းမှူး ကိုသီဟက ရင်ဘတ်ဒဏ်ရာကြောင့် မော်လမြိုင်မြို့မှာ ဆေးကုသမှုခံယူနေပြီး ကျန်နှစ်ဦးထဲက တစ်ဦးက ပေါင်မှာ ဒဏ်ရာရရှိခဲ့တယ်လို့ဆိုပါတယ်။ လူငယ် ၃ ဦးရဲ့ အခြေအနေနဲ့ ပတ်သက်ပြီး စစ်ကောင်စီအနေနဲ့ တရားဝင်ထုတ်ပြန်တာမရှိထားတဲ့အတွက် ဒီဗွီဘီအနေနဲ့ သီးခြားအတည်ပြုနိုင်ခြင်း မရှိသေးပါဘူး။

လက်ရှိမှာတော့ ထိုင်းနိုင်ငံ မဲဆောက်မြို့မှာ နိုင်ငံရေးအရ တိမ်းရှောင်လာသူတွေ များပြားလာနေပြီး စစ်ကောင်စီတပ်ဘက်က ဖမ်းဆီးခိုင်းတဲ့အတွက် CDM တွေ၊ တက်ကြွလှုပ်ရှားသူတွေအနေနဲ့ သတိနဲ့ နေထိုင်နေရပြီး ထိုင်းအာဏာပိုင်တွေကလည်း မကြာခဏ ဖမ်းဆီး ငွေညှစ်တာမျိုးတွေ ပြုလုပ်နေတယ်လို့ သိရပါတယ်။

ထိုင်း-မြန်မာနယ်စပ်၊ မဲဆောက်မြို့မှာတော့ မြန်မာစစ်အာဏာရှင်ကို တော်လှန်ဆန့်ကျင်နေသူတွေ အပါအဝင် တရားမဝင်နဲ့ တရားမဝင် ရွှေ့ပြောင်းနေထိုင်သူ မြန်မာတွေသိန်းနဲ့ချီရှိနေပြီး ထိုင်း စစ်တပ်၊ ရဲ၊ လဝကအပါအဝင် လုံခြုံရေးနဲ့ အုပ်ချုပ်ရေးပိုင်းက မကြာခဏ စစ်ဆေးအရေးယူတာ၊ ဖမ်းဆီးထောင်ချတာ၊ ငွေညှစ်တာ၊ ခြိမ်းခြောက်အကြပ်ကိုင်တာတွေ ရှိနေတာပါ။

ပြီးခဲ့တဲ့ လတုန်းကလည်း မြန်မာတွေ နေထိုင်ရာ တိုက်ခန်းတွေကို ထိုင်းရဲနဲ့ စစ်တပ်က ဝင်ရောင်စီးနင်းစစ်ဆေးရှာဖွေခဲ့သလို  ခုရက်ပိုင်းမှာလည်း တိုက်ပွဲတွေကြောင့် နေရပ်စွန့်ခွာထွက်ပြေးတိမ်းရှောင်လာရသူတွေနဲ့အတူ ဖမ်းဆီးစစ်ဆေးမှုတွေ ခပ်စိပ်စိပ် လုပ်ဆောင်လာနေတာ ဖြစ်ပါတယ်။