စစ်ကိုင်းတိုင်း၊ ရေဦး - မုံရွာ ကားလမ်းဘေး ဖန်းခါးကျင်းရွာနားက BOC ဆီဆိုင်မှာ ဧပြီ ၂၅ ရက်က ဒုတိယအကြိမ် ဗုံးပေါက်ကွဲခဲ့တယ်လို ဆိုင်တာဝန်ရှိသူတယောက်က ပြောပါတယ်။
"ဒီမနက်မှာပိုင်း ဗုံးပေါက်တယ်။ အခုဆီဆိုင်က အကုန်လုံးပျက်စီးသွားတယ်။ ဝန်ထမ်းတွေက မနက်ခင်းမှ ဗုံးထောင်ထားတယ်ဆိုတာ သိရပါတယ်။ မနက် ၈ နာရီလောက်ထောင်ထားတဲ့ ဗုံးပေါက်တယ်။ လူတွေ ထိခိုက်တာ မရှိဘူး။ ကျနော်တို့ ဆီဆိုင်က စစ်ကောင်စီနဲ့ ပတ်သက်တာ မရှိဘူး”လို့ ဆိုင်တာဝန်ရှိသူ တစ်ဦးက ပြောပါတယ်။
ဖန်းခါးကျင်းကျေးရွာအနီးရှိတဲ့ BOC ဆီဆိုင်ကို ဧပြီ ၂၃ ရက်ကလည်း လက်နက်ကိုင်အဖွဲ့ တစ်ခုလာရောက်ပြီး ဆိုင်မှာရှိတဲ့ ဝန်ထမ်းတွေကို ရိုက်နှက်သွားပြီး ငွေကျပ် ၁၀ သိန်းကျော်လည်း ယူဆောင်သွားခဲ့တယ်လို့သိရပါတယ်။
BOC ဆီဆိုင် ဗုံးပေါက်ကွဲမှုဟာ ဘယ်အဖွဲ့အစည်းက လုပ်ဆောင်တယ်ဆိုတာတော့ မသိရသေးပါဘူး။
စစ်ကိုင်းတိုင်း၊ ခင်ဦးမြို့နယ်ရှိတဲ့ PDF စခန်းတခုကို စစ်ကောင်စီတပ်တွေ ဧပြီ ၂၃ ရက်နေ့က ဝင်ရောက်စီးနင်းခဲ့တယ်လို့ သိရပါတယ်။
“စစ်ကောင်စီတပ်တွေ မနေ့က မနက် ၁၀ နာရီမှာ စစ်ကြောင်းထိုးလာတယ်။ ဦးမြို့နယ်၊ ရွာသာကျေးရွာ စခန်းတခု စီးနင်းခံရတယ်။ လက်နက်အချို့ပါသွားတယ်၊ ၁ ဦး ကျဆုံးသွားတယ်” လို့ ခင်ဦး PDFတပ်အဖွဲ့ဝင်တဦးက ပြောပါတယ်။
စစ်ကိုင်းတိုင်းအတွင်း မြို့နယ် ၃၀ ကျော်ကို အင်တာနက်တွေဖြတ်တောက်ကာ စစ်ကောင်စီတပ်တွေက နေ့စဉ်လိုလို စစ်ကြောင်းထိုးနေပြီး ကျေးရွာ နေအိမ်တွေကို မီးရှိ့ဖျက်ဆီးနေသလို ဒေသခံတွေကိုလည်း ပစ်ခတ်ဖမ်းဆီးတာတွေ ပြုလုပ်နေတယ်လို့ သိရပါတယ်။
စစ်ကိုင်းတိုင်း မုံရွာ-ရေဦးကားလမ်းပေါ်ရှိ BOC စက်သုံးဆီအရောင်းဆိုင်ကိုလည်း အမည်မသိ သူတွေက ဧပြီ ၂၃ ရက်နေ့ ညနေပိုင်း ဝင်ရောက်ဖျက်ဆီးခံရတယ်လို့ သိရပါတယ်။
"မနေ့ညနေ ၃ နာရီမှာ မုံရွာ-ရေဦးကားလမ်း ဖန်းခါးကျင်း ကျေးရွာရှိတဲ့ BOC စက်သုံးဆီဆိုင် ဖျက်ဆီးခံရတယ်၊ ဆိုင်ကယ်တွေနဲ့ လူ ၇ ဦး လာပြီး ဆိုင်မှာရှိတဲ့ ဝန်ထမ်းတွေကို ရိုက်သွားတယ်၊ ငွေ ၁၀ သိန်းလည်း ယူသွားတယ်” လို့ ဆိုင်တာဝန်ရှိသူတဦးက ပြောပါတယ်။
BOC ဆီဆိုင်ကို ဘယ်အဖွဲ့က ဖျက်ဆီးတယ်ဆိုတာ မသိရသေးဘဲ လက်ရှိမှာတော့ ဆိုင်ပိတ်ထားတယ်လို့ သိရပါတယ်။
