YBS ယာဉ်လိုင်းတွေကို စစ်ကောင်စီက Yangon Bus Operator လိုခေါ်တဲ့ အင်တာနက်ကနေတဆင့် ထိန်းချုပ်တဲ့စနစ်ကို ပြန်လည်အသက်သွင်းပြီးနောက် YBS ယာဉ်လိုင်းတွေပေါ်အထိ တက်ကာ CCTV ဖွင့်ထားတာတွေ ရှိ၊ မရှိ စစ်ဆေးနေတယ်လို့ ခရီးသွားပြည်သူတွေက ပြောပါတယ်။

ဇန်နဝါရီ ၂၄ ရက်က စစ်ကောင်စီတပ်သားတွေနဲ့ ယာဉ်ထိန်းရဲတွေ၊ ရဲတပ်ဖွဲ့တွေက ရန်ကုန်ဆေးရုံကြီး မှတ်တိုင်နား မရောက်ခင်နားမှာ YBS ကားတွေပေါ်တက်ပြီး ယာဉ်မောင်းတွေကို CCTV ဖွင့်ထားတာ ရှိ၊ မရှိ စစ်ဆေးမေးမြန်းခဲ့တယ်လို့ ခရီးသွားပြည်သူတဦးက ဒီဗွီဘီကို ပြောပါတယ်။

ဒါ့အပြင် လက်နက်ကိုင်ဆောင်ထားတဲ့ စစ်ကောင်စီတပ်ဖွဲ့ဝင်တွေက ကားပေါ်က ခရီးသွား ပြည်သူတွေကိုလည်း လိုက်လံကြည့်ရှုပြီး ကားတွေကိုလည်း ဓာတ်ပုံရိုက်သွားသလို နောက်ထပ်လာတဲ့ကားတွေကိုလည်း တားဆီးစစ်ဆေးတယ်လို့ ပြောပါတယ်။

YBS ယာဉ်လိုင်းတွေကို အင်တာနက် ကနေတဆင့် ထိန်းချုပ်တဲ့စနစ်ကို ပြန်လည်အသက်သွင်းနေပြီး YBS ယာဉ်တိုင်းမှာ CCTV တပ်ဖို့နဲ့ CCTV ပျက်စီး‌နေတဲ့ ယာဉ်တွေအနေနဲ့ ပြန်လည်ပြင်ဆင်ဖို့ YRTA က ပြီးခဲ့တဲ့ ဒီဇင်ဘာ ၅ ရက်နေ့မှာ ညွှန်ကြားထားပါတယ်။

တနင်္သာရီတိုင်း၊ မြိတ်မြို့ ရပ်ကွက်တချို့မှာ စစ်ကောင်စီက အရင်ကထက် CCTV ကင်မရာတွေ အများအပြား တပ်ဆင်လာတယ်လို့ ဒေသခံတွေဆီက သိရပါတယ်။

ဒေသခံတဦးက “ကျနော်ကတော့ လက်ရှိနိုင်ငံရေးအခြေအနေနဲ့ သူတို့အတွက် လုံခြုံရေးအရ ပြုလုပ်နေတယ်လို့ မြင်တယ်။ ပြစ်မှုတခုအပေါ်မှာ ခြေရာခံလိုက်နိုင်အောင် ပြင်ဆင်နေတာပဲလေ။ မြို့တွင်း မြေအောက်တော်လှန်ရေးသမားတွေရဲ့ လုပ်ရှားမှုတွေကို စောင့်ကြည့် ကာကွယ်နေတာလို့ မြင်တယ်” လို့ ပြောပါတယ်။

မြိတ်မြို့အတွင်းမှာ စစ်အာဏာသိမ်းပြီးနောက်ပိုင်း CCTV တွေ ပိုမိုတပ်ဆင်လာတဲ့အပြင် ပြည်သူ့စစ်ဆိုပြီး အရပ်ဝတ်နဲ့ လုံခြုံရေးချတာတွေပါ လုပ်ဆောင်လာတယ်လို့လည်း သိရပါတယ်။

မြိတ်ဒေသခံတဦးက “ကျနော့်အနေနဲ့ မြင်တာကျတော့ CCTV ကင်မရာတွေ လိုက်တပ်နေတာဟာ အပိုအလုပ်တွေလို့ မြင်တယ်။ ကျနော်တို့ဟာ CCTV ကင်မရာတွေထက် စကစက လုံခြုံရေးချထားတဲ့လူတွေကို ပိုကြောက်ရတယ်။ သူတို့က ညဘက်ဆို ဘယ်နားမှာ ချုံခိုစောင့်မယ်မှန်းလည်း မသိ၊ တွေ့ရင် ပိုက်ဆံတောင်း ငွေညစ်တာတွေကိုပဲ ပိုကြောက်ရတယ်” လို့ ပြောပါတယ်။

မြိတ်မြို့အတွင်းက တချို့ရပ်ကွက်တွေမှာ စစ်ကောင်စီဘက်က လုံခြုံရေးချတယ်လို့ အကြောင်းပြပြီး ညမထွက်ရအမိန့်မတိုင်မီ ဒေသခံပြည်သူတွေကို ခြိမ်းခြောက် ငွေညစ်တာတွေ လုပ်ဆောင်နေတယ်လို့လည်း သိရပါတယ်။

တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ် ညောင်ပင်ကွင်းကျေးရွာက စစ်ဘေးရှောင်ပြည်သူတွေ နေရပ်ပြန်မရသေးတာကြောင့် အခက်အခဲ ကြုံနေကြတယ်လို့ ဒေသခံတွေက ပြောပါတယ်။

ညောင်ပင်ကွင်းကျေးရွာမှာ တိုက်ပွဲတွေ မကြာခဏ ဖြစ်ပွားနေတာကြောင့် ဒေသခံတွေ ထွက်ပြေးတိမ်းရှောင်နေကြရပြီး အလုပ်အကိုင် ရပ်နားထားရကာ ထိခိုက်နစ်နာနေကြတယ်လို့ ညောင်ပင်ကွင်းရွာခံတဦးက ပြောပါတယ်။

“လက်နက်ကြီးတွေ မကြာမကြာပစ်နေတော့ ရွာမှာမနေရဲကြဘူးလေ။ တိုက်ပွဲငြိမ်နေရင် ခဏလောက်ပဲ ပြန်လာပြီး ရွာအ​ခြေအနေ ပြန်လာကြည့်ကြတယ်။ ရွာမှာတော့ ပြန်လာမနေရဲကြသေးဘူး။ အလုပ်အကိုင်‌တွေ ရပ်နားထားရတော့ ထိခိုက်နစ်နာတာတွေ ရှိတယ်။”

ကျေးရွာတချို့ကို ထွက်ပြေးတိမ်းရှောင်နေကြသူ ပိုများလာတာကြောင့် အရင်ကထက် အရောင်းအဝယ် လျော့ပါးလာပြီး ပိုပြီးတော့ ခက်ခဲလာကြ‌တယ်လို့ လုပ်ငန်းရှင်တဦးက ပြောပါတယ်။

“ပစ္စည်းတွေလည်း ဝယ်မယ့်သူမရှိတော့ တန်ဖိုးမရှိ​တော့ဘူး။ ကွမ်းသီးတွေဆိုလည်း ထွက်ပြေးရင် ကျန်ခဲ့မယ့်အတူတူ စျေးအနိမ့်နဲ့ ရောင်းနေရတယ်။ ရွာလူဦးရေက ၃ ပုံမှာ ၂ ပုံလောက်ပဲ ကျန်ပြီ။”

ညောင်ပင်ကွင်းကျေးရွာမှာ အိမ်ထောင်စု ၁,၀၀၀ ကျော်ရှိပြီး တိုက်ပွဲတွေ မကြခဏ ဖြစ်ပွားမှု‌ကြောင့် လူဦးရေထက်ဝက်ကျော် ထွက်ပြေးတိမ်းရှောင်နေကြတယ်လို့ ဆိုပါတယ်။

ညောင်ပင်ကွင်းကျေးရွာအပြင် အနီးတဝိုက်ရှိ ထုံတော်ရွာ၊ ခြောက်မိုင်ရွာ၊ ထုံမခါရွာနဲ့ ဘန်လောရွာတွေကလည်း ထွက်ပြေးတိမ်းရှောင်သူတွေ ရှိ‌တယ်လို့ သိရပါတယ်။